Abandu abakoli sibalisagha mibiiri. Omwakanya k’ekyo, bakakolha kutsibu erilhangira bathi bakabana ebiyithawa byabu n’eriwathikya abandi​—nomukyangabya indi omubiiri owabakakolha ni wahisi.

Wanzire si wanzire, engebe yoswire mw’esyongwamirwa nyingyi. Omwa kihugho omuli abandu abaponire erikolha kutsibu, iwe eribya mukoli w’omuhwa ikikendi kughasira.​—Omugambuli 3:13.

“Nabiriminya ngoku omughulhu wukakolha kutsibu, wukatsema kandi iwayowa ndeke. Eriyowa ndeke eryo ery’omwa muthima lyabirileka ing’igha erianza erikolha kutsibu. Kandi eribya mukoli w’omuhwa kikaleka iwabya n’erina libuya.”​—Reyon.

OMUSINGYI WE BIBLIA: “Omw’ikolha lyosi muli endundi.”​—Emisyo 14:23.

Ibya n’amalengekania awuwene awahambire okw’ikolha omw’ikolesya amenge awali ahikwa hano.

Tsemera erigha erikolha ebindu bya ndeke. Mbulha wukakolha emibiiri y’eka, erikolha ehomuwaka, kutse erikolha omubiiri w’ekihugho, kolhagho n’omuthima wawu wosi. Wamabiriminya erikolha ndeke omubiiri oyo, sondekanaya ah’erithasyuwania, ni bugha ambu, eryanguhyagho kutse erikolhagho ndeke. Wukabya wuk’ongera eriminya erikolhagho ndeke, kwa wukan’ongera wuthya eritsemeragho.

OMUSINGYI WE BIBLIA: “Wamalhangira omundu w’omuhwa omo mubiiri wiwe kwehi? Yo wasyahangana embere sy’abami; siendisyahangana embere sy’abandu bathya-bathya.”​—Emisyo 22:29.

Lengekanaya ngoku kikaghasira n’abandi. Wamabya wukaberererya ndeke esyongwamirwa syawu mughulhu wosi, abandi bakaghasirawa. Ng’eky’erileberyako, wamakolha n’omuhwa emibiiri yawu y’eka, wukaleka n’abandi omw’eka ikyabolhobera eriberererya esyongwamirwa syabu.

OMUSINGYI WE BIBLIA: “Erihithya likaletha obutseme kwilhaba erihebwa.”​—Emibiri 20:35.

Kolha kwilhaba ekikakuyithaghisibawako. Omwakanya k’erikolha emibiiri eyighulhu-ghulhu, lengaho erikolha kwilhaba ekikakuyithaghisibawako. Wamakolha wuthya, iwukendi yowa iwuli bwiranda omwa bya wukakolha​—erikolha bingyi, butsira kundi wabirikakwa eribikolha, aliwe kundi wanzire eribikolha.​—Matayo 5:41.

OMUSINGYI WE BIBLIA: “Neryo obubuya bwawu si bubye bukakunwa, nikwa busana n’erianza lyawu.”​—Filemono 14.

Ibya n’amalengekania awatholere. Abandu abakakolha n’omuhwa sibaghatha, kandi sibugha indi bakakolha buthalhuhuka. Bakalengaho erithendi ghemera lhuhandi lhughuma, neryo ikyaleka ibatsemera erikolha kutsibu n’obuthuku bw’erilhuhuka.

OMUSINGYI WE BIBLIA: “Ekighanza kighuma ekyoswire haghuma n’erithulera kyuwene kwilhaba ebighanza bibiri ebyoswire n’omubiiri n’erikwamirira erihunga.”​—Omugambuli 4:6.