OKWA BABUTHI
5: Erikanirania
EKYA KIKAMANYISAYA
Erikanirania eryuwene likabya omughulhu iwe n’abaana bawu obuli mughuma akabwira owundi amalengekania n’eriyowa liwe.
EKIKALEKA IKYABYA KIKULHU
Erikanirania lyangana kalha kwilhabirirya abaana bamabya ibali omo myaka y’obulengwa. Obundi emyaka ey’ahanyuma, ikikwolhobere eryingira omo lhukyo lhw’omuthima w’abaana bawu. Aliwe lino wukakwama kyimana eyihya w’olhuyi iwalinda n’erithungereralho. Okwa bundi buthuku, nomuwanga lhukongothako bungahi, silhuli kyungukalha nahake. Nomubyangabya bithya, okwenene kuli kuthi obu bw’obuthuku obw’erikaniraniamu kutsibu n’abaana bawu!
EKYA WANGAKOLHA
Kanaya n’omwana wawu okwa ndambi eyo akanziramu erikania nawu. Kolha ekyo nomukyangabya ikikendi kuyithaghisya erikania nayu omwa kiro kutsibu.
“Iwangananza erimubwira wuthi, ‘Neryo esaha eno muwamanza erikania? Ka nganasibire nawu ekiro kyosi!’ Aliwe ibbwa ni kyahi ekyangaleka ithwayineghenia abaana bethu bakanza erithubwira ngoku bakayowa? Ekyo ka kya buli mubuthi akanza!”—Lisa.
“Nomwakine indi nganzire erighotsera lhuba, erikanirania eryuwene eryo nabirithunga n’abaana baghe abalengwa likabya omwa kiro kutsibu.”—Herbert.
OMUSINGYI WE BIBLIA: “Omundu syasodondaye endundi yiwe iyowene-wene, nikwa asondaye endundi busana n’omulikyabo.”—1 Abanya Korinto 10:24.
Isiwalengemeribawa. Thatha mughuma akabugha athi: “Hakanayira ingabya ingane mulengekania n’okwa bindi bindu abaana baghe bakakania naghe. Kandi bakalhuaho ibakilhangira!”
Wamabya iwukanayisanga omwa mibere ng’eyo, limaya etivi kutse ekindu kyosi-kyosi eky’ekielekitroniki ekyanga kulengemerya. Hira amalengekania wawu okwa by’omwana wawu akabugha, kandi lhangira wuthi wukahulikirira ndeke ebyo akakubwira, nomuwanga bilhangira nga si by’omughaso.
“Thutholere ithwakakasya abaana bethu ngoku eriyowa lyabu ni ly’omughaso embere syethu. Bamathendi kiminya bathya, ibangana yihunira n’ebikabalyambaya kutse ibasondya obuwathikya bw’ahandi.”—Maranda.
“Isiwahithana nomukyangabya indi omwana wawu awithe amalengekania awathahikire.”—Anthony.
OMUSINGYI WE BIBLIA: “Muyirenge busana n’ebyo mukowa!”—Luka 8:18.
Kolesaya akaghisa akanga yiretha esaha muli n’okwa bindi. Okwa bundi buthuku abaana bakayowa buholho erikania bamabya isibasamalirene busu okwa busu n’omubuthi.
“Ithukakaniranaya ithune omwa matoka ithunemughenda. Erikalha omwa matoka owundi okwa lhuhandi lhw’owundi kikaleka ithwakanirania ndeke.”—Nicole.
Endambi y’erirya ni kandi kaghisa ak’erikanirania omwa mibere eya buli kiro.
“Thukabya thukalya eky’erigholho, obuli mughuma akabugha emibere eyikalire n’eyuwene ey’alyalhabamu omo musibo wosi. Eki kyabirileka ithwabya bughuma kandi kyabirileka obuli mughuma iniaminya ngoku thutholere ithwawathikania omwa bitsibu.”—Robin.
OMUSINGYI WE BIBLIA: ‘Wowe lhuba, nikwa siwubughe lhuba.’—Yakobo 1:19.
