Ngoku Thwanga Kangania Abandi b’Olhwanzo
Kundi ithwe bosi thulhuire omo mulhume w’erimbere, Adamu, thuli rihiika lighuma. Nomwakine indi ab’omw’ihiika lighuma batholere ibanzana n’erisikania, lino olhwanzo ng’olho silhukiri. Nyamuhanga wethu w’olhwanzo syanzire ekyo.
EBYA AMASAKO ABUYIRIRE AKABUGHA OKWA LHWANZO
“Wanze mulikyenyu ngoku wuyanzire.”—ABALAWI 19:18.
“Mwanze esyonzighu syenyu.”—MATAYO 5:44.
EKYA KIKAMANYISAYA ERIANZA BALIKYETHU
Lhangira ngoku Nyamuhanga akakanaya okwa lhwanzo omwa Kinywe kiwe omwa 1 Abanya Korinto 13:4-7:
“Olhwanzo lhukayibombeka, kandi lhuli n’obwenge.”
Thakilengekaniako: Wukayowa wuthi abandi bakakukangania omubere w’eriyibombeka [erighumisirizya] n’ow’obwenge [olhukeri] n’eribya isibanga kutsurumira wukasobya?
“Olhwanzo silhulibya n’obuha.”
Thakilengekaniako: Wukayowa wuthi abandi bamakuyilhalikirira kutse erikuthungako obuha?
Olhwanzo “silhuli yironderaya endundi ilholhwene-lhwene.”
Thakilengekaniako: Wukayowa wuthi abandi bamasikya amalengekania agho wukaha kandi isibali maghirira awabu?
Olhwanzo “silhuli tsungirira ekibi.”
Thakilengekaniako: Nyamuhanga anayitheghekire erighanyira abandu abakayisubamo ababirimusoberya. “Syalihaya ebiro byosi, syalihithana ebiro byosi.” (Esyonyimbo 103:9) Thukasima omundu oyo thwabirisoberya akathughanyira. Neryo thutholere ithwabya ithunayitheghekire erighanyira abandi bakathusoberya.—Esyonyimbo 86:5.
Olhwanzo “silhulitsemera ebithathunganene.”
Thakilengekaniako: Ekindu ekithuwene kyamathubyako, sithulyanza abandi bakatsemera eriaghalhwa lyethu. Nethu sithuli tsema abandi bakaghalhwa, nibya nomubangabya ibanathukolire nabi.
Eribana emighisa ya Nyamuhanga, thutholere ithwanza abandi nomubangabya ibali bathi. Enzira nguma eyo thwanga kolera mw’eki ly’eriwathikya abali omwa buyithawa.
