1-2. Ni myatsi yahi eyo Abema ba Yehova bakathwalha mwa mikulhu?

MUNABWIRE emyatsi mikulhu-mikulhu kutsibu eno yikathuhambako​—ehamuli ya Yehova ey’erithabalha n’eriyira erina liwe mwa libuyirire. Ithwe ng’Abema ba Yehova thukasima thukakania okwa myatsi mikulhu-mikulhu eyo. Aliwe, mbwino ehamuli ya Nyamuhanga ey’erithabalha n’erina liwe eriyirwa mwa libuyirire ni myatsi ibiri eyithahambangene? Eyihi.

² Ithwe bosi thwabiriminya ngoku erina lya Nyamuhanga litholere iry’eribwa kw’ebitsumi ebyosi. Kandi thwabirigha ngoku ehamuli ya Yehova ey’erithabalha, kutse emithabalire yiwe, yitholere iyakanganibwa ku ya yihikire. Neryo emyatsi ibiri eyosi eyi ni mikulhu-mikulhu.

3. Erina Yehova mwamuliki?

³ Erithwalira haghuma, erina Yehova mwamuli ebyosi ebihambire oku Nyamuhanga wethu, imwamune n’emithabalire yiwe. Thwamabugha thuthi eryerya erina lya Yehova kw’ebitsumi byosi kya kindu kikulhu, ithukendibya ithukabugha thuthi emithabalire ya Yehova yitholere iyakanganibwa ku y’eyuwene kutsibu. Erina lya Yehova lihambene n’emithabalire yiwe ng’Omuthabali omuthoki w’ebyosi.​—Lebaya akasanduko “ Ebiri omo Mwatsi Mukulhu.”

4. Esyonyimbo 135:13, NW hakakanaya hathi okwa lina lya Nyamuhanga, kandi ni bibulyo byahi ebyo thukendi subirya omo mwatsi ono?

⁴ Erina Yehova ni rina ly’embaghane. (Soma Esyonyimbo 135:13.) * Ni kyahi ekikaleka erina lya Nyamuhanga iryabya likulhu  kutsibu? Okw’itsuka, mulyakanibwako lithi nabi? Nyamuhanga akaliyira athi mwa libuyirire? Thwanga kolhaki eriwathikya erilhwira okwa lina liwe? Thukanaye okwa bibulyo ebyo.

5. Thwangana yibulya thuthiki bikahika okwa lina lya Nyamuhanga eriyirwa mwa libuyirire?

⁵ “Erina lyawu libye libuyirire.” (Mt. 6:9) Ekyo kya Yesu ahira embere omwa musabe. Aliwe ebinywe bya Yesu bikamanyisayaki? Eriyira ekindu mwa kibuyirire ly’erikyerya. Abandi bangana bugha bathi, ‘Erina lya Yehova ka linabuyirire, linahenirye, busana naki iryayirwa mwa libuyirire?’ Erisubirya ekyo, thutholere ithwalengekania okwa ekyo erina lik’imanira.

6. Ni kyahi ekikaleka erina iryabya ly’omughaso?

⁶ Erina si kinywe buyira. Lhangira ekya Biblia yikabugha: “Lyowene eriyisogha erina libuya kwilhaba ebindu bingyi.” (Emi. 22:1; Omu. 7:1) Busana naki erina iryabya ly’omughaso? Kundi erina mwamuli amalengekania agho abandi bawithe oko mwinye erina eryo. Emibere erina likahandikawamu​—kutse erisobolhwa​—si ky’ekikulhu; ekikulhu kutsibu ky’ekikasa omwa bulengekania bw’abandi bandu bakalhangira kutse eriowa erina eryo.

7. Abandu babiritsandya bathi erina lya Nyamuhanga?

⁷ Abandu bakabya bakabugha oku Yehova kw’amabehi, bakabya ibakamutsandaya kw’erina. Omwa nzira eyi, bakabya ibakatsweba Nyamuhanga n’eritsandya erina liwe. Nyamuhanga atsuka erikanibwako nabi n’eritsandibwa kw’erina omw’irima lye Edeni. Thulebaye ekya thukigha omw’eki.

8. Adamu na Eva babya ibanasiki, kandi hakabuthuka bibulyoki?

⁸ Adamu na Eva babya ibanasi erina lya Yehova n’ekwenene eyihambire okwa Mwinye erina eryo. Babya ibanasi ku ya Muhangiki, Oyuwabaha engebe, obwikalho obuwene e Paradiso, n’obutheke obuhikene. (Enz. 1:26-28; 2:18) Aliwe, banganalholire embere erikolesya amenge wabu awahikene erighanirya okwa byosi ebyo Yehova abya iniabiribakolera? Bangana kangenie ku banzire Yehova kandi ku bakamusima? Eby’erisubirya mubyalhangirika enzighu ya Nyamuhanga yikabalengako.

