Erikwa obulighe ni “maaka w’eriyihira omwa kisuku ky’owundi kutse eby’akalhabamu omw’ithera akasasani nga kyangabya kithi wamabya in’iwe wuli omwa mibere eyo mundu oyo alimu.” Oyusomire eby’obwongo iya Dr.  Rick Hanson, akabugha athi “thukabuthawa n’omubere w’erikwira abandi b’obulighe.”

THAKILENGEKANIAKO: Busana naki ithwabya n’omubere w’erikwira abandi b’obulighe, omubere owathe omwa bindi bihangikwa? E Biblia yikabugha yithi Nyamuhanga mwahangika abandu omwa kisosekanio kiwe. (Enzuko 1:26) Thuhangikirwe omwa kisosekanio kya Nyamuhanga neryo ithwangana gherererya emibere yiwe n’erikanganiayo. Busana n’ekyo, omubere oyu akabya akasukuma abandu abatsomene eriwathikya abandi, bakabya ibakakanganaya omubere w’erikwira abandi b’obulighe owa Muhangiki wabu, Yehova, Nyamuhanga ow’olhukeri.​—Emisyo 14:31.

Nyamuhanga akathukwira obulighe kandi akapona akalhangira thukaghalhwa. Okwa bandu be Israeli eya kera, abaghumira obukobe obukalire e Misiri, kwa makwama n’emyaka 40 ey’erinuba omwa mbwarara, e Biblia yikabugha yithi: “Omwa malighe wabu wosi nayu mwaghalhwa.” (Isaya 63:9) Hano Nyamuhanga mwathasubulira okw’iminya eriaghalhwa lyabu. Nayu mwaghalhwa. Mwabugha athi, “Nyinasi amalighe wabu.” (Eriluayo 3:7) Nyamuhanga athi, ‘Oyukabathulhako akathulha okwa kalhangira k’eriso lyaghe.’ (Zekaria 2:8) Abandi bamathukolha nabi, nayu akayowa nabi.

E Biblia yikathukakasaya yithi nomuthwanga yitsweba n’eriyowa nga sithutholere Nyamuhanga erithukwira obulighe, “Nyamuhanga . . . alengire emithima yethu kandi asi emyatsi yosi.” (1 Yoane 3:19, 20) Nyamuhanga athwasi ndeke kwilhaba ku thuyasi. Anasi ndeke emibere yosi eya thulimu, amalengekania, n’eriyowa lyethu. Akathukwira obulighe.

 Amasako akathukakasaya athi

• “Neryo wasyabirikira, n’Omwami Mukulhu asyakw’ithaba. Wasyalhaka nayu asyabugha athi, nandi hano.”​—ISAYA 58:9.

• “Kusangwa Omwami Mukulhu athi, nyinasi amalengekania agho ngalengekanaya busana nenyu, amalengekania w’obuholho, si w’ekibi, n’eribaha amaha okwa biro byenyu ebikasa. Kandi mwasyanyilhakira, kandi mwasyasa n’erinyisaba, naghe nasyabahulikirira.”​—YEREMIA 29:11, 12.

• “Wabirisaka emighanzo y’emisoni yaghe. Siyisakire omwa kitabu kyawu kwehi?”​—ESYONYIMBO 56:8.

Mbwino eriminya ngoku Nyamuhanga akathukwira obulighe kyangana thuwathikya erirwanisya ebitsibu? Thalebya eky’erileberyako kya Maria:

“Obulhumi bunene bw’eriholerwa mughalha waghe ow’emyaka 18 oyuwaghunza myaka ibiri inianalhwere ekansa mubwaleka ingayowa engebe iyikalire kandi isimuli bulingirirania. Munahithana oku Yehova busana n’erithendi kakiryayo n’erimulhamya!

“Enyuma w’emyaka mukagha, munywani waghe omwa kithunga oyuwithe olhwanzo n’olhukeri mwanyihulikirira ingamubwira indi ngayowa Yehova isyanyanzire. Enyuma w’esyosaha nyingyi iniananyihulikirire isyathanyibughiramu, mwanyibwira omulhondo owanyihumulikanaya. Omulhondo oyu ni 1 Yoane 3:19, 20, owakabugha athi: ‘Nyamuhanga alengire emithima yethu kandi asi emyatsi yosi.’ Mwasoborera athi Yehova akayitheghereraya eriaghalhwa lyethu.

“Nomubyanabya bithya, mukyanyikalira eriyilhusya mw’ekinigha! Neryo munasoma Esyonyimbo 94:19, ahakabugha hathi: ‘Omughulhu ngahandabuka n’erikwa engitsi, wukanyisibikaya, n’erinyitsemesya.’ Munayowa amasako aya ngabanyihandikiragho! Erighunzerera munathekana namathoka eribwira Yehova y’amalighe waghe, inganasi kw’akendi nyihulikirira n’erinyiyitheghererya.”

Ka kikahumulikanaya eriminya ngoku Nyamuhanga akathuyitheghereraya n’erithukwira obulighe! Aliwe ibbwa, busana naki hali eriaghalhwa lingyi? Mbwino Nyamuhanga akathusuyira busana n’erikolha ebibi? Mbwino Nyamuhanga anemwendisyayira eky’akakolha erighunzaho eriaghalhwa eryosi? Ebibulyo ebi bikendi kanibwako omo mwatsi owakakwamako.