“Obuli lhusunzo lhubuya n’obuli lhusunzo lhuwene, bikalhua endatha, kandi bikasira oku Thatha w’ekyakakalha kyosi.” (Yakobo 1:17) Erisako eri likakanaya okwa mubere ow’erihithya owa Thatha wethu w’elhubulha Yehova Nyamuhanga. Aliwe, okwa bihembo bingyi ebya Nyamuhanga abiriha abandu, hali kighuma kisa ekilengire ebindi ebyosi. Ky’ekyahi? Ebinywe bya Yesu ebyasibwe kutsibu ebiri omu Yoane 3:16, bikathubwira bithi: “Kusangwa Nyamuhanga mwanza ekihugho ky’athya, kyaleka iniaha Mughalha wiwe, Ekyusa kiwe, neryo oyukamwikiriraya syahere, nikwa abye n’engebe y’erikotha.”

Nyamuhanga erihayo Mughalha wiwe ekyusa—ahathe erithika-thika ky’ekihembo ekilengire kutsibu ebya thwabirithahebwa, kundi ky’ekikaleka ithwabya bwiranda okwa bukobe bw’ekibi, erikekelhuha, n’olhuholho. (Esyonyimbo 51:5; Yoane 8:34) Nomuthwanga lengaho bungahi, ahabwethu sithuwithe ekya thwanga kolha eriy’iha omwa bukobe obu. Aliwe, omwa lhwanzo lhwiwe lhunene, Nyamuhanga abirithuha ekikayithaghisibawa erithwiha omwa bukobe obu. Omw’ihayo Mughalha wiwe ekyusa, Yesu Kristo, ng’embanulho, Yehova Nyamuhanga mwaha abandu abowa b’amaha w’erisyabana engebe y’erikotha. Aliwe, embanulho niki? Busana naki yikayithaghisibawa? Kandi yanga thughasira yithi?

Embanulho y’endihi eyikathuhawa erisubulya ekilhue ikyabiriheribwa kutse ly’eriboholhwa omwa bukobe. E Biblia yikasoborera ngoku ababuthi bethu b’erimbere, Adamu na Eva, mubahangikwa isibawithe kibi, ibane n’amaha aw’erisyabyaho kera na kera okwa kihugho paradiso haghuma n’abaana babu abo bangabuthire. (Enzuko 1:26-28) Eky’obulighe, mubaherya ebyosi omw’ithwamu erithendiowa Nyamuhanga— bamabya bandu b’ekibi. Ni kyahi ekyalhwiririramu? E Biblia yikasubiraya yithi: “Neryo ebibi mubyahika muna kihugho busana n’omundu mughuma, n’olhuholho mulhwingira busana n’ekibi kiwe, neryo lithya olhuholho mulhwahika okwa bandu abosi, kusangwa abosi mubakolha ebibi.” (Abanya Roma 5:12) Omwakanya k’erilhabirya abaana biwe engebe eyihikene, Adamu mwabasighalirya ekibi n’ekyalhwiririramu, olhuholho.

Okwa mbanulho, ekikathuhawa kitholere ikyabya ik’ingenengene n’ekyaheribawa. Omughulhu Adamu akighenderera erithendiowa Nyamuhanga, mwakolha ekibi, n’ekyalhwiririramu engebe eyihikene muyaheribwa—engebe ya Adamu. Erikwamana ne Biblia, ekyo muk’ingirya abaana ba Adamu omwa bukobe bw’ekibi n’olhuholho. Neryo mukyayithaghisya erihayo engebe eyindi eyihikene—engebe ya Yesu—erihebwa ng’ekihongwa nuku eriboholhwa omwa bukobe lyanga thokekana. (Abanya Roma 5:19; Abanya Efeso 1:7) Kundi Nyamuhanga mwathuha embanulho busana n’olhwanzo, kikaleka abandu ibabya n’amaha w’erisyatsemera ekya Adamu na Eva baheraya—engebe ey’eribyaho kera na kera omwa kihugho paradiso.—Eribisulirwa 21:3-5.

