Nyamuhanga mwalhaghanisya omuminyereri Abrahamu athi omughuma w’okwa b’olhubutho lhwiwe angalethire emighisa okwa “bihanda byosi by’ekihugho.” (Enzuko 22:18) Angabere inindi?

Emyaka nga 2,000 kera, Nyamuhanga mwaha Yesu, oyuwasira omwa lhubutho lhwa Abrahamu, y’obuthoki bw’erikolha ebithiko-thiko by’amaaka. Ebithiko-thiko ebyo mubyakangania ngoku omulhaghe owa Nyamuhanga alhaghanisaya Abrahamu akendi syabererera okwa bihanda erilhabira omu Yesu.​—Abanya Galatia 3:14.

Ebithiko-thiko ebya Yesu akolha mubyaleka iniaminyikalha ng’oyo Nyamuhanga abirisombolha erilethera abandu b’emighisa, kandi mubyakangania ngoku Nyamuhanga akendi syamukolesya erilethera abandu b’emighisa ya kera na kera. Lhangira ngoku ebithiko-thiko bya Yesu bikakanganaya emibere yiwe mirebe eyikatsemesaya.

Eribuya-buya​—Yesu mwalhamya abalhwere.

Omuhagha mwasaba Yesu erimulhamya. Yesu mwamuhambako n’erimubwira athi: “Nyanzire!” Aho-naho, ebihagha mubyalhama.​—Mariko 1:40-42.

Omuthima w’erihithya​—Yesu mwalisya abakwire enzalha.

Yesu mwathanza abandu bakaghenda nzalha. Mirundi nga y’eyo, omwa nzira y’ekithiko-thiko, mwalisya esyongumi sy’abandu omw’ikanyia emiggati mike n’amahere make. (Matayo 14:17-21; 15:32-38) Babere babirirya, abosi mub’ughutha n’ebindi bingyi mubyasaka.

Erikwira abandi b’obulighe​—Yesu mwalhubukya abaholi.

Busana n’erikwira abandi b’obulighe, Yesu mwasubya omwana mughuma musa w’omukwakali oyuli omwa bulighe oyuthabya awithe kighanya.​—Luka 7:12-15.