OKWA BABUTHI
6: Erikunga
EKYA KIKAMANYISAYA
Ekinywe erikunga kyangana manyisya erisondolha kutse erikangirirya. Okwa bundi buthuku, ekyo mwamuli erihengulha omwana amasobya. Aliwe, mughulhu mingyi, eki mwamuli erikangirirya omwana erimuwathikya erithoka eribya akathwamu ndeke.
EKIKALEKA IKYABYA KIKULHU
Omo myaka eya lino-lino, omwa wandi maka mukabya nga simukiri erikunga, kundi ababuthi bakasagha bathi erihengulha omwana lyanganaleka iniayilhangira mo wabbule. Aliwe, ababuthi b’amenge bakahiriraho abaana babu ebilhaghiro eby’erighenderako n’eribathendeka ngoku banga bighenderako.
“Abaana bakayithagha eribahiriraho ebilhaghiro erithoka eribawathikya eribya b’olhukwamirwa babirikulha. Bamathendi kungwa, abaana bakabya ng’eryathu erithawithe engahya, ebisunda bikalilholhaya eyi n’eyi, ekindu ekyangana leka iryabana obutsibu.”—Pamela.
EKYA WANGAKOLHA
Imanira okwa bya wukabugha. Omwana wawu amathendi ghendera okwa bilhaghiro ebya wabirimuhiriraho, musuyire. Okwa lhundi lhuhandi, ibya iwunayitheghekire erisima omwana wawu amaghendera okwa bilhaghiro ebya wabirimuhiriraho.
“Ngabera erisima abaana baghe busana n’eribya bowa omwa kihugho ekyoswire mw’obuthowa. Erisima likaleka ikyabolhobera eriligha erihengulhwa omughulhu kikayithaghisibawa.”—Christine.
OMUSINGYI WE BIBLIA: “Ekyo mundu akahera kyo anemwendi syahulhulha.”—Abanya Galatia 6:7.
Kanganaya obuyitheghererya. Suyira omwana erikwamana n’emyaka yiwe, ebya angathoka, n’obulithohe bw’ekisobyo eky’alyakolha. Mughulhu mungyi erisuyira mukalhwiririra ebibuya lyamabya eringene-ngene n’esobya eyiryakolhawa—ng’eky’erileberyako, amakolesya esimu omwa nzira eyithuwene iyangana mulhusibwako ahabw’obuthuku bulebe. Kandi iwayitheya okw’itumya ehisobyo ehike-hike.
“Ngalengaho erilebya omwana waghe ng’akakighenderera erithendibya mwowa kutse ng’alyabulikira iniamabirisobya. Hali embaghane ahakathi-kathi k’omutse mubi ogho mwana atholere iniawathikibwa erilekagho n’esobya ey’atholere erikanganibwa.”—Wendell.
OMUSINGYI WE BIBLIA: “Simuhithanaye abaana benyu, bakasyalhuha.”—Abanya Kolosai 3:21.
Kanganaya olhwanzo. Kik’olhobera kutsibu abaana eriligha erikunga n’erilighenderako omughulhu bakakiminya ngoku omubuthi akakolha ekyo kwilhabirirya busana n’olhwanzo.
“Omwana wethu w’obulhume iniakabya amasobya, ithukamukakasaya ngoku thukamuyisyethera busana n’erithwamu liwe eryosi eryuwene eryo abirikolha kera. Muthwamusoborera ngoku esobya siyanga mutsandya kw’erina amalengaho erikokothya ahasobire kandi ngoku thunayitheghekire erimuwathikya erikolha ekyo.”—Daniel.
OMUSINGYI WE BIBLIA: “Olhwanzo lhukayibombeka, kandi lhuli n’obwenge.”—1 Abanya Korinto 13:4.
