Sihali oyuli n’ekisasani kya Yesu w’enyine-nyine. Mwathatherwa kisasani. Kandi ibbwa, erilhua kera, anatherire omwa bitabu bingyi.

Omo kwenene, abakathera aba sibasi Yesu ng’abya asosire athi. Ibakathera ekisasani kiwe erikwamana n’ebya bak’owa, esyonyikirirya esiriho, n’ababya bakanza ebisasani ebyo ibakana bugha nga babatherere Yesu oyusosire athi. Nibya ebisasani ebi byangana leka abandi ibathunga amalengekania awahengemire oku Yesu n’erithulira liwe.

Abandi ibakathera Yesu ng’omundu omutseke oyuwithe esyonzwiri nyiri kandi ow’esyonderu nyike kutse ibamuthera ng’oyuli omwa obulighe. Omwa bindi bisasani, bakamuthera ng’oyuwithe amaaka w’olhulimu-limu, inianathimbire kw’ekyakakalha okwa muthwe, kutse iniane haali oko b’ali nabu. Mbwino kwenene Yesu kwanabya asosire athya? Thwanga minya thuthi? Enzira nguma ly’erilebya ebye e Biblia yikamukanayako ebyanga thuwathikya eriminya ng’abya asosire athi. Kandi byangana thuwathikya erimuthungako amalengekania awuwene.

Ebyo by’ebinywe ebya Yesu angabya iniabugha omwa musabe akabatizibwa. (Abaebrania 10:5; Matayo 3:13-17) Omubiri oyo abya asosire athi? Myaka nga 30 enyuma, malaika Gabrieli mwabwira Maria athi: “Wasyaheka obukule n’eributha omulhwana, . . . Mughalha wa Nyamuhanga.” (Luka 1:31, 35) Obo kwesi, Yesu abya mundu oyuhikene, ngoku Adamu anabya akahangikwa. (Luka 3:38; 1 Abanya Korinto 15:45) Yesu angabya iniabya mulhume oyuhethire ndeke, kandi obundi angabya iniabya inianasosire mama wiwe Omuyuda, iya Maria.

Ng’omubere w’Abayuda, mbaghane n’Abaroma, Yesu aby’awithe esyonderu. Esyonderu ng’esyo isikakanganaya ekitsumbi n’erisikya; isisiribya nyiri-nyiri kandi putsu-putsu. Ahathe erithika-thika, Yesu angabya inianabya akasaririra ndeke esyonderu siwe n’erisugha esyonzwiri siwe. Abanaziri basa, nga Samusoni ba bathabya bakaghemba esyonzwiri syabu.—Emiganzo 6:5; Abatsweri 13:5.

Yesu mwaghunza buthuku bunene obw’okwa myaka yiwe 30, iniane mukolha ng’omubatsi, kandi syabya akakolesya ebyuma ebiri ng’ebiriho munabwire. (Mariko 6:3) Neryo angabya iniabya awithe akaghalha kanene. Omughulhu atsuka omubiiri wiwe w’erithulira, iyo iyuwene mwathoka ‘erihighira abosi ababya bakaghulya esyonde n’esyombuli b’eyihya oko hekalu, kandi mw’utha esyofranka sy’abahingania n’erikubulha ehimeza hyabu” isyathawathikibwa. (Yoane 2:14-17) Omulhume w’akaghalha n’obuthoki yuwanga kolha ekiri ng’eki. Yesu mwakolesya omubiri owa Nyamuhanga abya iniabirimutheghekera erikolha omubiiri ogho Nyamuhanga amuha ono: “Litholere inathulha engulhu yuwene y’Obwami bwa Nyamuhanga oko yindi miyi nibya, kusangwa Nyamuhanga mwanyithuma erikolha omwatsi oyu.” (Luka 4:43) Mukyayithaghisya akaghalha kanene kutsibu erithimba omwa Palestine eyosi omwa bisandu akathulha omwatsi oyu.

Emibere ya Yesu eyuwene yangabya imuyaleka “abakanuba n’eriheka ebirithohire,” ibaligha erikokya liwe eri. (Matayo 11:28-30) Eritsanga n’olhukeri lhwiwe byangabya imubyaleka abakamuhulikirira ibaligha omulhaghe wiwe ow’eribalhuhukya. Nibya n’abaana  ibakanza eribya ahali Yesu, kundi e Biblia yikabugha yithi: “Mwahambabo omwa byalha biwe.”—Mariko 10:13-16.