9. Ngoku kiri omwa Enzuko 2:16, 17 na 3:1-5, ni kyahi ekya Nyamuhanga abwira Adamu na Eva, kandi Sitani mwahengemya athi ekwenene eyo?

 ⁹ Soma Enzuko 2:16, 17 na 3:1-5. Omw’ikolesya enzoka eribya nga y’eyikakanaya, Sitani mwabulya Eva athi: “Ko Nyamuhanga abiribugha athi, Simusyerya okwa mithi yosi y’eririma kwehi?” Ekibulyo ekyo kyabya ikine mw’amabehi awabisamire awali ng’obutwa. Nyamuhanga abya iniabiribabwira athi banganalya okwa mithi yosi, kwihaho omughuma musa. Adamu na Eva babya ibanawithe emithi mingyi ey’eriryako. (Enz. 2:9) Yehova ni mwenge kutsibu. Aliwe, Nyamuhanga mwathanga Adamu na Eva erirya okwa bighuma by’omuthi mughuma musa. Kwesi Sitani mwahengemya ekwenene. Sitani mwaleka ikyalhangirika Nyamuhanga nga ni mukurungu. Eva angabya imwalengekania athi, ‘Mbwino hane ebibuya ebya Nyamuhanga abirinyibisa?’

10. Sitani mwahangirira athi Nyamuhanga, kandi mumwalhwiririraki?

¹⁰ Okwa ndambi eyo, Eva mwabya iniakinaghondere Yehova ng’Omuthabali wiwe. Mwasubirya Sitani omw’imubwira ebyonyine-nyine ebya Nyamuhanga abugha. Eva mwabugha athi nibya sibatholere bakathulha n’okwa muthi oyo. Abya inianasi ngoku erithendiowa ekihano kya Nyamuhanga mukalhua olhuholho. Sitani mwabugha athi: “Simwendisyaholha nahake.” (Enz. 3:2-4) Aho Sitani abya isyakibisirira. Abya iniali okw’ihangirira Nyamuhanga omw’ibwira Eva athi Yehova ni mubehi. Neryo Sitani mwabya diabolo, kutse omuhangiriri. Eva mwathebibwa kutsibu; mwaligha ebya Sitani. (1 Tim. 2:14) Eva mwamuyikethera omwakanya k’eriyikethera Yehova. Ekyo mukyaleka Eva iniathwamu nabi kutsibu. Mwathwamu erithendiowa Yehova. Mwalya ekighuma ekyo Yehova abya iniabirimuthanga. Enyuma w’aho mwaha na Adamu.​—Enz. 3:6.

11. Ababuthi bethu b’erimbere banganakolireki, aliwe mubalemwa erikolhaki?

¹¹ Thalengekania okwa bya Eva abya atholere eribwira Sitani. Thalengekania kw’abugha bino: “Singakwasi, aliwe nganasi Thatha waghe, Yehova, kandi ngamwanzire n’erimuyikethera. Ingye thuna Adamu abirithuha ebyosi ebyo thuwithe. Wangathoka wuthi erimubughako nabi? Wulhua hano!” Yehova angatsemire kutsibu mwali wiwe mwanze akabugha ebinywe bibuya ng’ebyo! (Emi. 27:11) Aliwe Eva syabya anzire ndeke Yehova; na Adamu kuthya. Adamu na Eva erilemwa erikangania Thatha wabu y’olhwanzo ng’olho, mubabya ibamalemwa erilhwira okwa lina liwe nuku siritsandibawe.

12. Sitani mwahira athi omwa bulengekania bwa Eva mw’erithika-thika, kandi Adamu na Eva mubalemwa erikolhaki?

¹² Ngoku thwabirilhangira, Sitani mwatsuka eritsandya erina lya Yehova omw’ileka Eva athika-thikire Yehova nga nina Thatha oyuwene. Neryo Adamu na Eva mubalemwa erilhwira okwa lina lya Yehova. Mubaligha ebya Sitani  neryo bamayisamambulha oku Thatha wabu. Ayo wana menge agho Sitani anemukolesya munabwire. Akatsandaya erina lya Yehova omw’imubughako amabehi awakalire. Abandu abakaligha amabehi wa Sitani bakalhuaho ibohibwa erighana obuthabali bwa Yehova obuthunganene.

