OKWA BATHAHENIE
2: Erikolha Haghuma
EKYA KIKAMANYISAYA
Omwa butheke mwamabya erikolha haghuma, omulhume na mukali wiwe bakabya ng’oyukaghendaya endege n’omuwathikya wiwe abawithe endegheka ey’erighenderako eyisosene. Nibya nomuhanga buthuka ebitsibu, obuli mughuma omwa butheke atholere iniakolesya ekinywe “ithwe” butsira “ingye.”
OMUSINGYI WE BIBLIA: “Sibakiri babiri, nikwa mubiri mughuma.”—Matayo 19:6.
“Obutheke si bw’omundu mughuma. Omulhume na mukali wiwe batholere ibakolha haghuma obutheke bwabu erithoka eryuwana.”—Christopher.
EKIKALEKA IKYABYA KIKULHU
Hamabya erithendi yitheghererania, omulhume na mukali wiwe abathakolha omwa bughuma bakasondaya ow’eritsweba omwakanya k’erighunzaho ekitsibu. Ehitsibu hike-hike ihikendi kanya neryo ibyabya bitsibu binene-binene.
“Erikolha haghuma ni kikulhu kutsibu omwa butheke. Ingye na mwira waghe ku thuthabya ithukakolha haghuma, thwangabere ng’abali omwa kisenge kighuma buyira omwakanya k’eribya abathahenie—abandu babiri abikere haghuma aliwe obuli omundu iniakolha biwe bikahika okw’ithwamu oko myatsi mikulhu-mikulhu.”—Alexandra.
EKYA WANGAKOLHA
YILEBAYE
-
Nganalhangira esyosente esyanga kolha ng’esyaghe ingyuwene?
-
Erithoka erithekana omwa bulengekania, mbwino ngatholere ingatsuka erilhua ahali omwanze waghe?
-
Mbwino sindi yihira okwa bahughu b’omwanze waghe, nomwakine indi iyo ane bughuma nabu?
KANAYA N’OMWANZE WAWU OKWA BIBULYO BINO
-
Ni bindu nga byahi omwa butheke bwethu ebya thukakolha ndeke haghuma?
-
Ni hayi aha thwanga thasyuwania?
-
Ni byahi ebya thutholere ithwakolha eryuwania omuthima w’erikolha haghuma?
AMENGE
-
Isiwalhangira omwanze wawu ng’ali omwa yindi timu y’abasathi nawu nga wuli omwa yindi. Omwakanya k’ekyo, ni biika byahi ebya wanga kolha erilhangira wuthi inywe bosi mukabya okwa timu nguma?
-
Omwakanya k’erilengekania wuthi, ‘Nanga singa indi?’ lengekanaya wuthi ‘Ithwe bosi babiri thwanga singa thuthi?’
“Ikya okwa by’erisondya oyuhikire n’oyuthahikire nga nindi. Ekyo si kikulhu mwamabya imuli b’eribya n’obuholho n’obughuma omwa butheke bwenyu.”—Ethan.
OMUSINGYI WE BIBLIA: “Mutheghaye ebindu by’abandi butsira erilhwira ebyawu bisa.”—Abanya Filipi 2:3, 4.
