Eriyikakirya mwamuli amaaka

• w’erilinda

• w’eriyitheya

• w’erighunza omubiiri nomwangabya isyalitsemesaya

• w’erihira ebiyithawa by’abandi by’embere okwa byawu

Abaana abasi eriyikakirya ndeke bangana rwanisya erilengwako, erilengwako eryo nomulyangabya irikendi baghasira habw’akathambi kake. Mbaghane n’ekyo, abaana abathe yikakiraya kyangana b’olhobera

• eribya batsururu

• eribbunika muthima

• erinywa ethaba kutse erikolesya nabi obwabu kutse ebibatsi ebikathamiraya

• erithendi sombolha ndeke eby’erirya

Erisekulya lighuma mulyakangania ngoku abaana abasi eriyikakirya ndeke, bakabya bakakulha, bangana ghan’ibya n’ebitsibu eby’amaghalha, amaghaniryo w’eby’esyosente, n’ebitsibu by’erithwa ebilhaghiro. Erisekulya eryo mulyaleka Professor Angela Duckworth ow’okwa Yunivasite ye Pennsylvania iniaghunzerera athi: “Eriyikakirya ni ly’omughaso.”

Igha eribugha wuthi eyihi kandi kimanyisaye.

OMUSINGYI WE BIBLIA: “Eribugha lyenyu libye, egha, egha, kutse eyihi, eyihi!”—Matayo 5:37.

Abaana bangana lenga okw’ithwamu ly’ababuthi babu omw’iyitilimbania—obundi nibya n’embere sy’abandu. Omubuthi amasighika ekyo, omwana iniakendi lhangira athi eriyitilimbania ni nzira eyuwene ey’erileka e eyihi iyahindukamo ee.

Okwa lhundi lhuhandi, omubuthi amabugha athi eyihi kandi iniakimanyisya, omwana ak’igha ekwenene ngulhu omwa ngebe—ngoku sibugha indi mughulhu wosi thukendi hebwa eby’athukayithagha. Dr. David Walsh mwahandika athi: “Kikaswekaya, abandu abak’igha eriyikakirya eribya ibabawithe etseme nene. Siky’olhwanzo erileka abaana bethu bakule ibane n’amalengekania w’eribugha indi mughulhu wosi bakendi syabya bakahebwa obuli kindu ekya bakanza.” a

Eribwira omwana wawu wuthi eyihi lino kikendi muwathikya erisyayibwira athi eyihi enyuma waho—ng’eky’erileberyako, amalengwako indi anywe ebibatsi ebikathamiraya, erikolha emyatsi y’engyingo athali ingira omwa butheke, kutse erisangira omwa yindi mitse mibi.

Wathikaya abaana bawu bayitheghereraye ebyanga lhwiririra omwa ebya bakakolha, bibye bibuya kutse bibi.

OMUSINGYI WE BIBLIA: “Ekyo mundu akahera kyo anemwendi syahulhulha.”—Abanya Galatia 6:7.

Omwana wawu atholere iniayitheghererya ngoku eby’akakolha binawithe ebikalhwiririramo kandi ngoku erithendibya n’omubere w’eriyikakirya mukalhwiririra ebitsibu. Ng’eky’erileberyako, mughalha wawu amabya iniakahithana lhuba-lhuba, abandi ibangan’anza erimuyihighulhako. Okwa lhundi lhuhandi, amakulha-kulhania amaaka w’eriyitheya akapumwa—kutse erilinda omwakanya k’eritabura—abandu ibakendianza eriyithunda okw’iyo. Wathikaya omwana wawu eriyitheghererya ngoku iniangana bana ebibuya bingyi amabya n’omubere w’eriyikakirya.

Kangiriraya omwana wawu eriminya ebikulhu kutsibu.

OMUSINGYI WE BIBLIA: “Minya ndeke ebikulhu kutsibu.”—Abanya Filipi 1:10, NWT.

Eriyikakirya sikwama kyayihighulha okw’ikolha ebithuwene; mwamuli erikolha ekikayithaghisibawa, nibya n’omughulhu siwuli tsemera erikikolha. Ni kikulhu erikangirirya omwana wawu erigha eriminya ebikulhu kutsibu n’eribikolha. Leka omwana wawu atsuke erikolha ebikulhu kutsibu. Ng’eky’erileberyako, atholere iniatsuka erikolha ehomu wako athali aghenda omwa by’eriyitsemesya.

Ibya eky’erileberyako kibuya.

OMUSINGYI WE BIBLIA: “Nabiribaha ekiminyisyo, imwakolha ngoku nabiribakolera.”—Yoane 13:15.

Omwana wawu akendi lhangira ngoku wukayithwa wukabya omwa mibere eyithetsemesaya kutse eyikaponesaya. Kanganaya omwa ky’erileberyako kyawu ngoku omubere w’eriyikakirya akalhwiririramo ebibuya. Ng’eky’erileberyako, omwana wawu amakolha ekithuwene, wukahithana kutse wukasighalha iwunathekene?