HAMABYA EKITSIBU, WUKANAYIBULHAYA WUTHI, ‘NYAMUHANGA ALHUE HAYI?’ KUTSE OMWA NGEBE YAWU, WANABIRIBANA EKITSIBU EKYALEKA IWAYIBULYA NYAMUHANGA NG’ANAKUTSOMENE?

Obundi wukayowa nga Sheila, owe Amerika. Eribya iniakulire omw’eka eyihambire edini ya kutsibu, akabugha athi: “Eritsuka bulere, inganzire Nyamuhanga kundi ya Muhangiki wethu. Aliwe iningayowa nga si munywani. Iningalengekanaya indi akanyisamalira iniane haali. Isindiyowa indi Nyamuhanga anyiponire, aliwe kandi isindikiriraya indi anyitsomene.” Ni kyahi ekyaleka Sheila iniayowa Nyamuhanga nga syamwanzire? Akabugha athi: “Eka yethu muyabana ebitsibu ekindi omwa kindi, kandi Nyamuhanga mwabya nga syalithuwathikaya nahake.”

Nga Sheila, wanganabya iwun’ikirirye wuthi hane Nyamuhanga Omuthoki w’Ebyosi. Aliwe iwanganabulha kwenene ng’anakutsomene. Omulhume muthunganene Yobu, oyuwabya ikirirye ngoku Omuhangiki awithe amaaka n’amenge, nayu mwanayowa athya. (Yobu 2:3; 9:4) Yobu abere abiribana ebitsibu ekindi omwa kindi​—isyakiwithe amaha​—mwabulya Nyamuhanga athi: “Busana naki wukabisa obusu bwawu, wukanyighanza mo nzighu yawu kwehi?”​—Yobu 13:24.

E Biblia yikabugha yithiki? Ekitsibu kyamabya, mbwino kikabya ikikalhua oku Nyamuhanga? Hane ekikakanganaya ngoku Nyamuhanga atsomene abandu bosi n’obuli mundu ahabwiwe? Obuli mundu ahabwiwe, mbwino anganaminya Nyamuhanga ng’anathulholire, ng’akanathuyitheghereraya, erithukwira obulighe, kutse erithuwathikya omwa bitsibu?

Omo myatsi eyikakwamako, thukendi lebya ekya bihangikwa bikathweghesaya okw’itsomana lya Nyamuhanga. (Abanya Roma 1:20) Neryo, thukendi minya ekya Biblia yikabisulha okw’itsomana lya Nyamuhanga. Wukendibya wukongera erimuminya erilhabira omwa bihangikwa biwe n’Ekinywe kiwe, wukendi ongera erikakasya ngoku ‘akakutheghaya.’​—1 Yoane 2:3; 1 Petero 5:7.