“Wukangirirayebyo oko Bandi Bandu Abathaleghulha”
‘Wukangirirayebyo oko bandi bandu abathaleghulha, abakendi thoka erikangirirya abandi bandu.’—2 TIMOTEO 2:2.
1, 2. Abandu bangyi bakanabya na malengekaniaki okwa mibiiri eyo bakakolha?
ABANDU bangyi, omubiiri ogho bakakolha akanaleka ibayowa nga ni b’ekitsumbi kutse nga si b’ekitsumbi. Omwa bindi bihugho wukabya wukanza eriminya omundu, ni kya buli kiro erimubulya wuthi, “Wukakolha mubiiriki?”
2 Okwa bundi buthuku, e Biblia yikabya yikakania okwa bandu, yikanakolesaya emibiiri eyo babya bakakolha. Ng’eky’erileberyako, oku Matayo, wuk’owa yithi, “Matayo omusolesya,” “Omubambi w’ebihu oyuk’ahulhawa mo Simoni,” na “Luka omunganga mwanze.” (Matayo 10:3; Emibiri 10:6; Abanya Kolosai 4:14) Okwa bundi buthuku, e Biblia yik’ahulha omundu n’olhusunzo olhw’abya awithe omwa mubiiri wa Yehova. Ng’eribugha yithi Omwami Dawudi, omuminyereri Eliya, n’omukwenda Paulo. Abalhume abo babya basikirye esyongwamirwa esya Yehova abaha esyo. Nethu kuthya, thutholere ithwasikya olhukwamirwa olho thwanga thunga omwa mubiiri wa Yehova.
3. Busana naki abakulire batholere ibathendeka abalere? (Lebaya ekisasani ekiri okw’itsuka.)
Omugambuli 1:4) Ekyo kikalemesaya abaghombe ba Yehova bangyi. Munabwire, omubiiri w’erithulira akayongera erikulha-kulhana, kandi n’ekithunga kya Yehova kinemukolesya etekinologia erihikya engulhu yuwene oko bandu bangyi kutsibu. Aliwe kikanakalira abakulire erigha esindi nzira nyihya-nyihya esy’erikoleramu ebindu. (Luka 5:39) Kandi ni kya buli kiro omundu erihwa amani akaghenda akakulha. (Emisyo 20:29) Neryo kwesi, ni ky’amenge kandi ky’olhwanzo abakulhu erithendeka abalere eryongerwa esindi ngwamirwa omwa kithunga.— Soma Esyonyimbo 71:18.
3 Thwanzire erikolera Yehova kandi thukasikaya emibiiri ey’akathuha. Abangyi omw’ithwe thukatsemera kutsibu emibiiri yethu omwa kithunga erihika okw’ibya ithwangananza erikolhayo engebe yethu yosi kyamathokekana. Aliwe eky’obulighe, abandu bakabya bakakulha, bakabya isibanga thasyakolha ebyo babya bakakolha ibakine balere. (4. Busana naki kikakalira abandi erilhwikira abandi b’olhukwamirwa? (Lebaya akasanduko k’omwatsi, “Ekyanga Leka Ikyathukalira Erilhwikira Abandi b’Olhusunzo.”)
4 Mughulhu mungyi sikyolho erilhwikira abalere b’olhusunzo. Mughalha wethu oyukulire iniangana yowa nabi akalengekania kw’amathalhwika olhusunzo olho alhue anzire kutsibu. Kutse iniabya mw’obuba athi iyo amathend’imanira olhukwamirwa olho, emyatsi iyikendi ghenda kithya-kithya. Kutse obundi iniayowa nga syawithe ndambi y’erithendeka abandi. Aliwe, n’abalere nabu batholere ibakangania omuthima w’erilinda bamabya isibathahebwa esindi ngwamirwa omo kithunga.
5. Thukendi kania oko bibulyo byahi omo mwatsi ono?
5 Neryo kwesi, busana naki ni ky’omughaso abakulire eriwathikya abalere eryongerwa esindi ngwamirwa omwa kithunga? Ekyo banga kikolha bathi? (2 Timoteo 2:2) Kandi busana naki n’abalere batholere ibakangania omuthima owuwene bakakolha na baghalha bethu abakulire, abasi bingyi omwa mibiiri eyo, n’erib’ighirako? Erisubirya okw’ebyo, thuthatsuka erilebya ngoku Omwami Dawudi athegheka mughalha wiwe erithoka erimanira olhukwamirwa lhukulhu.
