NOMWAKINE indi obuthowa bw’ababuthi bethu b’erimbere, Adamu na Eva mubwalethera abandu bosi b’ekibi n’olhuholho, ekyo mukithahindulha ekighendererwa kya Nyamuhanga busana n’abandu. Omwa Kinywe kiwe, e Biblia, Nyamuhanga akabya inianemukangania ngoku ekighendererwa kiwe sikyathahinduka.

• “Abathunganene basyikalha omo kihugho mo buholho n’erisighalyakyo kera na kera.”​—Esyonyimbo 37:29.

• “Asyaherya olhuholho busana na kera na kera. Omukama Omwami Mukulhu asyasangulha emisonia yosi okwa musu wosi.”​—Isaya 25:8.

• “Neryo olhuholho ni nzighu y’enyuma-nyuma eyikendi syahwerekereribwa.”​—1 Abanya Korinto 15:26.

• “Olhuholho silhwendisyaswabyaho, erisusumana kutse eririra kutse eriaghalhwa.”​—Eribisulirwa 21:4.

Ni mwa nzira yahi Nyamuhanga akendi “syaherya olhuholho,” ni bugha ambu erihwerekererya enzighu lhuholho? E Biblia yikabugha ndeke-ndeke yithi “abathunganene basyikalha omo kihugho . . . kera na kera.” Aliwe kandi yikabugha yithi “sihali mundu oyuthunganene muna-kihugho, oyukakolha ebibuya emighulhu yosi.” (Omugambuli 7:20) Erighunzaho olhuholho, mbwino Nyamuhanga akendi syabya isyakiyithagha abandu erighendera okwa misingyi yiwe? Eyihi na hake! Ekyo syanga kikolha, kundi ni “Nyamuhanga oyuthebiha.” (Tito 1:2) Neryo kwesi, Nyamuhanga akendi syakolhaki eriberererya ekighendererwa kiwe ky’olhwanzo ekyaleka iniahangika abandu?

Yehova Nyamuhanga mwakolha ekindu ky’olhwanzo erilhamya abandu okwa lhuholho​—omw’ithuha embanulho. Ekinywe embanulho kutse endongolya kikakolesibawa erimanyisya endihi eyikathuhawa eriboholha omundu erilhusya omundu y’omwa bunyewa. Omwa Biblia, embanulho ni kindu ekikathuhawa ekingene-ngene n’obughuli bw’ekiryatsandibawa kutse ekikayithaghisibawa nuku habye obulingirirania. Kundi abandu bosi ni bakolha-nabi kandi babiribya ini b’eriholha, e Biblia yikabugha ndeke-ndeke yithi: “Omundu syanga thongolya mulikyabu na kera, syanga thoka eririha Nyamuhanga obughuli bw’engebe yiwe, (kusangwa endihi y’engebe y’omundu ni nene kutsibu syanga thoka eribana endihi y’engebe eyo).”​—Esyonyimbo 49:7, 8.

Omundu oyuthahikene akabya akaholha, akabya iniamalihira ebibi biwe bisa; syanga yisabulha kutse erilihira owundi mundu y’ebibi biwe. (Abanya Roma 6:7) Thwayithagha omundu oyuhikene kandi oyuthawithe bibi erihayo engebe yiwe, isi bugha indi yuwakolha ebibi, aliwe busana n’ebibi byethu.​—Abaebrania 10:1-4.

Ekyo ky’ekyonyine-nyine ekya Nyamuhanga athegheka erikolha. Mwathuma mughalha wiwe, Yesu, erilhua elhubulha erisyabuthwa okwa kihugho ng’omundu oyuhikene, oyuthawithe kibi. (1 Petero 2:22) Yesu mwabugha athi asa “eriha engebe yiwe mo bughuli busana n’abandu bangyi.” (Mariko 10:45) Mwaholha nuku akinde enzighu lhuholho nuku thwangabana engebe.​—Yoane 3:16.

Munabwire, omw’ibererera ly’obuminyereri bwe Biblia, thuli omwa ‘mighulhu eyikalire,’ erikangania ku thuli omwa “biro by’enyuma-nyuma” eby’omughulhu mubi ono. (2 Timoteo 3:1) Ebiro by’enyuma-nyuma  bikendi syahwererera “n’ekiro ekyo abandu abathekenga Nyamuhanga basyatswerwa n’eriheribwa.” (2 Petero 3:3, 7) Aliwe abandu abanzire Nyamuhanga bakendi syalhama okw’iheribwa eri n’eribana “engebe y’erikotha.”​—Matayo 25:46.

Esyomiliyoni sy’abandu bakendi syathunga akaghisa k’eribana engebe y’erikotha bakalhubukibwa. Yesu abere akahika omwa muyi we Naina, mwalhubukya omundu. Omwana mughuma musa oy’omukwakali anabya awithe abya iniabiriholha, Yesu, “mwamughanyira,” neryo amamulhubukya. (Luka 7:11-15) Kandi, omukwenda Paulo mwabugha athi: “Kandi nyiwithe amaha oku Nyamuhanga . . . ngoku hasyabya erilhubuka ly’abathunganene n’ababi.” Amaha awasikire aya akanganaya ngoku Nyamuhanga anzire abandu.​—Emibiri 24:15.

Esyobbiliyoni sy’abandu, bangana lindirira erisyabyaho kera na kera. E Biblia yikabugha yithi: “Abathunganene basy’ikalha omo kihugho mo buholho, n’erisighalyakyo kera na kera.” (Esyonyimbo 37:29) Okwa buthuku obo, bakendi syayilhangirira ebinywe ebikahumulikanaya ebya omukwenda Paulo ahandika myaka nga 2,000 kera: “Iwe lhuholho, erikinda lyawu liri hayi kwehi? Iwe lhuholho, eritsimitha lyawu lirihi kwehi?” (1 Abanya Korinto 15:55) Enzighu y’abandu olhuholho yikendisyabya iyamakindwa!