MUNABWIRE engebe siyiri ngoku Nyamuhanga abya anzire iyabya. Ekihugho kyabya ky’eribya mw’abandu abasikirye ehamuli ya Nyamuhanga ey’erithabalha, abakaghasirawa omwa busondoli bwiwe, n’erigherererya emibere yiwe y’olhwanzo. Babya b’erikolongana omwa butseme bakakulya abaana, bakaminya ebindu bihya-bihya, n’erikolha ekihugho kyosi mwa paradiso.

• “Akakubaya amalhwa omwa kihugho kyosi.”​—Esyonyimbo 46:9.

• “Omughulhu mwahika busana n’erithoghothya abandu abakatsandaya ekihugho.”​—Eribisulirwa 11:18.

• “Sihali ndulhani eyikendisyabugha yithi: ‘Nyilhwere.’”​—Isaya 33:24.

• “Abayisoghawa baghe basyatsemera omubiiri w’ebyalha byabu emighulhu miri.”​—Isaya 65:22.

Amaminyereri aya akendisyabererera athi? Nyamuhanga abirisombolha Mughalha wiwe, Yesu, eribya Mwami w’egavumente eyihikene eyikendisyathabalha ekihugho iyine elhubulha. E Biblia yikahulhayo mwa Obwami bwa Nyamuhanga. (Danieli 2:44) E Biblia yikakanaya oku Yesu yithi: ‘Nyamuhanga asyamuha ekithumbi ky’obwami, kandi asyathabalha’ ng’Omwami.​—Luka 1:32, 33.

Iniane okwa kihugho, Yesu mwakolha ebithiko-thiko erikangania ngoku iyo ng’Omuthabali akendisyuwania engebe y’abandu.

• Mwalhamya obuli musindo w’endwalha n’obuli musindo w’obukoni, erikangania ngoku akendi syaghunza okwa bandu kw’amalhwere.​—Matayo 9:35.

• Mwathulerya engetse, erikangania ngoku akendisyatheya abandu omw’isondolha eby’obuhangwa.​—Mariko 4:36-39.

• Mwalisya esyongumi sy’abandu, erikangania ngoku akendi syaha abandu ebiyithawa by’engebe.​—Mariko 6:41-44.

• Mwahindulha amaghetse mwa binyu okwa bugheni, erikangania ngoku akendi syawathikya abandu eritsemera engebe.​—Yoane 2:7-11.

Wanga bana wuthi engebe eyo Nyamuhanga anemutheghekera abandu abamwanzire? Hane “enzira” eya wutholere iwakwama. E Biblia yikabugha kuyo yithi “enzira ni nge eyikakolhaya oko ngebe, n’abandu ni bake abakabanayo.”​—Matayo 7:14.

Enzira eyikakolhaya okwa ngebe niki? Nyamuhanga athi: “Ingye, indi Mwami Mukulhu Nyamuhanga wawu, oyukakukangiriraya wubane endundi, oyukakusondolha omo nzira eyo wanga lenderamo.” (Isaya 48:17) Wamalendera omwa nzira eyi iwukendi bana engebe eyuwene.

Yesu mwabugha athi: “Ingye indi nzira, ingye indi mwatsi w’ekwenene, ingye indi ngebe.” (Yoane  14:6) Thwam’ikirirya ebya Yesu akangiriraya n’erigherererya eky’erileberyako kiwe, ithukendi yithunda hakuhi na Nyamuhanga kandi ithwaghasirwa.

Wangabana wuthi enzira eyikakolhaya okwa ngebe? Hali amadini mangyi, aliwe Yesu mwabugha athi: “Si yo mundu oyukanyahulha athi, ‘Mukama, Mukama,’ yowasyingira omo Bwami bw’elhubulha; nikwa yo n’oyukakolha erisonda lya Thatha waghe oyuli elhubulha.” (Matayo 7:21) Kandi mwabugha athi: “Mwasyaminyererabo busana n’emibiiri yabu.” (Matayo 7:16) E Biblia yangana kuwathikya eriminyerera eriramya ly’okwenene.​—Yoane 17:17.

Wanga tsuka wuthi erilendera omwa nzira eyikakolhaya okwa ngebe? Muli, eritsuka eriminya Oyuthuhere engebe: Nindi? Erina liwe yondi? Awithe mibereki? Nibyahi eby’akathukolera? Anzire ithwakolhaki? a

Eryongera okw’ikolha, erirya, n’eributha abaana, hane ebindi ebyo Nyamuhanga anzire abandu ibakolha. Thwanganaminya Omuhangiki wethu n’eribya banywani biwe. Thwangana kangania ku thumwanzire omw’ikolha erisonda liwe. Yesu mwabugha athi: “Eyi ni ngebe y’erikotha, abandu bakuminye, iwe, Nyamuhanga mughuma w’okwenene.”​—Yoane 17:3.

Thwamabiriminya ebya Nyamuhanga ow’okwenene akathuyithaghako, ikikendi leka thwakolha esyombinduka ndebe. Ekyo kyanganabya nga kikalire. Aliwe omwa kwenene, engebe yethu iyikendyuwana thwamabiritsuka ekiika ky’erimbere eky’olhughendo olho. Erikuwathikya eribana eby’erisubirya okwa bihambire oku Nyamuhanga, Abema ba Yehova banzire erikweghesya e Biblia ahathe erithuha okwa ndambi n’omwanya ogho wanzire. Wangana thumanyisya omw’ikolesya omuthahulha wethu owa www.pr418.com.