Busana naki abandu ibanza eribyaho kera na kera? Amasako akathubwira athi Nyamuhanga abirithuhiramo eriyisunza eryo. (Omugambuli 3:11) Kandi Amasako akabugha athi “Nyamuhanga ni lhwanzo.” (1 Yoane 4:8) Nina ky’amenge Nyamuhanga w’olhwanzo erithuhiramo eriyisunza ly’eribyaho kera na kera kandi isikyanga thokekana?

Ahathe erithika-thika, sihali oyuwanzire eriholha. Nibya, e Biblia yikabugha yithi olhuholho ni “nzighu.” (1 Abanya Korinto 15:26) Abandi bakaholha lhuba; n’abandi ibathaholha lhuba. Erighunzerera obuli mundu akendi syaholha. Abangyi bakakwa obuba bakalengekania okwa lhuholho. Enzighu eyi yine mwendi syakindwa? Ekyo kyangana thokekana?

Mbwino kinatholere ikyakuswekya wukaminya ngoku Nyamuhanga mwahangika abandu isi b’eriholha? Ekitabu kye Biblia eky’Enzuko kikaha obwema obukakanganaya ngoku Nyamuhanga mwahangika abandu ini b’eribyaho kera na kera okwa kihugho. Yehova a Nyamuhanga mwathegheka ndeke ekihugho nuku bubye bw’ikalho bw’abandu obuwene. Neryo Nyamuhanga mwahangika omulhume w’erimbere, iya Adamu, n’erimuhira omwa paradiso, eririma lye Edeni. Enyuma waho, “Nyamuhanga mwalhangira obuli kindu ahangika, thalebaya ko kyuwene kutsibu.”​—Enzuko 1:26, 31.

 Adamu mwahangikwa iniahikene kandi omwa kisosekanio kya Nyamuhanga. (Eryibuka Ebihano 32:4) Mukali wa Adamu ya Eva, nayu abya ahikene, omwa bulengekania n’okwa mubiri. Yehova mwababwira athi: “Mubuthe mukanyirire, musulhaye ekihugho, mughondayekyo; muthabale okwa mahere w’omwa ngetse n’okwa nyonyi sy’omwa kyanya, muthabalire obuli kindu ekiriho ekikalendera okwa kihugho.”​—Enzuko 1:28.

Ibo eryusulya ekihugho mw’abaana babu kyangathwere buthuku bunene. Eva angabuthire abaana, n’abaana abo ibabutha, erihika aho kihugho kyang’usulire ngoku Nyamuhanga abya anzire. (Isaya 45:18) Mbwino ikyanabya ky’amenge erilengekania thuthi Yehova angahere Adamu na Eva b’amaha ng’ayo kandi nibya ini b’erilholha okwa baana babu kutse abitsikulhu babu basa, kandi ibaghana eriminya ekyanga lhwiririramo?

Thasyalengekanaya n’okwa mubiiri w’erisondolha ebisoro. Adamu mwahebwa omubiiri w’erilhuka ebisoro by’amena, kandi ekyo kyangathwere buthuku buuli. (Enzuko 2:19) Aliwe iyo erithoka eribisondolha abya atholere eribiminya ndeke n’eriminya ngoku angabitheya. Ekyo kyanga thwere buthuku bunene.

Busana n’ekyo, ekya Nyamuhanga abugha athi abandu basulhaye ekihugho n’erithabalha okwa bisoro kikakanganaya ngoku abandu b’erimbere bahangikawa ini b’eribyaho kera na kera. Ahathe erithika-thika, Adamu mwabyaho myaka mingyi.

E Biblia yikakanganaya ngoku hane obuthuku obw’abandu babya bakaghunza myaka mingyi kwilhaba eyathukaghunza munabwire. Yikabugha yithi: “Ebiro byosi Adamu abyaho byabya emyaka maghana mwenda n’amakumi asathu.” Kandi yikathasyahulha n’abandi balhume mukagha abaghunza emyaka eyilhabire oku 900! Nabo ini Seti, Enosi, Kenani, Yaredi, Metusela, na Noa. Abosi aba babyaho Erighunga ly’Amaghetse ery’omwa buthuku bwa Noa lithe lyabya​—Noa iniamabiribyaho myaka 600 Erighunga ly’Amaghetse lithe lyasa. (Enzuko 5:5-27; 7:6; 9:29) Eribyaho n’engebe nyiri ng’eyi mulyathokekana

Abalhume bosi abo babyaho abandu imubanamaherya erihikana. Ekyo kyangabya iky’ekyaleka ibakotha. Aliwe erihikana likahamba lithi okw’ibyaho myaka mingyi? Kandi olhuholho lhukendi syakindwa lhuthi? Eribana eby’erisubirya, thutholere ithwatsuka eriminya ekikaleka ithwakekelhuha n’eriholha.