Nyamuhanga mwabwira Adamu athi “Okwa kiro wasyalya kubyo wasyaholha kundu.” (Enzuko 2:17) Adamu kw’abya iniahangikawa ini w’erikekelhuha n’eriholha, isyanga hebirwe ekihano eki. Adamu abya inianasi ngoku amathendirya okwa muthi isyendi syaholha.

Sibugha indi Adamu na Eva erithoka eribana eky’erirya babya batholere ibalya okwa muthi oyo​—omw’irima mwabya imune eyindi mithi mingyi ey’ebighuma . (Enzuko 2:9) Omulhume n’omukali ab’erimbere ku bathalya okwa muthi, bangakanganirye ku bakowa Oyuwabaha engebe. Kandi kyanga kanganirye ku bakaligha ngoku Nyamuhanga yutholere eribasondolha.

Eriminya ekyaleka Adamu na Eva ibaholha, thutholere ithwalebya erikanirania eryabirithuhambako ithwe bosi. Sitani Diabolo mwakolesya enzoka eribugha amabehi awakalire. E Biblia yikabugha yithi: “Nikwa enzoka yabya n’amenge kwilhaba esyonyama syosi sy’omoli esyo Mwami Mukulhu Nyamuhanga abya iniabirihangika. Neryo muyabugha n’omukali yithi: ‘Egha, ko Nyamuhanga abiribugha athi, simusyerya oko mithi yosi y’eririma kwehi?’”​—Enzuko 3:1.

Eva mwasubirya athi: “Thwanganalya oko bighuma by’emithi y’omwirima, nikwa okwa bighuma by’omuthi owali omwakathi-kathi k’eririma, Nyamuhanga abiribugha athi: ‘Simusyerya kubyo, kutse simusyethulha kugho, mukasyaholha.’” Sitani muyabugha nayu yithi: “Simwendi syaholha nahake. Kusangwa Nyamuhanga anasi ekiro mwasyalya kubyo, ameso wenyu asyalibulhwa, kandi kumwasyabya nga Nyamuhanga, imwabya n’eriminya ekibuya n’ekibi.” Aho Sitani mwabya iniamabugha athi Yehova ni mubehi oyuthabya anzire ababuthi bethu b’erimbere bakathunga ekindu ekyuwene.​—Enzuko 3:2-5.

Eva mwaligha ebyo owa. Mwasamalira omuthi. Abya uwene n’eritsemesya! Mwaseghera hakuhi, amakotholha okwa bighuma, n’eritsuka erikirya. Neryo e Biblia yikabugha yithi: “Mwahakyo iba wiwe, nayu mwalyakyo.”​—Enzuko 3:6.

Ka kyangabya imukyaponesya Nyamuhanga akalhangira abaana biwe banzwa bakaghana erimwowa omw’ikighenderera! Mwakolhaki? Yehova mwabwira Adamu athi: “Wasyasuba okwa kithaka, kusangwa walhusibawa omwa lhuthuthu na kandi wuli lhuthuthu, na kandi wasyasuba omwa lhuthuthu.” (Enzuko 3:17-19) Busana n’ekyo, “ebiro byosi bya Adamu abyaho byabya emyaka maghana  mwenda n’amakumi asathu, neryo mwaholha.” (Enzuko 5:5) Adamu mwathaghenda elhubulha kutse erighenda omwa bw’ikalho bulebe obw’emirimu. Adamu syabya awithe ah’ali, Yehova abere athaliamuhangika. Neryo abere abiriholha, mwasuba lhuthuthu olho ahangikawamo. Mwabya isyakiriho. Eki ni ky’obulighe!

Busana n’obuthowa bwabu, Adamu na Eva mubaherya erihikana lyabu n’amaha w’eribyaho kera na kera. Mubahinduka kinyamubiri; bamabya isibakihikene n’eribya b’ekibi. Aliwe erilholho lyabu ery’obuthowa mulyahamba n’okwa bandi. Mubasighalirya abaana babu ekibi. Abanya Roma 5:12 hathi: “Neryo ebibi mubyahika munakihugho busana n’omundu mughuma [Adamu], n’olhuholho mulhwingira busana n’ekibi kiwe, neryo lithya olhuholho mulhwahika oko bandu bosi, kusangwa abosi mubakolha ebibi.”

E Biblia yikakanaya okwa kibi n’olhuholho nga “ekiswiko akikaswika ebihanda byosi, n’ekisukuliryo ekyasesawa endatha w’ebihanda byosi.” (Isaya 25:7) Ekiswiko eki kikaswika abandu ng’olhuhohe olhw’akabi olhwa wuthewangayihamo. Ahathe erithika-thika, “abandu bosi ba Adamu bakaholha.” (1 Abanya Korinto 15:22) Ngoku omukwenda Paulo anabugha, “Nindi wasyanyiboholha okwa mubiri oyu w’olhuholho kwehi?” Mbwino hane owosi-wosi?​—Abanya Roma 7:24.