Emilhondo eyo yikathondogholha emibere mwenda y’Ekikristayo: “Emikolere eyikalhua oko mulimu y’eyi: olhwanzo, obutseme, obuholho, eriyibombeka, obwenge, obubuya, erithendi leghulha, omuthima mwolho, eriyitheya.” Aliwe eyi si y’emibere misa eyo mulimu wa Nyamuhanga akathuwathikaya erithunga.

Lhangira ebya omukwenda Paulo atsuka erihandika: ‘Erikolha ly’omubiri ly’eri: erisingira, obukine, amaraghane, erisaba esyosanamu, erilhaghulha, obuyighu, erilhwa, obuha, erihithana, erineghena, erikangirirya ly’amabehi, eritsura, erikunda, erithamira, n’emyatsi yosi eyiri ng’eyi.’ (Gal. 5:19-21) Neryo Paulo mwathathondogholha ebindu byosi ‘eby’erikolha ly’omubiri,’ ng’ebikanibweko omwa Abanya Kolosai 3:5. Kuthya, abere akathondogholha emibere mwenda emibuya, mwabugha athi: ‘Sihali omughambo owakalhwa n’emyatsi eyi.’ Omwa mubughe w’Ekigiriki ebinywe “emyatsi eyi” byangana manyisaya “emyatsi ng’eyi.” Neryo Paulo syabya ng’oyukathondogholha emibere yosi emibuya eyo mulimu akathuwathikaya erithunga.

Thukayitheghereraya ekyo thukalinganisya emibere eyo n’ebyo Paulo ahandikira ekithunga kye Efeso: “Ekyakakalha kikaletha emisindo yosi y’ebibuya, n’ebithunganene, n’eby’ekwenene.” (Efe. 5: 8, 9) Kwenene, “ebibuya” kutse obubuya haghuma n’ebithunganene, n’eby’ekwenene, ni bighuma ky’okwa mikolere ‘y’ekyakakalha,’ aliwe kandi ni bighuma ky’okwa “mikolere eyikalhua okwa mulimu.”

Kandi, Paulo mwabwira Timoteo athi “wukwamirire erithunganene, erikenga Nyamuhanga, erikirirya, olhwanzo, erisika, erihehera”—emibere mukagha eyuwene. (1 Tim. 6:11) Eyisathu misa y’okw’iyo (erikirirya, olhwanzo, n’erihehera kutse omuthima mwolho) y’eyithondogherwe omwa “mikolere eyikalhua oko mulimu.” Aliwe kandi Timoteo angayithaghire omulimu erimuwathikya erithunga eyindi mibere nga: erithunganene, erikenga Nyamuhanga, n’erisika.—Linganisaya Abanya Kolosai 3:12; 2 Petero 1:5-7.

Neryo kwesi, Abanya Galatia 5:22, 23 sihali thondogholha emibere yosi y’Ekikristayo. Omulimu wa Nyamuhanga angana thuwathikya erithunga emibere mwenda “ey’emikolere eyikalhua oko mulimu.” Aliwe hali mibere mingyi eya thutholere ithwathunga thunemukulha bunyakirimu n’eribya “bandu bahya-bahya abahangikawa omwa kisosekanio kya Nyamuhanga, omwa bithunganene n’omo bibuyirire by’ekwenene.”—Efe. 4:24.