Nyamuhanga mwaha abandu b’ekihembo ky’embaghane​—amaaka w’erikanirania nayu n’erimubwira eriyowa lyabu erilhabira omw’isaba. Omuminyereri Dawudi mwasaba athi: “Kusangwa wukasubiraya erisaba, abandu bosi basyakuhikako.” (Esyonyimbo 65:2) Aliwe thwanga saba thuthi nuku Nyamuhanga athwowe n’erithutsumulha?

Erisaba omwa binywe byawu kikaleka ‘iwabwira Nyamuhanga y’amalighe wawu wosi’​—iwamubwira eriyowa lyawu eryonyine-nyine. (Esyonyimbo 62:8) Omuthoki w’Ebyosi akasima emisabe yawu eyikalhua oko muthima.

Nomwakine indi Nyamuhanga awithe ebitsumbi bingyi, awithe erina lighuma lisa. “N’ingye Yehova. Eryo ly’erina lyaghe.” (Isaya 42:8, NW) Erina Yehova likabanika omwa Masako Abuyirire emirundi nga 7,000. Abaminyereri bangyi ba Nyamuhanga ibakakolesaya erina liwe. Abrahamu mwabugha athi: “Yehova, kisi, . . . wuleke ngabughe [nawu].” (Enzuko 18:30, NW) Nethu thutholere ithwakolesya erina lya Nyamuhanga, Yehova, thukasaba.

Nyamuhanga akayitheghereraya amalengekania n’eriyowa lyethu nomuthwangabya ithukabugha mubugheki. Ekinywe kiwe kikathubwira kithi: “Nyamuhanga syawithe ebithagha [akasolholho]. Nikwa omwa buli kihanda omundu oyuk’ubaha Nyamuhanga, n’erikolha ebithunganene akalighawa nayu.”​—Emibiri 10:34, 35.

Aliwe, eryongera okw’isaba, ni bingyi ebyo thutholere ithwakolha Nyamuhanga erithutsumulha. Omo myatsi eyikakwamako, thukendi lebya ebyo thutholere ithwakolha.