Eritsuka aho abandu bakathahangikirwa, Omuhangiki wethu abirikanirania n’abandu erilhabira omwa bamalaika n’abaminyereri. Eryongera okw’ekyo, mwalhangira athi omwatsi wiwe n’emilhaghe yiwe bikahandikawa. Emilhaghe eyikalhua oku Nyamuhanga eyi yikahamba okwa buthuku bwawu bw’embere. Neryo ni hayi aho wangabana emilhaghe ya Nyamuhanga munabwire?

Omwatsi wa Nyamuhanga ogho abirithuha ali omwa Masako Abuyirire. (2 Timoteo 3:16) Nyamuhanga mwakolesya athi abaminyereri erihandika omwatsi wiwe? (2 Petero 1:21) Nyamuhanga mwahira amalengekania wiwe omwa bulengekania bw’abahandiki, neryo bamahandikagho. Ku kine kithya na munabwire. Omukulhu w’omubiiri amakolesya omuhandiki wiwe erimuhandikira omwatsi wiwe, thukaligha ngoku omwatsi oyo ni w’omukulhu w’omubiiri. Kuthya, nomwakine indi Nyamuhanga mwakolesya abalhume erihandika omwatsi wiwe, iyo ya Mwinye Ebihandikire Ebibuyirire.

Omwatsi wa Nyamuhanga ni w’omughaso munene. Neryo anzire abandu abosi ibasomagho n’eriyitheghereryagho. Munabwire ‘engulhu yuwene yiwe y’erikotha’ yitsaka-tsakire, “obuli kithunga ky’abandu, n’obuli kihanda, n’obuli mubughe” bangana minyagho. (Eribisulirwa 14:6) Busana n’obuwathikya bwa Nyamuhanga, Ebihandikire Ebibuyirire bineho ebyosi kutse omwa bitsweka omwa mibughe eyilhabire omu 3,000, kwilhaba ekindi kitabu kyosi-kyosi.