Nyamuhanga abirihangika emibiri yethu iyinawithe amaaka w’eriyilhamya. Omubiri amabya kw’ekironda, amaharuka, kutse amahuthalha, omubiri “akatsukiraho erikolha ebindu bingyi ebikwamangene ebikawathikaya omw’ilhamya ebironda ebike-bike n’ebinene-binene.” (Johns Hopkins Medicine) Aho n’aho omubiri akalhuaho iniayira eky’erikolha erimania erilhua mw’omusasi, erithandamulha emikyi eyikalhabaya omusasi, erisuba-subania ahali ekironda, n’erileka ekitsuko ekyo ikyaghuma.

THAKILENGEKANIAKO: Omuhangiki amabya imwanaha emibiri yethu y’amaaka w’erilhamya ebironda, mbwino sithwanga yikethera omulhaghe wiwe ow’erilhamya ebironda by’omuthima? Omuhandiki w’esyonyimbo mwahandika athi: “Akalhamaya ababbunikire omwa muthima, akasenga-senga ebironda byabu.” (Esyonyimbo 147:3) Wamabya iwukaghalhawa omwa muthima busana n’ebya walhabamu kera kutse lino, wangabya wuthi n’erikakasya ngoku Yehova akendi senga-senga ebironda byawu lino n’omwa buthuku obukasa?

Nyamuhanga akalhaghanisaya athi: “Siwubahe, kusangwa indi haghuma nawu. Siwusamalire handi n’erisweka, kusangwa indi Nyamuhanga wawu. Ngendi kuha amaaka, kwenene ngendi kuwathikya, kwenene ngendi kuwathirira omo byalha bya mali by’erithunganene lyaghe.” (Isaya 41:10) Omundu oyunasi ngoku Nyamuhanga amutsomene akabya n’obulengekania obuthekene n’akaghalha k’erighumira ebitsibu muthina-muthina. Omukwenda Paulo mwahulha erithekana omwa muthima eri mwa “obuholho bwa Nyamuhanga, obulhabire amenge wosi.” Paulo mwongerako athi: “Nyithokire erikolha ebyosi busana n’amaaka wa [Nyamuhanga] oyukanyithokesaya.”—Abanya Filipi 4:4-7, 9, 13.

Amasako akathuwathikaya eribya n’erikirirya omwa milhaghe ya Yehova ey’obuthuku obukasa busana n’abandu. Ng’eky’erileberyako, Eribisulirwa 21:4, 5 hakathubwira ekya Yehova akendi syakolha kandi n’ekyangaleka ithwayikethera thuthi akendi syakikolha:

• “Asyasangulha emisonia yosi” okwa meso w’abandu. Yehova akendi ghunzaho eriaghalhwa n’erihangya-hangya lyethu lyosi, nibya n’ebikathulyambaya eby’abandi banganaghana eritsomana.

• ‘Inian’ikere okwa kithumbi ky’obwami’ omwa lhukengerwa lhw’elhubulha, Omwami Omuthoki w’Ebyosi ow’ebihangwa byosi akendi syakolesya obuthoki n’amaaka wiwe erighunzaho eriaghalhwa n’erithuha obuwathikya obwa thukayithagha.

• Yehova akakakasaya athi emilhaghe yiwe ni ‘y’eriyikethera n’ey’ekwenene.’ Ni bugha ambu akakolesaya ekitsumbi kiwe iyo nga Nyamuhanga w’ekwenene eriberererya emilhaghe yiwe.

“‘Asyasangulha emisoni okwa meso wabu. kandi olhuholho silhwendisyaswabyaho, erisusumana kutse eririra kutse eriaghalhwa. Emyatsi y’erimbere yabirilenga. N’oyo wikere okwa kithumbi ky’Obwami mwabugha athi, lebaya! Lino ngayira emyatsi yosi mo mihya-mihya.’ Neryo mwabugha athi, ‘Wusake, ebi kusangwa ebinywe ebi ni by’eriyikethera n’eby’ekwenene.”—Eribisulirwa 21:4, 5.

Ebihangikwa ne Biblia bikabisulha emibere ya Thatha wethu w’elhubulha. Ebihangikwa ibyo bikathubwira omwa nzira eyibisamire ku thutholere ithwaminya Nyamuhanga ng’omunywani w’ahakuhi, e Biblia iyo yikalhuaho iyathubisulirakyo yikabugha yithi: “Muyithunde hakuhi na Nyamuhanga, nayu akendiyithunda hakuhi nenyu.” (Yakobo 4:8) Emibiri 17:27 hathi: “Nyamuhanga syali haali okw’ithwe.”

Wunemwongera eriminya Nyamuhanga, wukendiongera erikakasya ndeke-ndeke ngoku ‘akakutheghaya.’ (1 Petero 5:7) Hali mughaso wahi w’eribya n’eriyikethera ng’eryo omu Yehova?

Thuthakania okwa ky’erileberyako kya Toru, owe Japani. Akulibawa na mama wiwe Omukrisitayo, aliwe mwingira omwa gurupu y’abatsibu n’abatsindi ey’abayakuza, ey’ebikora-mahwa e Japan. Akabugha athi, “Ing’ikirirye indi Nyamuhanga anyiponire, kandi iningalhangira olhuholho kutsibu-tsibu olhw’abanganzire, ng’enzira y’erinyisuyira.” Toru akabugha athi eribya omwa kathi-kathi k’abawithe amalengekania w’obutsandya, mukyaleka iniabya “mundu oyuthawithe muthima n’oyuthekwa bulighe.” Ak’ibuka ekilhubirirwa kino eky’abya awithe, “Nabya nganzire ingaholha ingakine mulere aliwe inabir’itha omundu oyuwasibwe kwilhaba ingye neryo ingabya inamabiriyikolera erina.”

Aliwe, omughulhu Toru na mukali wiwe Hannah, bigha e Biblia, Toru mwakolha esyombinduka esikalha-kalire omwa  ngebe n’omwa malengekania wiwe. Hannah akabugha athi: “Mwira waghe mwakolha esyombinduka inganasamalire.” Lino, Toru akabugha inianakakasirye athi: “Hane Nyamuhanga oyukatsomana obuli mundu. Syanzire n’omughuma akaholha, kandi anayitheghekire erighanyira abakayisubamu omo kwenene. Akahulikirira ebya thuthe thwangabwira owundi mundu aliwe iyo musa, nibya n’emyatsi eyo owundi wosi-wosi athe angayitheghererya. Lino-lino, Yehova akendi ghunzaho ebitsibu byosi, eriaghalhwa, n’erinuba eryosi. Nibya na lino akathuwathikaya omwa syonzira esyo thuthalengekenie. Akathutsomana n’erithuwathikya.”—Esyonyimbo 136:23.

Ngoku eky’erileberyako kya Toru kikakanganaya, eriminya ngoku Nyamuhanga angana—kandi akisiya—iniaghunzaho ebitsibu n’erithusangulha emisoni sikirithuha amaha w’obuthuku obukasa lisa aliwe kandi kikathuwathikaya eribya n’engebe eyuwene lino. Ni kwenene, nibya n’omwa kihugho ekyoswire mw’eriaghalhwa, wanganaghasirwa omw’itsomana lya Nyamuhanga.