OKWA BALERE
9: Ekyo Wuli
EKYA KIKAMANYISAYA
Ekyo wuli sikirisubulira okwa rina lyawu n’emisosere yawu. Mwamuli ebya wukaghenderako omo ngebe, ebya wikirirye, n’emibere yawu. Erithwalira haghuma, ekya wuli imwamuli ebyosi ebikuhambireko—omwakathi n’eyihya.
EKIKALEKA IKYABYA KIKULHU
Wamabya iwutsomene kutsibu ekyo wuli, iwukend’imanira okwa bya w’ikirirye omwakanya k’erilighira ab’emyaka yawu erikusondolha.
“Abandu bangyi bali ng’ebidole ebikahanikawako esyongyimba omo maduka. Sibiriyisombolera esyongyimba esy’eryambalha aliwe abandi babakabisombolera.”—Adrian.
“Nabirigha ngoku nang’imanira okwa kihikire nomukyangabya isikyolho. Nangana minya abanywani baghe b’okwenene nga babahi namayowa buholho ingane haghuma nabu kundi bakasikaya emisingyi eya ngaghenderako.”—Courtney.
OMUSINGYI WE BIBLIA: “Simusosekanibawe n’emyatsi y’ekihugho kino, nikwa muleke Nyamuhanga eribahindulha n’eribaha obulengekania buhya-buhya.”—Abanya Roma 12:2.
EKYA WANGAKOLHA
Lengekania nga wuli mundu oyulyathi lino kandi ng’awanzire iwabya mundu oyulyathi omw’irebya ndeke ebya wukathoka, aho wukalemererawa, n’ebya wikirirye. Erithoka erikolha ekyo, subiraya okwa bibulyo ebiri ahikwa hano.
Ebya wukathoka: Ni byahi ebya ngasi n’ebya nanga thoka erikolha? Ni byahi ebya ngakolha ndeke? (Ng’eky’erileberyako: Nganatheghaya obuthuku? nganayikakiraya? ngane mukoli? ngane mwenge?) Ni bibuya byahi ebyanga kolha?
AMENGE: Mbwino kikakukalira eriyilhangiramo ebibuya? Bulhaya omubuthi kutse omunywani oyo wuyikethere ng’akalhangira nga ni byahi ebya wukathoka kandi busana naki.
OMUSINGYI WE BIBLIA: “Obuli mundu alenge omubiiri wiwe iyuwene, neryo iniabana eky’eriyihalhambira mugho, butsira eriringiriraniagho n’omubiiri ow’owundi mundu.”—Abanya Galatia 6:4.
Aho ngalemererawa: Omwa mibere yaghe, ni hayi aho ngatholere ingathasyuwania ndeke? Ni mughulhu wahi nangana lengwako erikolha ekithatholere? Ni hayi ahanga tholere erikangania eriyikakirya linene?
OMUSINGYI WE BIBLIA: “Thwamabugha thuthi sithuwithe kibi, thukayitheba.”—1 Yoane 1:8.
Ebya wikirirye: Ni misingyi yahi ey’esyongeso eya ngaghendereko, kandi busana naki? Ngan’ikirirye omu Nyamuhanga? Ni kyahi ekikaleka ingaligha ngoku aneho? Ni byahi ebyanga lhangira isibiri kanganaya obulingirirania, kandi busana naki? Ni byahi ebya ng’ikirirye ebikendi syabya omwa buthuku obukasa?
OMUSINGYI WE BIBLIA: “Eriyisunako [amaaka w’erilengekania] lyasyakutheya; n’obwowika [obuyitheghererya] bwasyakubika.”—Emisyo 2:11.
You May Also Like
EBIBULYO 10 EBYA BALERE BAKABULHAYA N’EBY’ERISUBIRYA
Nganayasi?
Eriminya ebya wanga thoka, obulemwa bwawu, ebilhubirirwa byawu, n’ebya wimanireko, likendi kuwathikya erithwamu ndeke wukabana akahathikano.