DAWUDI MWATHEGHEKA SOLOMONA
6. Omwami Dawudi mwanza erikolhaki? Aliwe Yehova mwamubwira athiki?
6 Dawudi mwaghunza myaka mingyi inianemwendereribwa, n’erithibitha n’eyi-n’eyi. Abere abiribya mwami, mwikalha ndeke omwa nyumba eyuwene. Neryo mwabwira omuminyereri Natana athi: “Lebaya nyikere omo nyumba y’emierezi, nikwa erisanduko ly’erilhaghana ly’Omwami Mukulhu likere omo kisukuliryo ky’olhukimba.” Dawudi, omo muthima wiwe inianzire erihimba ehekalu eyuwene busana n’eriramya Yehova. Natana mwamubwira athi: “Wukole ebyosi ebiri omwa muthima wawu, kusangwa Nyamuhanga ali haghuma nawu.” Aliwe Nyamuhanga abya n’awandi malengekania. Mwabugha na Natana athi abwire Dawudi athi: ‘Siwe wukendisya nyihimbira enyumba y’er’ikalhamo.’ Nomwakine indi Yehova mwalhaghanisya Dawudi ngoku asyabya nayu ebiro byosi, Dawudi mwaminya ngoku mughalha wiwe
yukendi syahebwa olhukwamirwa lhw’erihimba ehekalu. Dawudi mwakolhaki?—1 Emyatsi y’Emigulu 17:1-4, 8, 11, 12; 29:1.7. Dawudi mwakangania mibereki erikwamana n’obusondoli obwalhua oku Yehova?
7 Omo kwenene, Dawudi abya anzire erihimbira Yehova y’ehekalu, neryo angabya imwayowa nga bamamulhabirya ahisi. Aliwe mwasighika ndeke omubiiri ogho mughalha wiwe Solomona akendi sy’imanira. Dawudi mwawathikya omw’itheghekania abakoli n’omw’isorokya ebyuma, omulinga, efeza, ehoro, n’emithi. Mwathakwa ihale kundi ekitsumbi ky’erihimba ehekalu kikendi hebwa Solomona, nibya n’ery’ahulha ehekalu omo lina lya Solomona y’abirihwa. Omwakanya k’ekyo, mwahira Solomona mw’omuhwa athi: “Neryo lino mughalha waghe, Omwami Mukulhu abye haghuma nawu, wubane omughisa wuhimbe enyumba y’Omwami Mukulhu Nyamuhanga wawu, ngoku abiribugha busana nawu.”—1 Emyatsi y’Emigulu 22:11, 14-16.
8. Ni kyahi ekyangabya imukyaleka Dawudi iniayowa Solomona nga syali atholera erimanira obuhimbe bw’ehekalu? Aliwe Dawudi mwakolhaki?
8 Soma 1 Emyatsi y’Emigulu 22:5. Dawudi obundi anganabya imwayowa Solomona nga sy’ali atholera ndeke erimanira obuhimbe bw’ehekalu. Ehekalu eyo yabya yitholere “iyakanga kutsibu n’erikumayira,” kandi Solomona abya “mulere,” isyali aminya bingyi. Aliwe Dawudi abya inianayikethere ngoku Yehova akendi wathikya Solomona erikolha omubiiri oyu. Neryo Dawudi mwakolha ekyosi-kyosi erimuwathikya eriyitheghekera omubiiri munene oyo.
THENDEKA ABANDI
Kikathutsemesaya thukalhangira baghalha bethu abalere bakathunga esyongwamirwa omwa kithunga (Lebaya enungu 9)
9. Ni kyahi ekyanga wathikya abakulire eritsemera eriha abandi b’esyongwamirwa? Iha eky’erileberyako.
9 Baghalha bethu abakulire sibatholere bakahwa amani hamabya ekiyithawa ky’erilhwikira abalere b’esindi ngwamirwa
omwa kithunga. Thunasi ngoku ekikulhu w’omubiiri ogho thukakolera Yehova. Erithendeka baghalha bethu abalere erikolha emibiri y’ekithunga ikikendi leka omubiiri oyo inialholha embere. Thalengekania oku kino. Omwana iniabya inianemulhangira thatha wiwe akaghendya ematoka. Omwana akabya anemukulha, thatha iniatsuka erimukangirirya erighendya. Endambi iyahika n’omwana iniathoka erighendya iyuwene-wene. Nibya n’okwa buthuku obo, thatha wiwe akabya iniakinamuhabulha. Ibanganabya bakatsunangana erighendya. Aliwe thatha oyu akabya akaghenda akakulha, omwana iyuwabya akaghendya kutsibu. Mbwino thatha inianemwendikwa eriri ng’ihale, n’eripona? Eyihi, nibya iniangana sima omwana wiwe akabya iyukaghendaya. Kuthya n’omwa kithunga, baghalha bethu abakulire batholere ibatsema bakalhangira baghalha bethu abalere abo babirithendeka bakatholera erihebwa esyongwamirwa omwa kithunga.10. Musa abya na malengekaniaki okwa by’eribya n’ekitsumbi n’obuthoki?
