Esyodakika 60 esy’erimbere esya mwana akaghunza akanabuthwa ni buthuku bw’embaghane obw’erikolha mw’esyombinduka. Busana naki? Kundi ababire abakabya hakuhi-kuhi n’esyomekeke syabu okwa ndambi ey’embaghane eyo kikuwanaya kutsibu erikulha ly’omwana. *

Ni kyahi ekikaleka omubire iniabuya-buya olhumekeke lhukanabuthwa? Omwa The Journal of Perinatal Education, Profesa Jeannette Crenshaw akasoborera athi ehomoni eye oxytocin eyabiribya ahighulhu “yikongera eribuya-buya ly’omubire abiributha akahamba okwa lhumekeke lhwiwe, erilhusamalira, n’erilhwongya.” Eyindi homoni ey’omubiri eyikahulhuka okwa ndambi eyo “yikawathikaya omubire eritsomana omwana wiwe” kandi yikongera erikolongana liwe n’olhumekeke. Busana naki eki ni kikulhu?

Obughuma bw’ahakuhi-kuhi obukabya ahakathi-kathi ka mama n’omwana wiwe bwahirawaho n’Omuhangiki wethu w’olhwanzo, Yehova Nyamuhanga. * Omwami Dawudi mwabugha athi Nyamuhanga yuwaleka “iniabuthwa” n’erileka iniayowa ndeke mama wiwe akamubuya-buya. Mwasaba athi: “Nabiriyikethera iwe eritsuka ekiro nabuthawa; wuli Nyamuhanga waghe eritsuka omughulhu koyo anyibutha.”​—Esyonyimbo 22:9, 10.

THAKILENGEKANIAKO: Nyamuhanga amabya imwakolha endegheka eyikatha-kathenie ey’omubire eritsemera olhumekeke lhwiwe neryo inialhuha ebiyithawa byalho, si ky’amenge Nyamuhanga eribya nayu iniathutsomene, ithwe “baana ba Nyamuhanga”?​—Emibiri 17:29.

Yesu Kristo, oyuwasi Omuhangiki ya ndeke-ndeke kwilhaba owundi mundu wosi-wosi, mwabugha athi: “Ebiswiri bibiri sibyeghulibawa oko sengi nguma kwehi? Kandi sihali n’akaghuma akakathoghera ahisi lithe erisonda lya Thatha wenyu. Nikwa esyonzwiri sy’okwa mithwe yenyu sighanzire esyosi. Neryo simubahe, muli b’obughuli bunene kwilhaba obughuli bw’ebiswiri bingyi.”​—Matayo 10:29-31.

Ni bake omw’ithwe abakatsomana obuli kanyonyi ako bakalhangira, neryo sibanga tsomana ‘akaghuma kamathoghera ahisi.’ Aliwe Thatha wethu w’elhubulha akalhangira obuli kaghuma-kaghuma! Kandi esyonyonyi​—nibya n’esyonyonyi nyingyi​—syanga silhangira mwa sy’obughuli kwilhaba omundu. Neryo erisomo lilhangirikire: Siwutholere ‘wukubaha’ wuthi Nyamuhanga syakuleghene. Mbaghane n’ekyo, akutsomene kutsibu!

 Amasako akathukakasaya athi

• “Ameso w’Omwami Mukulhu akalebaya ehosi, erilhangira ababi n’ababuya.”​—EMISYO 15:3.

• “Ameso w’Omwami Mukulhu akathungerera abathunganene, kandi amathwe wiwe akowa erilhaka lyabu.”​—ESYONYIMBO 34:15.

• “Nasyatsema n’eritsanga omo bubuya bwawu bw’olhwanzo, kusangwa wukalhangira obulighe bwaghe, kandi wasi omunubo w’omuthima waghe.”​—ESYONYIMBO 31:7.

Mbwino kyangana hamba ndeke oko ngebe yethu thwamaminya ngoku Nyamuhanga anzire ithwabya ithune ndeke kandi ngoku akathusamalira omw’itsomana eriri mw’olhwanzo? Ee, erikwamana n’ebya Hannah, * owe England, akabugha, kyanganahamba okwa ngebe y’omundu.

“Ngendo nyingyi, iningayowa Yehova nga syanyanzire kandi emisabe yaghe nga siyirisubawamo. Iningalengekanaya indi obundi kundi ngawithe erikirirya like. Iningayowa nga ngasuyirawa kutse erithendi tsomanwa kundi isingwithe mughaso. Iningayowa Nyamuhanga nga syatsomene.”

Aliwe Hannah syakithika-thikira eky’eribya Yehova iniamutsomene n’erimwanza. Ni kyahi ekya hindulha eriyowa liwe? Akabugha athi “Syabya mbinduka esya lyolho-lyolho. Ng’ibuka omukania we Biblia owalhabibawa myaka mingyi enyuma owahambire okwa kihongwa kya Yesu owanyihambako kutsibu, kandi mwanyiwathikya erithasyanyikakasya ngoku Yehova anyanzire. Kandi emisabe yaghe yikabya yabirisubwamo, ngahutana n’ekiriro, kundi ngaminya ngoku naghe Yehova ananyanzire. Kandi, omw’iyeghesya e Biblia, n’erihindana okwa mihindano y’Ekikristayo, nabirigha bingyi oku Yehova, emibere yiwe, kandi ngoku akathulhangira. Neryo hathya ngalhangira ndeke-ndeke ngoku obuwathikya n’olhwanzo lhwa Yehova okw’ithwe bosi kandi anzire erithutsomana buli mundu ahabwiwe.”

Ebya Hannah akabugha bikahumulikanaya. Aliwe wanga kakasya wuthi ngoku Nyamuhanga akayitheghereraya n’eryibuka eriyowa lyawu? Omwatsi owakakwamako akendi subirya ekibulyo eki.