Lengaho Eribana Etseme n’Omwa Ngebe Eya Munabwire
NAWU wanganabya n’engebe eyuwene eyithemo obulhumi obukasa busana n’amalhwere, erikekelhuha, n’olhuholho! Nomwakine indi engebe yoswire mw’emilyambo n’ebitsibu. Ni kyahi ekyanga kuwathikya eribana etseme n’omwa ngebe eya munabwire? E Biblia yangana kuwathikya eribya n’engebe eyiri mw’etseme n’eyithekene lino. Thulebaye ebighuma by’okwa bitsibu ebya thwangana bana omwa ngebe kandi e Biblia nga yanga thuwathikya yithi.
TSEMERA EBYA WUWITHE
Erihabulha lye Biblia: “Simukwamirire erianza esyofranka, nikwa mutsemere ebyo muwithe.”—Abaebrania 13:5.
Munabwire hali bindu bingyi ebyo abandu bakabugha bathi thutholere ithwathunga. Aliwe e Biblia yikabugha yithi “mutsemere ebyo muwithe.” Thuthi?
Yitheghaye ‘okw’anza ebindu’ kutse esyosente. Abandu ibangana ghalha-ghandya amaghalha wabu, eka, obunywani, eby’esyongeso, nibya n’ekitsumbi kyabu—ebyosi ebi, busana n’erithanza esyosente. (1 Timoteo 6:10) Aliwe eki kikabya isikitholere! Kundi oyuwanzire esyosente “syendisyughuthibwa.”—Omugambuli 5:10.
Lhangira abandu mwa b’obughuli, butsira ebindu. Ni kwenene, ebindu by’ekinyamubiri binawithe omughaso. Nomwakine, ebindu sibyanga thwanza kutse erithusima; abandu basa babanga kolha ekyo. Eribya n’abanywani ab’okwenene kyangana thuwathikaya eritsemera ebyo thuwithe.—Emisyo 17:17.
THWANGANABANA ETSEME N’OMWA NGEBE EYA MUNABWIRE THWAMAGHENDERA OKWA BUSONDOLI BWE BIBLIA
ERIGHUMIRA OBULHWERE
Erihabulha lye Biblia: “Omuthima w’eritsema ni busaki bowene.”—Emisyo 17:22.
‘Ng’obusaki bowene’ kutse omubatsi owuwene, etseme yangana thuwathikya erighumira obulhwere. Aliwe thwanga tsema thuthi ithunalhwere?
Wubye oyukasima. Thwamabera erilengekania okwa bitsibu byethu, “ebiro byosi” ibikendibya bibi. (Emisyo 15:15) Omwakanya k’ekyo, e Biblia yikabugha yithi “mubye bandu b’ewasingya.” (Abanya Kolosai 3:15) Wighe erisima ebibuya ebya wukabana omwa ngebe, nomubyangabya bike. Erilhangira eryuba likalenga, akahehero akuwene, erisenyenya ly’oyo wanzire—ni bindu ebyanguwania engebe yethu.
Kolera abandi. Amaghalha wethu nomwangabya isyuwene, “erihithya likaletha obutseme kwilhaba erihebwa.” (Emibiri 20:35) Abandu bakabya bakathusima busana n’ebya thukakolha, thukatsema kutsibu neryo ithuthalengekania kutsibu okwa bitsibu byethu. Thwangan’uwania engebe yethu omw’iwathikya abandi eryuwania engebe yabu.
ERIGHUMYA OBUTHEKE
Erihabulha lye Biblia: ‘Musime ebibuya.’—Abanya Filipi 1:10.
Abathahenie abathe ghunza buthuku haghuma banganayisanga ibabirisegheranako haali. Omulhume na mukali wiwe batholere ibalhangira obutheke bwabu ng’ekighuma ky’okwa “bibuya” omwa ngebe kutse eky’okwa bikulhu kutsibu.
Mukole ebindu byo haghuma. Omwakanya k’eritsomana ebyawu bisa, busana naki imuthathegheka erikolera ebindu bya haghuma? Muthegheke erikolha ebindu byo haghuma. E Biblia yithi: “Ababiri buwene kwilhaba omughuma.” (Omugambuli 4:9) Imune haghuma, mwangana tsumba, erikolha ebisasaizi, imwathunga ak’erinywa imunahumulikene, kutse erikolha ehindi hindu.
Kanganaya kuwanzire omwanze wawu. E Biblia yikahira omwa bathahenie mw’omuhwa w’erianzana n’erisikania. (Abanya Efeso 5:28, 33) Erisenyenya, eribuya-buyana omwa lhwanzo, n’erihererania ehihembo byangana ghumya obutheke. Aliwe isithwabirirawa ngoku eby’olhwanzo ebilholere okwa myatsi y’engyingo omundu atholere iniabikangania oyuli nayu omwa butheke musa.—Abaebrania 13:4.
You May Also Like
EKA YAWU YANGANA TSEMA
Obutheke Eritsema, Yikethere Nyamuhanga
Erikolesya ebibulyo bibiri ebyolho-byolho kyangana kuwathikya eryuwania obutheke bwawu.