10 Thutholere ithwayitheya okw’ibya n’eriri ng’ihale busana n’esyonzunzo esy’abandi. Ebya Musa abugha bakasyamubwira ambu omwa kilhaliriro mwamabanika abamabya baminyereri, byangana thweghesya erisomo likulhu. (Soma Emiganzo 11:24-29.) Yosua iyo mwanza bathangawe, aliwe Musa mwabugha nayu athi: “Wuli n’obuha busana naghe kwehi? Kumbe abandu bosi b’Omwami Mukulhu ni baminyereri, kumbe Omwami Mukulhu angahira omulimu wiwe w’okw’ibo!” Musa abya inianasi ngoku Yehova yukasondolha omubiiri. Omwakanya k’eriyironderya ekitsumbi, Musa iyo nibya inianzire abandu ba Yehova abosi ibathunga esyonzunzo. Kandi ibbwa ithwe? Thukana tsema abandi bakathunga esyonzunzo omwa mubiiri wa Yehova?
11. Mughalha wethu mughuma mwabugha athiki okw’iha abandi b’esyonzunzo?
11 Hane baghalha bethu bangyi ababirikolha kutsibu omwa kithunga kya Yehova habw’emyaka mingyi kandi babirithendeka abalere bangyi erimanira esyongwamirwa omwa kithunga. Ng’eky’erileberyako, ni mughalha wethu oyukahulhawa mwa Peter. Omwa myaka 74 eyo amaghunza inianemukolera Yehova omwa mubiiri w’omughulhu wosi, mwaghunza emyaka 35 inianemukolera okwa Beteli ye Yuropu. Mwaghunza mughulhu muli iniane mulebererya w’Akathunga k’Omubiiri okwa Beteli. Olhusunzo olho mulhwahebwa owundi, iya
Paul, omulhwana mulere oyo Peter athendeka. Mbwino Peter mwanapona busana n’embinduka eyi? Eyihi. Mwabugha athi: “Kikanyitsemesaya kutsibu eriminya ngoku hane baghalha bethu abamabirithendekwa erihika okw’itholera erihebwa emibiiri eyirithohire kandi ibanemukolha ndeke olhukwamirwa lhwabu.”MUSIKAYE ABAKULIRE
12. Eky’erileberyako kya Rehoboamu kikathweghesayaki?
12 Rehoboamu mughalha wa Solomona abere abya mwami, mwabulya abalhume bakulhu amenge ngoku ang’imanira olhukwamirwa olhw’amahebwa olho. Aliwe enyuma w’aho mwathaghendera oko menge bamuha! Mwathwamu erighendera okwa by’abalhwana ab’akulha nabu. Mumwalhwiririra ebitsibu. (2 Emyatsi y’Emigulu 10:6-11, 19) Ekyo kikathweghesayaki? Ni ky’amenge eribulya amenge oko bakulire, abasi bingyi okw’ithwe. Aliwe abalere sibatholere bakalengekania bathi ni kilhaghiro erikolha ebindu ngoku byabya bikakolhwa kera. Aliwe kandi, batholere ibasikya amenge w’abakulire, isibanguha erilengekania bathi amenge wabu syanga kolha.
13. Abalere batholere ibakolangana bathi n’abakulire?
13 Hakanayira abalere ibahebwa olhukwamirwa lhw’abaghalha bethu abakulire abamabirikolha emibiiri eyo habw’obuthuku buuli. Ikikendibya ky’amenge abalere erighira okwa bakulhu abo. Paul oyothulyakanayako, abere abirisuba omo bwa Peter, Paul mwabugha athi, “Munalhangira indi ngasaba Peter y’amenge, kandi namabwira n’abandi ababya omwa mubiiri oyo nabu erikolha ekyo.”
