LUZIA AKAHINIRA OMWA KUGHULHU KWIWE KW’AMALEMBE. Iniakine mulere, mwalhwalha epoliyo, obulhwere obukahamba emikyi. Abere ahikya myaka 16, omukali oyo Luzia abya akakolera mwamubwira athi, “Nyamuhanga mwakusuyira omwa bulhwere obu kundi wabya isiwulyowa n’erisikya mama wawu.” N’enyuma w’emyaka mingyi, Luzia akin’ibukire ngoku abya akayowa nabi.

DAMARIS ABERE AKAMINYA KW’ALHWERE EKANSA Y’OMWA BWONGO, thatha wiwe mwamubulya athi: “Wakolireki eki erikubyako? Wangabya iwabirikolha ekibi ekikalire. Ky’ekyalekire Nyamuhanga iniakusuyira.” Damaris mwayowa nabi kutsibu.

Ahabw’emyaka mingyi abandu babiribugha bathi obulhwere ni suyira erikalhua oku Nyamuhanga. Ekitabu Manners and Customs of Bible Lands kikabugha kithi abangyi omwa buthuku bwa Kristo ibikirirye bathi “obulhwere bukasa busana n’erilholho ly’oyulhwere, kutse ery’abahughu biwe, kandi bathi ni suyira busana n’erilholho eryo.” Omo myaka ey’ahakathi-kathi ka 500-1500 E.K, ekitabu Medieval Medicine and the Plague ikikabugha kithi, “abandi bandu ibikirirye bathi Nyamuhanga iniakabalethera ebihunzo busana n’amalholho wabu.” Neryo kwesi esyomiliyoni sy’abandu babere bakakwa omwa Bulaya busana n’ekihunzo omwa kighonye kye 14, mbwino Nyamuhanga abya iniakasuyira abandu ababi? Kutse kyabya kihunzo ekyasa busana n’obuhuka bulebe, ngoku abakasekulhaya okwa by’emibatsi bakabugha? Abandi bangana yibulya, Nyamuhanga akanakolesaya obulhwere erileka abandu baghalhawe busana n’amalholho wabu? *

THAKILENGEKANIAKO: Ni kyahi ekyangalekire Yesu inialhamya abandu ababya balhwere, amalhwere n’eriaghalhwa byamabya ini suyira lya Nyamuhanga? Aho isyendibya iniamaghania obulingirirania n’erithunganene lya Nyamuhanga? (Matayo 4:23, 24) Yesu syangaghania ebya Nyamuhanga. Mwabugha athi: “Ngakolha ebiro byosi emyatsi eyikamutsemesaya,” kandi “Ngoku Thatha anyihana, ko nga kolha nyithya.”​—Yoane 8:29; 14:31.

Ekya Biblia yikabugha kilhangirikire: Yehova Nyamuhanga ni w’obulingirirania. (Eryibuka Ebihano 32:4) Ng’eky’erileberyako, Nyamuhanga syanga leka endege yikabana ekitsibu, abandu bangyi abathe kw’omusango ibaholha, athi kundi akanza erisuyira omundu mulebe omo ndege eyo! Erikwamana n’obuthunganene bwa Nyamuhanga, Abrahamu, omughombe muthaleghulha wa Nyamuhanga, mwabugha athi Nyamuhanga syang’itha “abathunganene haghuma n’ababi.” Mwabugha athi “ekyo kibye haali.” (Enzuko 18:23, 25) E Biblia yikabugha yithi ‘Nyamuhanga syali kolha ebibi,’ syali ‘halhaya.’​—Yobu 34:10-12.

Eriaghalhwa eryo thukabana si suyira erilhua oku Nyamuhanga busana n’erilholho lirebe. Yesu mwakikangania ndeke-ndeke omughulhu iyo n’abigha biwe balhangira omulhume oyuwabuthawa mwa ndimethime. “Abigha biwe mubamubulya bathi, Mukangirirya, nindi oyuwakolha ebibi, omundu oyu akabuthwa mo ndimethime, n’iyo, kutse ababuthi biwe? Yesu mwasubirya athi, Omundu oyu mwathakolha ebibi kutse ababuthi biwe, nikwa abuthawa mo ndimethime, emibiiri ya Nyamuhanga yiminyikale omw’isi wiwe.”​—Yoane 9:1-3.

Erikwamana n’amabehi awabyaho, abigha ba Yesu bangabya imubasweka akababwira athi omulhume n’ababuthi biwe sibathakolha erilholho eryanga balethera ekitsibu ekyo. Yesu mwathasubulira okw’ilhamya endimethime lisa aliwe kandi omw’ikolha ekyo mwaghunzaho amabehi awabya akabugha athi eriaghalhwa  ni suyira erikalhua oku Nyamuhanga. (Yoane 9:6, 7) Abakaghalhawa omwa malhwere munabwire bangana bana erihumulikana busana n’eriminya ngoku Nyamuhanga yuthebaghalhaya.

Amasako akathukakasaya athi

• “Nyamuhanga syali thoka erilengwako n’ekibi, kandi syali lenga oku mundu.” (YAKOBO 1:13) Ni kwenene, “ebindu bibi” ebyo bandu babiribana ahabw’emyaka, imwamuli amalhwere, obulhumi, n’olhuholho, bikisiya ibyahwaho.

• Yesu Kristo “mwalhamya abosi ababya balhwere.” (MATAYO 8:16) Erilhamya abosi abamwasako, Mughalha wa Nyamuhanga mwakangania ekya Bwami bwa Nyamuhanga bukendi syakolha omwa kihugho kyosi.

• “Nikwa [Nyamuhanga] asyasangulha emisonia yosi oko meso wabu. Kandi olhuholho silhwendi syasabyaho, erisusumana kutse eririra, kutse eriaghalhwa. Emyatsi y’erimbere yabirilenga.”​—ERIBISULIRWA 21:3-5.

Neryo busana naki abandu bakabana obulhumi bunene n’eriaghalhwa? Abandu babiriyibulya ekibulyo ekyo habw’emyaka mingyi. Nyamuhanga amabya is’iyo, kwesi nindi oyukaleka ithwaghalhwa? Eby’erisubirya okwa bibulyo ebyo bikendi kanibwako omo mwatsi owakakwamako.