Busana n’ekya mbanulho yikaberereraya, sihali ekyanga leka ithuthaligha ngoku ekihembo kya Nyamuhanga ekikaleka ikyathokekana erisyabana engebe y’erikotha, ky’ekihembo ekilengire ebyosi. Erilhangira ngoku ni “lhusunzo lhuwene” kutse ekihembo ekyuwene, thulebaye, ngoku embanulho yikaleka ithwaha ebihembo ebyuwene, ngoku kiryakanibawako omo mwatsi owahwere.

Yikaberereraya eriyisunza lyethu. Ithwe bandu, thukabuthawa n’eriyisunza ery’eryanza eribyaho kera na kera. (Omugambuli 3:11) Nomwakine indi ahabwethu sithwanga thoka eriberererya eriyisunza eri, embanulho yikaleka eki ikyathokekana. E Biblia yikabugha  yithi: “Obuhingyi bw’erikolha ekibi ni lhuholho, nikwa olhusunzo olhukalhua oku Nyamuhanga ni ngebe y’erikotha busana n’erimathikana na Yesu Kristo, Omukama wethu.”—Abanya Roma 6:23.

Yikaberereraya ekiyithawa kyethu. Abandu sibanga thokire erithuha embanulho. E Biblia yikasoborera yithi: “Kusangwa endihi y’engebe y’omundu ni nene kutsibu, syanga thoka eribana endihi y’engebe eyo.” (Esyonyimbo 49:7, 8) Busana n’ekyo, thwabya thukayithagha kutsibu obuwathikya bwa Nyamuhanga nuku thwanga boholhwa omwa bukobe bw’ekibi n’olhuholho. Aliwe busana “n’erithongolibwa erikabanika busana na Yesu Kristo,” Nyamuhanga abirithuha ekya thwabya thukayithagha.—Abanya Roma 3:23, 24.

Eryasira okwa mughulhu owatholere. E Biblia yikathubwira yithi: “Kusangwa omughulhu thwabya thukine bakolha-nabi, Kristo mwathuholera.” (Abanya Roma 5:8) Kundi muyahebwa “omughulhu thwabya thukine bakolha-nabi,” embanulho yikakanganaya olhwanzo lhunene olho Nyamuhanga athuwithire nomwakine indi thuli bakolha nabi. Kandi yikaleka ithwalindirira bingyi omwa buthuku obukasa, nomwakine indi thutholere ithwayiyinirya ebikalhwiririra omwa kibi.

Kikakanganaya ekighendererwa ekyuwene n’omuthima w’eritsomana. E Biblia yikakanganaya ekyaleka Nyamuhanga iniahayo Mughalha wiwe ng’embanulho: “Olhwanzo lhwa Nyamuhanga lhwabiriminyikalha okw’ithwe omwa mwatsi ono, athi, Nyamuhanga mwathuma mughalha wiwe mubuthwa mughuma omwa kihugho, ithwathoka eribana engebe busana nayu. Olhwanzo lhw’olhu, butsira ambu ithwe thwanza Nyamuhanga, nikwa iyo mwathwanza.”—1 Yoane 4:9, 10.

Wanga kangania wuthi ku wukasima ekihembo ekilengire ebyosi eki? Wibuke ngoku ebinywe bya Yesu ebiri omu Yoane 3:16 bikabugha bithi abo basa ‘abakamwikiriraya’ ba basyalhamibwa. Erikwamana ne Biblia, erikirirya, “n’iminya kundu emyatsi eyathukahira kw’amaha.” (Abaebrania 11:1) Erithoka eribya n’amaha aya, thutholere ithwaminya ekwenene y’Amasako. Busana n’eki, thukakuhira mw’omuhwa ow’eribana obuthuku obw’erigha oku Yehova Nyamuhanga, Oyukaha “olhusunzo lhuwene” olhu, n’eriminya ekya wutholere iwakolha erisyabana engebe eyabirithokekana busana n’embanulho.

Wangan’igha ebyosi ebi omw’ilebya ndeke omwatsi owaseghemere okwa Masako ow’ali okwa www.pr418.com okwa Intaneti. Abema ba Yehova bakendi tsema erikuwathikya. Thuwithe amaha thuthi wukendibya wuk’igha okwa kihembo ekilengire eki n’erighasirwa mukyo, nawu iwukendi bugha ebinywe bino: “Wasingya oku Nyamuhanga busana n’Omukama wethu Yesu Kristo!”—Abanya Roma 7:25.