Thalengekania okwa bughuma bw’ahakuhi obwa bandu bangabya nabu​—obwa bahasa abalhuire omwa liya lighuma. Bakathunga obughuma bw’ahakuhi-kuhi kutsibu. Omusondoli iya Nancy Segal omukulhu ow’ah’erisoma okwa bahasa (Twin Studies Center), nayu omuhasa, akabugha athi abandi bahasa nibya ‘bangana kanirania kandi ibayitheghererania ndeke-ndeke ahathe erisoborera.’ Omukali mughuma mwasoborera obunywani obuli ahakathi-kathi kiwe n’omuhasa oyo balhuire nayu omwa liya lighuma athi: “Ithwe owundi akabya inianasi obuli kindu ekihambire okwa wundi.”

Ni kyahi ekikaleka ihabya eriyitheghererania ly’embaghane eri? Erisekulya likakanganaya lithi nomwakine indi emibere eya bakakuliramu n’emilemberere y’ababuthi bikanaleka ikyabya kithya, aliwe kutsibu-tsibu ikyanganabya ini busana n’erisosana omwa mikwikire yabu eyiri omwa mubiri.

THAKILENGEKANIAKO: Omuhangiki oyuwakolha emikolere y’omubiri eyikaswekaya ng’eyi, ahathe erithika-thika asi ndeke-ndeke emikwikire y’obuli mughuma w’okwithwe. Ky’ekyaleka omuhandiki w’esyonyimbo Dawudi iniabugha athi: “Mowanyitsutsikania omwa kisuko kya koyo. Muwalhangira amakuha waghe akatsutsikanibwa. . . . Muwanyilholhako isindinabuthwa. . . . Ebyosi ibyabirisakwa omwa kitabu kyawu.” (Esyonyimbo 139:13, 15, 16) Nyamuhanga musa yuwasi kandi yuwanga yitheghererya ndeke butsira emikwikire yethu misa aliwe n’ebyabiribya omwa ngebe ebikaleka ithwabya n’emibere eyo thuwithe. Nyamuhanga eribya iyuwuthwasi ndeke n’emikwikire yethu kikaleka ithwakakasya ngoku akathuyitheghereraya omwa buli mwatsi.

Dawudi mwasaba athi: “Iwe Mwami Mukulhu, wabirinyirengako, kandi wunanyasi. Wunasi ebyosi ebya ngakolha; er’ikalha lyaghe, n’erihangana lyaghe. Nomwawune haali, wukaminya amalengekania waghe wosi. Embere indenabugha, Iwe Mwami Mukulhu, wunasi ebyo ngendi bugha.” (Esyonyimbo 139:1, 2, 4) Eryongera okw’ekyo, Yehova anasi eriyowa lyethu ery’omwa kathi kutsibu nibya akaminya “amaghaniryo wosi w’obulengekania.” (1 Emyatsi y’Emigulu 28:9; 1 Samweli 16:6, 7) Emilhondo eyi yikathubwiraki oku Nyamuhanga?

Nomwakine indi thwanganaghana eribugha ebya thukalengekanaya n’eriyowa lyethu omwa musabe ow’akowika, Omuhangiki wethu syalisubulira okw’ithungerera ekya thukakolha aliwe akayitheghereraya ekikaleka ithwakikolha. Kandi nibya, anasi ekibuya ekyo thwanzire erikolha, nomwakine indi erilemererwa lyethu lyanganakakirya eriyisunza ly’omuthima wethu. Ahathe erithika-thika, Nyamuhanga eribya imwahira omwa mithima yethu mw’olhwanzo, kikakanganaya kw’anzire​—n’amani manene​—erisamalira n’eriyitheghererya amalengekania n’ebilhubirirwa byethu.​—1 Yoane 4:7-10.

 Amasako akathukakasaya athi

• “Ameso w’Omwami Mukulhu akathungerera abathunganene, kandi amathwe wiwe akowa erisaba lyabo.”​—1 PETERO 3:12.

• Nyamuhanga akalhagha athi: “Nasyakukangirirya enzira wangalhabamo; nasyakuhana n’erikweghesya.”​—ESYONYIMBO 32:8.

Mbwino eriminya ngoku Nyamuhanga akayitheghereraya emibere eyo thulimu n’eriyowa lyethu kyangana thuwathikya erighumira ebitsibu? Thalengekania okwa ky’erileberyako kya Anna, owe Nigeria. Akabugha athi: “Iningabulha nga nyinatholere n’eribyaho busana n’ebitsibu ebyabya binyithimbireko. Ingali mukwakali kandi nabya ngathwanira mwali waghe oyuwabya omwa sipatara busana n’obulhwere obw’eribya n’amaghetse manene omwa bwongo (hydrocephalus), bakanyibana mw’ekansa y’omw’ibere neryo namabya ingatholere erisemezibwa, erinyiha emibatsi n’erithimya ehihuka hy’ekansa. Mukyanyikalira kutsibu ingye eribya mulhwere omwa sipatara haghuma na mwali waghe omulhwere.”

Ni kyahi ekya wathikaya Anna erighuma? Akabugha athi: “Munaghanirya okwa masako ng’erya Abanya Filipi 4:6, 7, ahakabugha hathi ‘obuholho bwa Nyamuhanga, obulhabire amenge wosi, bwasyatheya emithima yenyu n’amaghanirya wenyu.’ Erisako eri irikabya likasa omwa bulengekania, iningayowa ingali hakuhi-kuhi na Yehova, inaminya kw’akanyiyitheghereraya kwilhaba ingye ingyuwene-wene. Kandi balikyethu omwa kithunga mubanyihimba kutsibu.

“Nomwakine indi ngakine mutseke omwa maghalha, emibere eyo thulimu ingye na mwali waghe yabiribya nga yikuwana. Kundi Yehova ane okwa lhuhandi lhwethu, thwabirigha erithendi handabuka thukabana ebitsibu. Yakobo 5:11 hakathukakasaya hathi: ‘Thukaghanza abayiyinaya mo bandu b’obutseme. Mwabiriowa eriyiyinia lya Yobu, kandi mwabirilhangira ebyo Mukama asalha amukolera. Kusangwa Omukama ni w’erighanyira kutsibu, kandi akaghanyira abandu.’” Yehova abya inianasi ndeke-ndeke emibere Yobu abyamu, nethu thwangana yikethera ndeke-ndeke ngoku akayitheghereraya ebitsibu byosi-byosi ebyo thukalhabamo.