Omuminyereri Musa mwabugha athi thwamowa ebihano bya Nyamuhanga, ithukendi bana emighisa ya Nyamuhanga. (Eryibuka Ebihano 10:13; 11:27) Sithuliowa Nyamuhanga kundi thukasagha erisuyira liwe. Emibere ya Nyamuhanga emibuyanga yikaleka ithwamwowa kundi thumwanzire n’erianza eriyihighulha okw’ikolha ekindu ekyanga muponesya. “Kusangwa erianza Nyamuhanga ni kwama ebihano biwe.”​—1 Yoane 5:3.

Aliwe eriowa Nyamuhanga likaletha lithi emighisa? Thalebya esyonzira ibiri.

“Ingye indi Mwami Mukulhu Nyamuhanga wawu, oyukakukangiriraya wubane endundi, oyukakusondolha omwa nzira eyo wangalenderamo.”​—ISAYA 48:17.

Yehova Nyamuhanga, Omuhangiki wethu, anathwasi kandi akathuha obusondoli obo thukayithagha. Thwamanza esyongangirirya siwe sithuwathikaye erithwamu ndeke, thutholere ithw’igha Amasako Abuyirire eriminya ebyo Nyamuhanga anzire ithwakolha n’erighendera okwa syongangirirya esyo.

“Obutseme buli okwa bakowa ekinywe kya Nyamuhanga n’erikolhakyo!”​—LUKA 11:28.

Munabwire, esyomiliyoni sy’abandu abakaghendera okwa Kinywe kya Nyamuhanga bakabana obutseme bw’okwenene. Ng’eky’erileberyako, thalengekania okwa mulhume owe Spain oyuwabya atsurumire kandi iniakakolha abandi bo nabi​—imwamune na mukali wiwe. Kiro kighuma mwasoma emyatsi eya omuminyereri Musa ahandika eyihambire okwa bwolho bwa Yozefu, mughalha wa Yakobo. Yozefu mwaghulibwa ng’omukobe n’erihirwa omwa ngomo isyaliko musango; aliwe, mwasighalha inina mwolho, ow’obuholho, kandi mughanyiri. (Enzuko, esura 37-45) Omulhume we Spain akabugha athi: “Erilengekania okwa ky’erileberyako kya Yozefu mukyanyihira mw’omuhwa w’eribya n’omubere ow’obwolho, olhukeri, n’eriyikakirya. Busana n’ekyo, lino ngatsemire.”

Amasako Abuyirire muli bingyi ebyanga thuwathikya erikolongana n’abandi. Lhangira ngoku eki kikanibweko buuli omwa mwatsi owakakwamako.