Paulo mwathendeka Timoteo, na Timoteo mwigha ndeke
14. Emibere Paulo na Timoteo babya bakolanganiramu yikathweghesayaki?
14 Timoteo abya mulere kutsibu oku mukwenda Paulo, aliwe mubakolha haghuma habw’emyaka mingyi. (Soma Abanya Filipi 2:20-22.) Paulo mwabwira Abanya Korinto athi: “Nabiribathumira Timoteo. Iye ni mwana waghe mwanze omw’isi w’Omukama oyutheleghulha. Asyab’ibukya emighendere yaghe eyo nga kwama omw’isi wa Kristo, kandi eyo ngakangiriraya ehosi omo makanisa wosi.” (1 Abanya Korinto 4:17) Eki kikathukanganaya ndeke ngoku Paulo na Timoteo mubakolha haghuma omo bughuma. Paulo mwathendeka Timoteo y’emighendere yiwe eyo abya akakwama omw’isi wa Kristo, na Timoteo mwighayo ndeke. Paulo abya anzire Timoteo, kandi inianayikethere ngoku akendi theya ndeke balikyethu be Korinto. Abasyakulhu batholere ibagherererya Paulo erithendeka abandi eribya n’esyonzunzo omwa kithunga.
OBULI MUGHUMA W’OKW’ITHWE AWITHE OLHUKWAMIRWA LHUKULHU
15. Abanya Roma 12:3-5 hanga thuwathikya hathi erighenda-ghendania n’esyombinduka?
15 Thuli omwa mughulhu w’engulha-kulhana nene omwa mubiiri wa Yehova. Ekithunga kya Yehova kinemukulha-kulhana Abanya Roma 12:3-5.
omwa nzira nyingyi. Ekyo kikakanganaya ngoku hakendibya ihanemubya esyombinduka. Esindi sy’okwa mbinduka esyo syangana thuhambako kandi isyabya isisyolhobire erighumira. Omubere w’eriyikehya inakendi thuwathikya eritsomana erihira Obwami bw’embere omwakanya k’eritsomana ebyethu ebya thwanzire. Thukabya thwamakolha eki, thukabya omwa bughuma. Paulo mwahandikira Abakristayo be Roma athi: “Ngabwira obuli mundu omo kathikathi kenyu nyithi syayighanze eribya mukulhu kwilhaba aho atholere.” Neryo mwasoborera athi ngoku obuli kitsuko ky’omubiri kiwithe omughaso wakyo, kuthya, obuli mughuma w’okw’ithwe omwa kithunga anawithe omughaso wiwe.—Abaghombe ba Yehova abosi bakanza ibasighika omubiiri w’Obwami n’erikolha omubiiri wosi-wosi ogho bakahebawa omo kithunga
16. Obuli Mukristayo angakolhaki erithoka erighumya obuholho n’obughuma omwa kithunga?
16 Abaghombe ba Yehova abosi bakanza ibasighika omubiiri w’Obwami n’erikolha omubiiri wosi-wosi ogho bakahebawa omo kithunga. Baghalha bethu abakulire batholere ibathendeka abalere. Baghalha bethu abalere batholere ibaligha esyongwamirwa omwa kithunga aliwe omwa muthima w’eriyikehya n’erisikya. Kandi baghalha bethu abathahirye bakasima bakali babu bakabasighika omughulhu hakabya esyombinduka. Bakabya ibamagherererya Pirisila, omukali oyuwabya akakolha haghuma na mwira wiwe Akwila n’erimusighika.—Emibiri 18:2.
17. Yesu mwathendeka abigha biwe bo mubiiriki?
17 Yesu mwahira h’eky’erileberyako ekyuwene eky’eryanza erithendeka abandi. Yesu abya inianasi ngoku hakendi syayithagha abandi abanga lholirye omubiiri wiwe w’embere. Abya inianasi ngoku abigha biwe sibahikene. Aliwe abya inianayikethere ngoku bakendi syahikya engulhu yuwene yo haali n’omwa myanya eyo athahikamo. (Yoane 14:12) Mwabathendeka ndeke, kandi kwenene muthulira omwa buli kihugho ekyo bahikamu.—Abanya Kolosai 1:23.
18. Thulindirireki omwa kihugho kihya-kihya? Lino thuwithe mubiiriki?
18 Yesu abere abiriholha, Yehova mwamulhubukya n’erithasyamuha mibiiri mingyi y’erikolha, imwamuli n’erimuha obuthoki bw’erithabalha “oko bathabali bosi n’abakama bosi, n’ab’ehamuli bosi, n’abinye buthoki bosi.” (Abanya Efeso 1:19-21) Nomuthwanga holha e Harmagedoni yithe yabya, thwamabya ithune bathaleghulha oku Yehova, thukendi syalhubuka ithwahebwa emibiiri mingyi eyuwene omwa kihugho kihya-kihya. Aliwe lino ithwe bosi thuli n’olhusunzo lhw’erithulhughania engulhu yuwene n’eriyira abigha. Neryo busana n’ekyo, mbuli thuli balere kutse thukulire, ithwe bosi ithwanganabya na bingyi by’erikolha “omwa mubiiri w’Omukama.”—1 Abanya Korinto 15:58.