THATHERA akasasani iwunemulebya efilimu eyihambire okwa mundu oyuwasibwe kutsibu, obundi omwimbi oyo wanzire. Yikatsuka omw’ikangania obulere bwiwe ak’igha eby’omuziki n’eriyibegheresya ngendo nyingyi. Neryo iwamulhangira omwa syokosati ak’imba, akaghenda omwa bihugho bingyi n’eriminywa omwa kihugho kyosi. Aliwe wunemulebya, efilimu iyamukangania iniamabirikulha, n’erighuzerera efilimu yikahwamo​—iniaholha.

Eby’omwa filimu eyi si lhughano buyira, bihambire okwa mundu oyuwanabyaho aliwe abiriholha. Mbulha abya mwimbi, munya sayansi, ow’eby’amasatha, kutse owundi mundu oyuwasibwe, omwatsi iniakendibya iwan’oyo. Omundu oyo anganabya iniabirikolha bingyi, aliwe thalengekania ng’angakolire bingahi kw’athakulha n’eriholha.

Eky’obulighe, ithwe bosi si lhuthubalire. (Omugambuli 9:5) Nomuthwanga lengaho thuthi, erighunzerera thukakekelhuha, ithwaholha. Kutse, ithwanganaholera omwa aksidenti kutse ithwangana holha busana n’obulhwere. Ngoku kiri omwa Biblia, thuli ng’olhuhohe olhukabanika omwa ngyakya “kathambi kake, neryo ilhwabulirayo.”​—Yakobo 4:14.

Busana n’eribya ithunasi ku thwangana holha, abandi babirithunga amalengekania awa “thulye, thupulhaye, kusangwa omo ngyakya thwasyaholha.” (1 Abanya Korinto 15:32) Mbwino si kwenene indi abandu eribya n’amalengekania ng’aya n’iligha ngoku thuli b’eriholha. Hanganayira​—ng’omughulhu wuli omwa mibere eyikalire​—iwayibulya, ‘Mbwino eno nyisa yana ngebe thuwithe?’ Eky’erisubirya wangakibana hayi?

Abangyi bakalengekaniraya omwa sayansi. Engulha-kulhana omwa by’esayansi n’emithambirire byabirileka emyaka eyo bandu batholere ibaghunza iyathasyongera. N’abandi banya sayansi banemukolha kutsibu eryongerayo kwilhaba naho. Bathokire-sibathathoka hakasighalha ihane ebibulyo bino: Busana naki thukakekelhuha n’eriholha? Mbwino hane amaha aw’erikinda enzighu yethu, olhuholho? Emyatsi eyikakwamako yikendi soborera ebibulyo ebi n’erisubirya ekibulyo: Mbwino eno nyisa yana ngebe thuwithe?