Ekilhubirirwa si kilhotho buyira​—ekindu ekya wanganza wuthi kibye. Ebilhubirirwa ebyonyine-nyine mwamuli erithegheka ndeke, eribya iwunayitheghekire erikolha esyombinduka, n’erikolha kutsibu n’omuhwa.

Ebilhubirirwa mwanganabya eby’eriberererya lhuba (omwa biro bike kutse omwa mayenga make), ebindi ibya yithagha buthuku buuliho (amezi), n’ebindi ibyathwalha buthuku buuli (omwaka kutse kwilhaba aho). Ebilhubirirwa eby’obuthuku buuli byangana hikwako omw’iberererya ebilhubirirwa eby’obuthuku buke kutse buuliho.

Eriberererya ebilhubirirwa kyangana leka iwahwamo eriyithika-thikira, ikyaleka iwaghumya amanywani wawu, n’eryongera etseme yawu.

Erithendi yithika-thikira: Wamahiraho ebilhubirirwa bike-bike n’eriberereryabyo, iwangana yikethera ngoku wangana berererya n’ebinene-binene kw’aho. Kandi wukabya iwunasikire ndeke wukabana ebitsibu omwa ngebe​—ng’eriyiyinirya akahathikano ak’ab’olhulengo lhwawu.

Amanywani: Abandu bakanza eribya ahali abandu abawithe ebilhubirirwa​—ni bugha ambu, abasi eky’abanzire erikolha kandi ibanayitheghekire erikiberererya. Kandi, enguma y’okwa syonzira esyuwene esy’erikamathiryamo obunywani ly’erikolha haghuma n’owundi mundu oyuwithe ekilhubirirwa ng’ekyawu.

Etseme: Wamahiraho ebilhubirirwa n’eriberereryabyo, wukayowa iwabiritsema kutsibu.

“Nganzire kutsibu eriyihiriraho ebilhubirirwa. Bikaleka ingabya inganawithe eby’erikolha n’erileka ihabya ihane ekindu ekyanga simbirira eriberererya. Kandi wukabya wukaberererya ekilhubirirwa kyawu, wukatsema kutsibu wukalengekania okwa bya wabirilhabamu erithoka erikiberererya.”​—Christopher.

OMUSINGYI WE BIBLIA: “Oyukalebaya erihunga siendi syabiba. N’oyukalebaya ebithu syendi syaghesa.”​—Omugambuli 11:4.

Kolha bino erithoka eriyihiriraho ebilhubirirwa n’eriberereryabyo.

Minya ebilhubirirwa nga ni byahi. Handika ebilhubirirwa byawu, kandi bithonde ngoku wanzire iwabiberererya, eritsuka n’ebyo wanzire eritsukirako, n’ebya wanga kwamyako.

Thegheka. Okwa buli kilhubirirwa ekya wukayihiriraho, kolha ebiri ahikwa hano:

• Hiraho obuthuku obutholere obo wanganza iwakiberererya.

• Lengekanaya okwa biika ebikayithaghisibawa.

• Lengekanaya okwa byangana kulemesya kandi ngoku wanga bisingura.

Tsukiraho. Isiwalindiriraya eritsuka erihika aho wukendi banira ebyosi ebikayithaghisibawa. Yibulhaye, ‘Ni kyahi ekya ngatholere inatsukirako erithoka eriberererya ekilhubirirwa kyaghe?’ Neryo kolhakyo. Bera erilebya nga wamahikahi.

OMUSINGYI WE BIBLIA: “Amalengekania w’ab’omuhwa akaletha bingyi.”​—Emisyo 21:5.