OKWA BATHAHENIE
3: Erisikya
EKYA KIKAMANYISAYA
Abathahenie abasikenie bakatsomanangana, nibya n’omughulhu hali erithendi yitheghererania. Ekitabu Ten Lessons to Transform Your Marriage kikabugha kithi, “Abathahenie aba sibali lighira emibere yosi-yosi ey’erikakalhukana yikaleka bakathendi subanamu. Omwakanya k’ekyo, bakalholha embere erikanirania okw’ithendi yitheghererania erya bawithe. Omw’isikya owundi akahulikirira omwanze wiwe akaha amalengekania wiwe neryo abosi ibayira ebya bakalighiranako.”
OMUSINGYI WE BIBLIA: “Olhwanzo . . . silhuliyirondera endundi ilholhwene-lhwene.”—1 Abanya Korinto 13:4, 5.
“Erisikya mukali waghe kikamanyisaya kithi nga mulhangira mw’obughuli kandi singalyanza erikolha ekyosi-kyosi ekyanga muhuthalya kutse ekyanga tsandya obutheke bwethu.”—Micah.
EKIKALEKA IKYABYA KIKULHU
Hathe erisikya, erikanirania ahakathi-kathi k’abathahenie mwanganabya eritsamba, akasindibuko, nibya n’erimughaya—emibere eyo abakasekulhaya bakabugha bathi ni buminyikalho obukakanganaya ngoku aho hanganasya erikomolhana.
“Erikolesya ebinywe by’erihemulikania kutse eby’olhughalha-ghalha oko mukali wawu, bikendi leka iniayowa mo wabbule, ikyaleka iniathakuyikethera, kandi ikyatsandya obutheke bwenyu.”—Brian.
EKYA WANGAKOLHA
YILEBAYE
Ahabw’ewiki, lebaya emibere wukakaniranayamo n’omwanze wawu n’emibere wukamuthwalhamo. Neryo yibulhaye:
-
‘Ni mirundi mingahi eyo natsweberamo omwanze waghe, kandi munamusimire mirundi mingahi?’
-
‘Ni mwanzira nga syahi esyo ngalyakanganirayamo ku ngasikirye omwanze waghe?’
KANAYA N’OMWANZE WAWU OKWA BIBULYO BINO
-
Ni byahi ebyanga kolhwa n’eribuwa ebyanga wathikya obuli mughuma w’okw’inywe eriyowa iniasikibirwe?
-
Ni byahi ebikakolhawa n’eribuwa ebikaleka obuli mughuma w’okw’inywe iniayowa isyasikibwe?
AMENGE
-
Handika nzira isathu ngoku wanganza iwasikibwa. Leka n’omwanze wawu nayu akole ikya n’ekyo. Owundi ahe owundi eby’amahandika, kandi inywe bosi mulengeho erisikania ngoku obuli mughuma amakangania.
-
Handika emibere ey’omwanze wawu awithe eyikakutsemesaya. Neryo bwira omwanze wawu ngoku wukasima kutsibu emibere eyo.
“Erisikya mwira waghe kikamanyisaya ingye erikangania omwa mikolere ngoku ng’amulhangira mwa w’obughuli kandi ngoku nganzire iniatsema. Sibugha indi ni mukolera ebindu binene-binene; nibya n’eribera erimukolera ehindu hike-hike kyangana kangania ngoku wumusikirye ndeke.”—Megan.
Neryo, ekikulhu si ry’eriyowa wuthi iwe wunamusikirye kutse eyihi aliwe ly’erilhangira wuthi omwanze wawu akayowa iwunamusikirye.
OMUSINGYI WE BIBLIA: “Muyire emithima y’erighanyira, omuthima w’obubuya, ow’eriyikehya, ow’obwolho, ow’eriyibombeka.”—Abanya Kolosai 3:12.
