Abandi bandu bakabulha Ekinywe kya Nyamuhanga ekihandikire nga kyabirihinduka. Omuminyereri Isaya mwabugha athi ekinywe kya Nyamuhanga “kikahangana kera na kera.” (Isaya 40:8) Thwanga minya thuthi ngoku emilhaghe ya Nyamuhanga siyiriyathahinduka?

Nyamuhanga awithe amaaka w’eritheya Ekinywe kiwe okw’itsandibwa. Kera, ekinywe kya Nyamuhanga kyabere kikahandikwa omwa byalha, abahandiki ibakabara obuli nyughuta, ibanayitheghirye erilhangira bathi sihali ekikongerawamo, erihindulhwa, kutse ekyamasighalha. Aliwe kundi abandu sibahikene, abandi bahandiki ibakanakolha ehisobya.

Hane emikunzo mingyi eya kera ey’Amasako Abuyirire. Neryo omo mukunzo mughuma nomumwangabya akasobya kake buyira, iniangana linganisibwa n’eyindi erithoka eriminya okwenene.​—Eriminya bingyi, lebaya omwatsi “Mbwino e Biblia yabirihinduka kutse erihengemibwa?” okwa jw.org.

Ng’eky’erileberyako, lebaya ebihandikire ebya kera ebik’ahulhawamo Dead Sea Scrolls, ebyo abikalhani b’omwa mbwarara babana omwa myangalhu eyiri hakuhi ne Dead Sea omwa 1947. Emikunzo eyi yiri mw’ebitsweka by’Amasako Abuyirire ebyamabirighunza emyaka eyilhabire oku 2000. Abasomire mubalinganisya ebihandikire ebya kera ebi n’Amasako Abuyirire agho thuwithe munabwire. Mubabanaki?

Abasomi mub’eya ebiri omwa Kinywe kya Nyamuhanga ekyo thuli nakyo munabwire ibya n’ebine omwa bihandikire ebya kera. * Erisekulya ndeke ebihandikire ebya kera likakanganaya ngoku ebya thukasoma omwa Masako wan’omwatsi wa Nyamuhanga ow’enyine-nyine. Ahathe erithika-thika, Nyamuhanga abirilhangira athi Ebihandikire Ebibuyirire nethu akathuhikaya byoko ibinalhughirirene.

Neryo thwangana soma Ekinywe kya Nyamuhanga ithunakiyikethere n’eriligha ngoku kihikire. Ebyo bine omwa bulengekania, thulebaye ebyo thwang’igha oku Nyamuhanga erilhabira omwa baminyereri biwe.