“Iwe Mwami Mukulhu, nasyakolyahi ngalira busana n’eriwathikibwa, nawu siwulisonda eriowa kwehi? Busana naki wukaleka inalhangira ebibi, n’erisamalira obubi kwehi?” (Habakuki 1:2, 3) Ebi ni binywe bya Habakuki, omulhume mubuya oyo wabya asimirwe omwa meso wa Nyamuhanga. Mbwino ebinywe biwe mubyakangania indi syawithe erikirirya? Eyihi nahake! Nyamuhanga mwakakasya Habakuki athi hane omughulhu ogho abirithegheka erighunzaho eriaghalhwa.—Habakuki 2:2, 3.

Iwe kutse omunywani amabya iniali omw’ighalhwa, ni kyolho eribugha wuthi Nyamuhanga syathanguhya, angabere iniabirighunzaho ekitsibu. Aliwe e Biblia yikathukakasaya yithi: “Nikwa Omukama syalimalha busana n’erilhagha liwe ng’abandi ku bakaghaniraya. Nikwa akayitsingirira busana nenyu, isyanzire omundu n’omughuma akahera, nikwa anzire abandu bosi ibabindulha emithima yabu n’erileka ebibi.”—2 Petero 3:9.

Omwa buthuku obuthe bwa hali! Yesu mwabugha athi olhulengo lhulebe lhukendi syalhangira emibere eyikendi syakangania ebiro by’enyuma-nyuma eby’erihwererera “ly’emighulhu.” (Matayo 24:3-42) Eribererera ly’obuminyereri bwa Yesu omwa biro byethu bino likakanganaya ngoku Nyamuhanga akisiya iniaghunzaho eriaghalhwa ly’abandu. *

Aliwe Nyamuhanga akendi syaghunzaho athi eriaghalhwa lyosi? Omughulhu Yesu abya okwa kihugho, mwakangania amaaka wa Nyamuhanga aw’erighunzaho eriaghalhwa ly’abandu. Thuthalebya eby’erileberyako.

Ebitsinduli: Yesu n’abakwenda biwe babere bane omo bwathu okwa Ngetse ye Galilaya, erihunga linene kutsibu mulyanza eridikirya obwathu bwabu. Aliwe Yesu mwakangania ngoku iyo na Thatha wiwe bangana sondolha eby’obuhangwa. (Abanya Kolosai 1:15, 16) Yesu mwakwama kya bugha athi: “Huna, wubye bukuthu!” Ni kyahi ekyabya kyabere? “Ekihunga mukyumbya, muhahitha esisyerere.”—Mariko 4:35-39.

Amalhwere: Yesu abya asibwe ng’oyuwithe amaaka w’erilhamya esyondimethime n’ebirema, kuthya n’ababya bakwire ebithutsa, ebihagha, kutse n’awandi malhwere. “Yesu mwalhamya abosi.”—Matayo 4:23, 24; 8:16; 11:2-5.

Enzalha: Yesu mwakolesya amaaka agho Thatha wiwe amuha erikanyia n’ebyalya bike. E Biblia yikabugha yithi ngendu ibiri omw’ithulira liwe mwalisya abandu bangyi.—Matayo 14:14-21; 15:32-38.

Olhuholho: Emirundi isathu y’erilhubukya abandu eya Yesu akolha yikakanganaya ndeke-ndeke ngoku Yehova awithe amaaka w’erighunzaho olhuholho. Omughuma w’okwa abalhubukaya abya iniamabirighunza biro bbini inianaholire.—Mariko 5:35-42; Luka 7:11-16; Yoane 11:3-44.