Abandu bangyi omwa kihugho sibawithe ebyalya n’amanyumba. Abandi bakayithagha amaha masa agho buthuku obukasa. Akaghalha kethu ak’eriwathikya abandu ng’abo kangaleka kathi ithwasimwa na Nyamuhanga n’eribana emighisa yiwe?

“Oyukaghanyira abera akabweka Omwami Mukulhu; akendi syamuthuha omubiiri wiwe owene.”​—EMISYO 19:17.

Yesu mwaha omusyo w’omulhume oyo abibi bahunza n’erimusigha hakuhi n’eriholha. (Luka 10:29-37) Ow’ehandi oyuwabya awithe omubere w’eriwathikya iyo mw’imana n’eritsomana omulhume oyuwabya iniabirihuthalibwa kutsibu. Mwakolha eki nomwakine indi abya w’ekindi kihanda.

Omulhume w’olhukeri oyu mwathasubulira okw’iha omulhume oyuwabya ahuthere oyo y’obubalya bwa lhuba-lhuba n’ebindi ebyo ayithagha lisa aliwe kandi mwamuhumulikania n’erimw’iha omwa kitsibu ekyo abyamu eki.

Omusyo oyu akathweghesayaki? Yesu abya iniakakanganaya ngoku thutholere ithwawathikya abali omwa buyithawa omwa nzira yosi-yosi. (Emisyo 14:31) Amasako Abuyirire akakangiriraya athi Nyamuhanga akisiya iniaghunzaho obunakwa n’eriaghalhwa. Ithwangana yibulya, Nyamuhanga akendi syakolha eki mughulhu wahi kandi athi? Omwatsi owakakwamako akendi kania okwa mighisa eya Omuhangiki wethu w’olhwanzo abirikulhagha.