Abiba n’abakali abathahibwa ababiriyihayo okwa butheke bwabu bakabulhangira ini mathanibwa lya kera na kera, kandi ekyo kikaleka ibayowa ihane obutheya ahakathi-kathi kabo. Obuli mughuma akabya inianayikethere ngoku omwanze wiwe akendi sighalha iniane omwa butheke, nibya n’omwa mibere eyikalire.

Abandi abathahenie bakasighalha omwa butheke bwabu busana n’erihabulha ly’abanywani kutse ab’okw’ibo. Aliwe, ekikulhu kutsibu, ly’eriyowa eriyihayo okwa butheke bwawu iriseghemere okwa lhwanzo n’erisikya.

OMUSINGYI WE BIBLIA: “Omulhume syahighe mukali wiwe.”​—1 Abanya Korinto 7:11.

“Wamabya iwabiriyihayo okwa butheke bwawu, isiwahithana lhuba-lhuba. Wukanguhirawa erighanyira n’erisaba lhuba ekighanyiro. Wukalhangira ebitsibu ng’ebikanza eribalemesya, butsira ng’ebikathwa embeta.”​—Micah.

Hamabuthuka ebitsibu, abathahenie abathayihereyo okwa butheke bwabu kyangana bolhobera erighunzerera bathi, ‘Sithuhangirwe eribya haghuma’ neryo ibasondya esyonzira esy’erilhua omwa butheke bwabu.

“Abandu bangyi bakingira omwa butheke ibanawithe amalengekania awakabugha athi bwamalema ithwakomolhana. Abandu bam’ingira omwa butheke ibanawithe amalengekania w’erikomolha, bakabya isibali mw’eriyihayo okwa butheke bwabu okw’inatsuka.”​—Jean.

YILEBAYE

Hamabya erithendi yitheghererania . . .

• Wukana yikubayabwomo, iwayibulya ekyaleka iwingira nayu omwa butheke?

• Wukanayowa ng’awangabere iwutsemire ku wingira omwa butheke n’owundi mundu?

• Wukana bugha ebinywe nga bino “Ngendi kuleka” kutse “Ngendi sondya owundi oyukendi nyilhangira mw’omughaso”?

Wamasubirya wuthi ee, okwa kibulyo kighuma kutse ebilhabire okw’aho, eno y’endambi y’erikamathya eriyihayo lyawu.

KANAYA N’OMWANZE WAWU OKWA BIBULYO BINO

• Mbwino eriyihayo okwa butheke bwethu sirikikamathire ndeke? Kyamabya ikwakiri kithya, busana naki?

• Ni biika byahi ebya thutholere ithwakolha lino erithoka erikamathya eriyihayo okwa butheke bwethu?

AMENGE

• Ambi ihanayira iwahandikira omwanze wawu y’akabbaruha k’olhwanzo

• Kanganaya eriyihayo lyawu okwa butheke bwawu omw’ihira ebisasani eby’omwanze wawu okwa meza aha wukakolera

• Therera omwanze wawu obuli kiro omughulhu wuli okwa mubiiri kutse mwamabya isimuli haghuma

OMUSINGYI WE BIBLIA: “Neryo abo Nyamuhanga abirimathania haghuma, sihabye mundu oyukaghabulhabo.”​—Matayo 19:6.