Eriaghalhwa lyamabya isirililhua oku Nyamuhanga, neryo enzalha nene, obunakwa obuthehwa, esyonyuhi, amalhwere, n’ebitsinduli bikalhua hayi? Ekinywe kya Nyamuhanga, e Biblia, kikabisulha ebindu bisathu ebikalethera abandu b’eriaghalhwa:

1. Eriyitsomana, Omururu, n’Eriponangana. “Omundu mughuma awithe obuthoki endatha oko wundi erimuhuthalya.” (Omugambuli 8:9) Mughulhu mungyi abandu bakaghalhawa busana n’erikolhwa nabi n’abandu abathahikene, abayitsomene, kutse abatsurumi.

2. Ebikasa Kitsumbukirania. Abandu bakaghalhawa kundi “omughulhu n’embanga [ebikabya kitsumbukirania] bikahika oko bosi.” (Omugambuli 9:11) Omughulhu bakayisanga ahabi okwa ndambi nyibi, esyo akisidenti n’ebindi bindu bibi byangana bahikako.

3. Omuthabali Mubi w’Ekihugho Kino. E Biblia yikabisulha ndeke-ndeke oyukalethera abandu b’eriaghalhwa. Yikabugha yithi: “Ekihugho kyosi kiri omwa buthoki bw’omubi.” (1 Yoane 5:19) “Omubi” oyo ni Sitani Diabolo, ekihangikwa ky’ekirimu eky’amaaka, oyuwabya erimbere malaika wa Nyamuhanga aliwe amaghana erisighalha omo “mwatsi w’ekwenene.” (Yoane 8:44) Abandi bamalaika mubayiyunga oku Sitani n’eriyisamambulha oku Nyamuhanga nuku bangakwamirira esyongumbu syabu, neryo bamabya mbinga. (Enzuko 6:1-5) Eritsuka aho bakathayisamambulira, Sitani n’esyombinga siwe babirithabalha kutsibu oko myatsi y’ekihugho kino kandi omwa butsurumi. Eki ibbwa kyabiryongera kutsibu-tsibu omwa buthuku bwethu buno. Lino, Diabolo ahithene kutsibu kandi “yukatheba ekihugho kyosi,” ekindu ekya birilhwiririramu “obulighe okwa kihugho.” (Eribisulirwa 12:9, 12) Omo kwenene, Sitani ni muthabali mubi kutsibu. Akatsema kutsibu abandu bakaghalhwa. Ni Sitani—butsira Nyamuhanga—oyukaleka abandu ibaghalhwa.

THAKILENGEKANIAKO: Abandu babi ab’emithima eyikalire basa babangalethera abandu abathe kw’olhubanza b’eriaghalhwa. Mbaghane n’ekyo, e Biblia yikabugha yithi: “Nyamuhanga ni lhwanzo.” (1 Yoane 4:8) Erikwamana n’omubere w’olhwanzo oyu, “kibye haali oku Nyamuhanga erikolha ebibi, n’Omuthoki w’Ebyosi erihalya!”—Yobu 34:10.

Aliwe, ni kyabuhangiranwa eriyibulya, ‘Nyamuhanga akendi syalighira erithabalha libi lya Sitani erihika mughulhu wahi?’ Ngoku thwanabirilhangira, Nyamuhanga akapona obubi, kandi akayowa nabi thukaghalhwa. Ekinywe kiwe kikongera kithi: “Muhire erihanga-hangya lyenyu lyosi oku Nyamuhanga, kusangwa akabatheghaya.” (1 Petero 5:7) Nyamuhanga athwanzire kandi awithe amaaka aw’erighunzaho eriaghalhwa lyosi n’obuthe bulingirirania, ngoku omwatsi owakakwamako akendi soborera. *