Nyamuhanga syawithe kasolholho kandi anzire eritsumulha abandu abosi.

Nyamuhanga mwalhaghanisya omuminyereri Abrahamu athi “omw’isi syawu ebihanda byosi by’ekihugho ingye Nyamuhanga nasyatsumulhabyo.”​—Enzuko 12:3.

Thuk’ighaki? Nyamuhanga athwanzire kutsibu kandi anzire eritsumulha ebihanda byosi​—abalhume, abakali, n’abaana—​abakamwowa.

Nyamuhanga ni w’olhukeri kandi akatsumulha abakahiraho akaghalha erimuminya.

Omuthoki w’Ebyosi mwaha omuminyereri Musa y’obuthoki bw’erikolha ebithiko-thiko by’amaaka. Nomwabine, Musa mwasaba athi: “Wunyikangaye esyonzira syawu, inathoka erikuminya, inathoka eribana olhukogho omo meso wawu.” (Eriluayo 33:13) Nyamuhanga mwatsemera erisaba lya Musa kandi mwamutsumulha omw’imw’ongera eriminya n’eriyitheghererya esyonzira Siwe n’emibere yiwe. Ng’eky’erileberyako, Musa mwaminya ngoku Omuhangiki ni “Nyamuhanga oyuwoswire n’erighanyira n’ow’olhukogho.”​—Eriluayo 34:6, 7.

Thuk’ighaki? Nyamuhanga anzire erithutsumulha ithwe bosi​—abalhume, abakali, n’abaana—​thwamalengaho erimuminya ndeke. Omwa Masako Abuyirire akathukanganaya ngoku thwanga muramya kandi ngoku anzire kutsibu erithusima n’erithutsumulha.

Thwangana thunga emighisa ya Nyamuhanga eya kera na kera thwam’igha oku Yesu n’ebyo akolha n’erikangirirya.

Ekinywe kya Nyamuhanga kiri mwa bingyi ebihambire okwa ngebe ya Yesu n’ebyo akangiriraya. Nyamuhanga mwaha Yesu y’obuthoki bw’erikolha ebithiko-thiko by’amaaka ng’erilhamya esyondimethime, abatsiha, n’abalema. Nibya mwalhubukya n’abaholi. Yesu mwakangania emighisa eyo Nyamuhanga akendi syakolera abandu bosi omwa buthuku obukasa. Mwasoborera ngoku obuli mughuma w’okw’ithwe angabana emighisa eyi, athi: “Eyi ni ngebe y’erikotha, abandu bakuminye, iwe Nyamuhanga mughuma w’ekwenene, n’eriminya Yesu Kristo, oyo wathuma.”​—Yoane 17:3.

Yesu iniakakwira abandu b’obulighe, iniahehere, kandi ini w’olhukeri. Abalhume n’abakali, abalere n’abakulhu, mubamwasako bakaligha erikokya liwe, lino: “Mwighire okw’ingye, kusangwa indi mwolho-mwolho n’ow’omuthima ahehere; nenyu mwasyabana erilhuhuka omo mithima yenyu.” (Matayo 11:29) Mbaghane n’abandi ab’omwa buthuku bwiwe ababya bakakolha abakali bo nabi, Yesu mwakangania abakali b’olhukeri, erisikya, n’ekitsumbi.

Thuk’ighaki? Yesu mwakangania abandu b’olhwanzo lhunene, mwathuhiriraho eky’erileberyako ekyuwene ngoku thwanga kolongana n’abandi.

Amasako Abuyirire akabugha athi “hali Nyamuhanga mughuma” kandi athi Yesu Kristo abya muthumwa wa Nyamuhanga. (1 Abanya Korinto 8:6) Yesu mwakangania ndeke-ndeke ngoku Nyamuhanga amulengire, kandi ngoku Nyamuhanga amuthuma okwa kihugho.​—Yoane 11:41, 42; 14:28. *