Nomwakine indi Yesu mwaghalhwa athali aholha, syabya mundu ow’olhulighe-lighe. Ng’eky’erileberyako, mwanayira eky’akolha okwa bugheni obwabya e Kana omw’ihindulha amaghetse mo bwabu. (Yoane 2:1-11) Okwa yindi mibalha mwanakangirirya amasomo aw’athe ang’ibiriranwa.—Matayo 9:9-13; Yoane 12:1-8.

Ekikulhu omwa byosi, erithulira lya Yesu mulyaleka abahulikiriri biwe ibabya n’amaha w’obuthuku obuwene obukasa. (Yoane 11:25, 26; 17:3) Abigha biwe 70 babere bakamubwira okwa byabalholireko omw’ithulira, “mwatsema” kandi mwababwira athi: “Mutseme kusangwa amena wenyu abirisakwa elhubulha.”—Luka 10:20, 21.

Abakulhu b’edini ab’omwa buthuku bwa Yesu mubahiraho emibere ey’eryanza eriyihamya n’erikangania obuthoki bwabu. (Emiganzo 15:38-40; Matayo 23:5-7) Mbaghane nabu, Yesu iyo mwabwira abakwenda biwe athi ‘isibathabalha’ oko bandi. (Luka 22:25, 26) Nibya, Yesu mw’anabakunga athi: “Muyitheghaye busana n’abakangirirya b’emighambo abakanza erilendera ibanambithe esyokanzu syabu nyiri-nyiri, ibanzire erikeribwa omwa hithali.”—Mariko 12:38.

Erithendibya ng’ibo, Yesu iyo iniakanabya omwa bandi bandu isyathayithwalha mo wambaghane, nibya mwanahika n’okwa wundi mukonga omwa bubiso-biso. (Yoane 7:10, 11) Nibya n’omwa bakwenda biwe 11 abathaleghulha, mwathayithwalha mwa wambaghane. Kundi nibya na Yuda oyuwamughoberaya, mwamulyatsirira, “ekiminyikalho,” eky’erimuminyikalya okwa basyamuhamba.—Mariko 14:44, 45.

Nomwakine indi ebingyi ebimuhambireko sibyasibwe, kilhangirikire ngoku Yesu sy’abya asosire ngoku bakabera erimukangania okwa bisasani. Ekikulhu kutsibu w’amalengekania agho thumuwitheko lino, oko misosere yiwe.

Ekiro Yesu abugha ebinywe ebi, kyan’ekiro aholha n’eritsikwa. (Yoane 14:19) Mwahayo engebe yiwe ng’embanulho “busana n’abandu bangyi.” (Matayo 20:28) Okwa kiro kyakasathu, Nyamuhanga mwamulhubukya “omwa kirimu” kandi “mwaleka inialholhwako” n’abaghuma b’okwa bigha biwe. (1 Petero 3:18; Emibiri 10:40) Yesu abya asosire athi akabuthukira okwa bigha biwe? Obundi angabya iniabya isy’akisosire ngoku abya, kundi nibya n’abanywani biwe b’okwa ndungu mubathamuminyerera aho-n’aho. Maria Magdalene mwamulhangira nga y’omulimi w’eririma; kandi n’abigha babiri ababya bakaghenda e Emau, mubalhangira ni mundu oyo bathasi.—Luka 24:13-18; Yoane 20:1, 14, 15.

Thutholere ithwalhangira Yesu ya thuthi munabwire? Myaka nga 60, enyuma w’eriholha lya Yesu, omukwenda wa Yesu omwanzwa iya Yoane mwalhangira Yesu omwa syonzoli. Yoane mwathalhangira Yesu ini omundu oyunemuholera okwa musalaba. Aliwe, mwalhangira “Omwami w’abami n’Omukama w’abakama,” Omwami w’Obwami bwa Nyamuhanga, oyukisigha iniakinda esyonzighu sya Nyamuhanga, esyombinga n’abandu, n’erilethera abandu emighisa ya kera na kera.—Eribisulirwa 19:16; 21:3, 4.