Abandu ab’olhukwamirwa ni bayiketherwa. Bakakwama-kwamanaya omubiiri ogho babirihebwa n’erighunziragho okwa buthuku.

Nomwakine indi abaana sibawithe amaaka aw’akaghunza, bangan’igha eribya ab’olhukwamirwa. Ekitabu Parenting Without Borders kikabugha kithi: “Amaaka w’omwana akatsuka erikolha akahikya amezi ikumi n’athano, n’eriyisunza liwe ly’erianza erikolha ekyosi-kyosi eky’akabwirawa likatsuka akahikya amezi nga ikumi namunani. Omwa syokalikya nyingyi omwana akabya akahikya emyaka ithano erihika okwa musanju ababuthi bakatsuka erimukangania ngoku angawathikya okw’ikolha emibiiri y’eka. Nomwakine indi bakine balere, abaana bakathoka erikolha ndeke emibiiri mingyi.”

Omwa yindi myanya, abalengwa bangyi bakalengaho erilhua eka eriy’ikalha aho wabu ibobene aliwe ibyayabalema neryo ibasuba eyiri ababuthi babu. Okwa bundi buthuku, eki kikabya kundi abalengwa abo sibath’eghesibwa ngoku bangakolesya ndeke esyosente, erikolha emibiiri y’eka, kutse erikolha emibiiri ya buli kiro.

Neryo, ni kibuya erikangirirya abaana bawu ngoku bangabya b’olhukwamirwa lino nuku basyaminya eky’erikolha bakakulha. Ekitabu How to Raise an Adult kikabugha kithi: “Siwutholere wukamemesya-memesya abaana bawu neryo babirihikya emyaka ikumi namunani ibbwa iwabalhwikira ekihugho.”

Bahe emibiiri y’eka ey’erikolha.

OMUSINGYI WE BIBLIA: “Omw’ikolha lyosi muli endundi.”—Emisyo 14:23.

Abaana banzire kutsibu erikolha haghuma n’ababuthi babu. Wangana kolesya eriyisunza ly’obuhangiranwa eri omw’iha abaana bawu b’emibiiri y’eka.

Abandi babuthi bakaghalhamirira okw’ekyo. Bakabugha bathi abaana bakabya ibanawithe ehomu waka nene y’erikolha obuli kiro, neryo busana naki ingathasyabaha eyindi mibiiri?

Aliwe, abaana abakakolha emibiiri y’eka bakabya ibangana kolha ndeke okwa sukuru, kundi emibiiri y’eka yikakangiriraya abaana eriligha esyongwamirwa n’erighunza emibiiri. Mbaghane n’ekyo, lhangira ekya ekitabu Parenting Without ­Borders kikabugha, “omughulhu thukaghana eriha abaana b’emibiiri y’erikolha omughulhu banzire kutsibu erikolha ibakine balere, thukaleka ibatsuka erilengekania bathi erikolera abandi si kikulhu . . . Kandi bakatsuka erilengekania bathi bakendi kolerwa ebindu byabu.”

Ngoku ekitabu ekyo kyamakangania, erikolha emibiiri y’eka likathendeka abaana eribya abakasangira omwa mubiiri butsira abakalya buyira, abakahithaya butsira abakahebawa. Emibiiri y’eka yikaleka abaana ibaminya ngoku bawithe omwanya w’obughuli omwa famile—n’eriminya ngoku banawithe ekya batholere erikolha.

Wathikaya abaana bawu eriminya ngoku bakendi heka ebikalhwiririra omwa bisobyo byabu.

OMUSINGYI WE BIBLIA: “Wuhulikirire erihanwa, wangirire erikangiriribwa; iwaminya eribya n’amenge oko biro byawu by’enduli.”—Emisyo 19:20.

Abaana bawu bamasobya—ng’eky’erileberyako, mughalha wawu kutse mwali wawu omw’ithendi kighenderera iniatsandya ekindu kyabene, isiwabisa. Abaana bangana ligha ebindu bibi ebikalhwiririramo—omwa mibere eyo, saba ekighanyiro kandi obundi nibya n’erisuba-subania ekiryatsandibawa.

Eriminya ngoku ni b’eriheka ebikalhwiririra omwa bisobyo byabu n’erilemererwa lyabu kikakangiriraya abaana

• eribya b’okwenene n’eriligha ebisobyo biwe

• eriyihighulha okw’itsweba bandi

• eriyihighulha okw’iyilhwira-lhwirako

• erisaba ekighanyiro, kikayithaghisibwa