Emibere y’omundu by’ebyo ebyo mundu akathwamu erighenderako omo ngebe. Ng’eky’erileberyako, mbwino wukanalengaho eribya w’okwenene omo myatsi yosi? Neryo obo iwukendianza erikangirirya abaana bawu eribya b’okwenene.

Kandi emibere mwamuli n’omuthima w’erianza erighendera okwa kihikire. Ng’eky’erileberyako, oyuli n’omuthima oyo ni mukoli, ni w’obulingirirania, akalumirirawa abandi​—emibere eyo mundu atholere in’igha iniakine mulere.

OMUSINGYI WE BIBLIA: “Wukangiriraye omwana omo nzira eyimutholere erilhabamu, neryo omughulhu asyabya mukulhu syendi syalhua muyo.”​—Emisyo 22:6.

Omwa buthuku buno bw’etekinologia, emibere y’esyongeso yikayithaghisibawa. Mama mughuma oyukahulhawamo Karyn akabugha athi: “Abaana bangan’igha emitse mibi okwa ndambi yosi-yosi erilhabira okwa simu. Nibya n’abaana banganabya ibane n’aho thuli aliwe ibane mulebya ebindu ebithuwene!”

OMUSINGYI WE BIBLIA: ‘Abandu abakulire babirikolha n’eryeghesibwa omo myatsi mingyi, ibabirithoka erisombolha ekibuya n’ekibi.’​—Abaebrania 5:14.

Kandi ni kikulhu eribya n’emibere y’esyongeso. Eki mwamuli erikolesya ebinywe ebikakanganaya esyongeso mbuya (ng’eribugha wuthi “mwanithu” na “wasingya”) n’erikangania ku wutsomene abandi​—omubere owamabirikeha, kundi lino abandu bakabya ng’abatsomene kutsibu ebyuma by’ekitekinologia kwilhaba abandu.

OMUSINGYI WE BIBLIA: “Ngoku mwanzire abandu ibabakolera, nenyu ko munakolerebo muthya.”​—Luka 6:31.

Babwire emisingyi y’esyongeso eyo wanzire ibaghenderako. Ng’eky’erileberyako, erisekulya likakanganaya lithi abalengwa bangana yihighulha okwa busingiri bamabya ibabirikangiriribwa ndeke ngoku ekyo sikihikire.

AMENGE: Kolesaya ekyabya lino-lino eritsukisya omukania owahambire okwa by’erighenderako omo ngebe. Ng’eky’erileberyako, okwa makuru bamakania okwa bikorwa by’obwithi, iwangana bugha wuthi: “Kikitha obulighe erilhangira ngoku abandu bakakanganaya abandi b’ekinigha ng’eki. Wukalengekanaya ni kyahi ekikaleka abandu ibabya bathya?”

“Kikakalira kutsibu abaana erithwamu okwa kihikire n’ekiwire bamabya isibasi nga ni kyahi ekihikire kutse ekiwire.”​—Brandon.

Kangiriraya abaana bawu emibere y’esyongeso. Nibya n’abaana bawu abalere bangan’igha erikolesya ebinywe “mwanithu” na “wasingya” n’erikangania ku batsomene abandi. Ekitabu Parenting Without Borders kikabugha kithi, “Abaana bakabya bakongera erilhangira ngoku ebyabakakolha bikahamba n’okw’ab’omw’eka yabu, okwa banya sukuru balikyabo, n’okw’ab’omwa butaka bwabu, kubakanongera bathya erikolha ebindu ebikakanganaya ngoku sibali yitsomana ibobene aliwe ngoku bakatsomana n’abandi.”

AMENGE: Ghabira abaana bawu b’emibiiri y’erikolha eka eribawathikya erigha omughaso ow’erikolera abandi.

“Abaana bawu bamabeghera erikolha emibiiri ibakine balere, isibendi syasagha emibiiri babirikulha. Erikolha emibiiri ikikendibya kindu kya buli kiro omwa ngebe yabu.”​—Tara.