Wukalengekanaya engebe yangabere yithi okwa kihugho ku kuthabya eryuba? Eryuba likaha emithi y’amaaka w’eriasa kw’ebikoma, ebimole, ebighuma, n’esyonguma. Kandi likaleka emithi iyakura amaghetse w’omwa kithaka omw’ikolesya emirihi n’erithwalhagho omwa bikoma neryo iniaghenda omwa kyanya ng’ekyuka.

Embulha ni kihembo ky’obughuli erilhua oku Nyamuhanga ekikaleka ekihugho ekyathoka erihulhukya ebyalya ebyo thwangalya. Nyamuhanga akathuha embulha eyikalhua elhubulha n’ebirimo ebikeraya, ebyalya n’erisulya emithima yethu mw’obutseme.

Abathatha bangyi bakahanga-hangaya bikahika okw’isondya ebyalya n’eby’eriambalha eby’amaka wabu ebikaghunza. Lebaya ekyo Amasako akabugha: “Musamalire esyonyonyi sy’omwa kyanya; kusangwa sisyebiba, kutse sisyeghesa, kutse erihirabyo omwa bighona; nikwa Thatha wenyu w’elhubulha akalisayasyo. Nenyu si muli b’obughuli bunene kwilhabasyo kwehi?”—Matayo 6:25, 26.

“Mulebaye ebiranga-ranga by’omoli ngoku bikalhasa. . . . Nikwa ngababwira nyithi, [Omwami] Solomono omo lhukengerwa lhwiwe lhwosi mwathambalha ndeke ng’omusanga mughuma oyu. Nikwa Nyamuhanga oyukambalhaya ebithi by’omoli, . . .  syendisyabambalya kwilhaba aho?”—Matayo 6:28-30.

Kundi Nyamuhanga angana thuha ebyalya n’eby’eriambalha, ahathe erithika-thika, angana thuwathikya eribana n’ebindi biyithawa by’engebe. Thwamakolha erisonda lya Nyamuhanga, iniakendi tsumulha akaghalha kethu k’erihera ebyalya kutse iniathuwathikya eribana omubiiri nuku thubane ebyo thukayithagha.—Matayo 6:32, 33.

Omo kwenene, ni bingyi ebyangaleka ithwanza Yehova thukalengekania okwa lyuba, embulha, ebinyonyi, n’ebimole. Omwatsi owakakwamako akendi kania ngoku Omuhangiki wethu abirikanirania n’abandu.