OKWA BALERE
10: Obuyiketherwa
EKYA KIKAMANYISAYA
Abandu abayiketherwa bakaleka ababuthi babu, abanywani, n’ababahere emibiiri ibabayikethera. Bakaghendera okwa bilhaghiro, bakaberereraya eriyilhagha lyabu, kandi mughulhu wosi bakabugha ekwenene.
EKIKALEKA IKYABYA KIKULHU
Hakuhi omwa mibere yosi, obwiranda obwa wanga thunga bukasighikira okw’iyikethera erya bandi babirikuthungamu obuthuku bunemulhaba.
“Enzira eyuwene ey’erileka ababuthi bawu ibakuyikethera ly’erikikangania ngoku wukulire kandi ow’olhukwamirwa, butsira omughulhu wuli nabu lisa aliwe n’omughulhu batheho.”—Sarahi.
OMUSINGYI WE BIBLIA: “Mulhole embere erikangania ekyo muli!”—2 Abanya Korinto 13:5, NWT.
EKYA WANGAKOLHA
Wamabya wanzire abandi bongere erikuyikethera kutse erithasyakuyikethera, ebiri ahikwa hano byangana wathikya.
Ibya w’okwenene. Wamabya mundu oyukabugha amabehi, abandu ku bakanalekeraho bathya erikuyikethera. Okwa lhundi lhuhandi, wamabugha ekwenene, kwilhabirirya wamabya iwabirisobya, abandi ibakendi kuyikethera.
“Kyolhobire eribya w’okwenene ebindu byamabya ibinemughenda ndeke. Aliwe eribya w’okwenene omo myatsi eyangana kukinia kw’erina ikyangana leka abandu ibongera erikuyikethera kutsibu.”—Caiman.
OMUSINGYI WE BIBLIA: “Thwanzire erikolha ebibuya [eribya b’okwenene] omo myatsi yosi.”—Abaebrania 13:18.
Ibya mundu oyukayisighawa. Omw’isekulya lighuma eryakolhawa omwa U.S., epasente 78 ey’abandu abakaha emibiiri mubabugha bathi, “eribya mundu oyukayisighawa ni kighuma ky’okwa bindu bisathu ebikayithaghisibawa mundu erihebwa omubiiri.” Erigha eribya mundu oyukayisighawa lino kikendi syakughasira wabirikulha.
“Ababuthi baghe bakakilhangira omughulhu ngabya w’olhukwamirwa neryo ingakolha emibiiri yaghe bathe banyihathikana. Ngabya ngalholha embere erikolha nyithya, kwa bakanongera bathya erinyiyikethera.”—Sarah.
OMUSINGYI WE BIBLIA: “Ngabiriminya ngoku wukendiowa, kusangwa nyinasi ngoku wukendi syakolha kwilhaba ebyo ngakubwira.”—Filemono 21.
Ibya oyukaghumisirizaya. Kyolhobire erilhangira abalengwa bakakulha kinyamubiri, aliwe mughulhu mungyi hakayithagha obuthuku erilhaba abandi erilhangira ngoku abalere bane mukulha omw’iyowa n’omwa bulengekania.
“Siwanga kolha ekindu murundi mughuma neryo wukalengekania wuthi ababuthi bawu n’abandi bakendi kuyikethera mughulhu wosi. Aliwe ibangana kuyikethera wamalholha embere erikangania ngoku wuli w’olhukwamirwa.”—Brandon.
OMUSINGYI WE BIBLIA: “Mwambale . . . erighumisirizya.”—Abanya Kolosai 3:12, NWT.