13. Ezekieli 36:23 hakakanganaya hathi omwatsi mukulhu we Biblia?

¹³ Mbwino Yehova anganaghumira amabehi awakalire ng’ayo, ahathe eriyira eky’erikolha? Eyihi nahake! E Biblia eyosi yikathubwira ebya Yehova abirikolha erilhangira athi erina liwe likalhusibawako amabehi awahirawa kulyo omwa Edeni. (Enz. 3:15) Omwa bikuhi, thwangana bugha thuthi omwatsi mukulhu we Biblia w’ono: Yehova akayira erina liwe mwa libuyirire omw’ikolesya Obwami obukathabalhawa na Mughalha wiwe n’erisubya okwa kihugho kw’erithunganene n’obuholho. E Biblia muli omwatsi owakathuwathikaya eriyitheghererya ngoku Yehova akaberereraya ekighendererwa ky’eriyira erina liwe mwa libuyirire.​—Soma Ezekieli 36:23.

14. Ekya Yehova abirikolha busana n’eriyisamambulha eryabya omwa Edeni kyabiriyira kithi erina liwe mwa libuyirire?

¹⁴ Sitani abirilengaho kutsibu erilemesya Yehova eriberererya ekighendererwa kiwe. Aliwe Sitani abirilemerwa ighuma. E Biblia yikakanganaya ekya Yehova abirikolha, kandi yikakanganaya ngoku sihali oyuli nga Yehova Nyamuhanga. Ni kwenene, eriyisamambulha lya Sitani n’abosi abali okwa lhuhandi lhwiwe lyabirilethera Yehova y’obulhumi bunene. (Esy. 78:40) Nomwabine, Yehova abirikangania amenge, erighumisirizya, n’obulingirirania. Kandi abirikangania obuthoki bwiwe bunene omwa nzira nyingyi. Ekikulhu omwa byosi, abirikangania olhwanzo omo byosi akakolha. (1 Yn. 4:8) Yehova abirikolha buthumbya erilhangira athi erina liwe likabya libuyirire.

15. Sitani anemutsandya athi erina lya Nyamuhanga munabwire, kandi mwabirilhwiririraki?

¹⁵ Namunabwire Sitani akinakinaya erina lya Yehova Nyamuhanga. Akaleka abandu ibalengekania bathi Nyamuhanga syawithe  amaaka, obulingirirania, amenge, n’olhwanzo. Ng’eky’erileberyako, Sitani akalengesaya erikakasya abandu athi Yehova siya Muhangiki. Kandi abandu bamaligha ngoku Nyamuhanga aneho, Sitani akanza balighe bathi Nyamuhanga akabahirako olhukako kandi ebihano biwe bikalire kandi si by’obulingirirania. Kandi akakangiriraya athi Yehova syalikwa obulighe kandi athi ni mutsurumi oyukahisaya abandu b’omwa muliro kera na kera. Bamabiriligha amabehi ng’ayo, kikalhuaho ikyabanguhira erighana obuthabali bwa Yehova obuthunganene. Erihika aho Sitani akendi syathoghothibirwa, akendibya inianemubugha oku Yehova kw’amabehi awakalire, n’erianza erikulhusya oku Yehova. Anemwendithoka?

16. Ni kyahi ekya wangakolha ekyalema Adamu na Eva?

¹⁶ Yehova akalighira abandu abathahikene erisangira omw’iyira erina liwe mwa libuyirire. Ni bugha ambu, wanganakolha ekyalema Adamu na Eva. Nomwathune omwa kihugho ekyoswire mw’abandu abakatsandaya n’eritsuma erina lya Yehova, wanganalhwira okwa lina lya Yehova n’eribwira abandi​—ngoku Yehova abuyirire, athunganene, ni mubuya, kandi kw’awithe olhwanzo. (Isa. 29:23) Wangana sighika obuthabali bwiwe. Wangana bwira abandu ngoku obuthabali bwa Yehova busa bwa buhikire kandi ngoku bwa bukendi syalethera ebihangikwa byosi by’obuholho n’obutseme.​—Esy. 37:9, 37; 146:5, 6, 10.

17. Yesu mwaminyikalya athi erina lya Thatha wiwe?

¹⁷ Thukabya thukalhwira okwa lina lya Yehova, thukabya ithwamagherererya Yesu Kristo. (Yn. 17:26, NW) Yesu mwaminyikalya erina lya Thatha wiwe omw’ikolesyalyo n’erilhwira kulyo. Ng’eky’erileberyako, mwabya mbaghane oko Bafarisayo, kundi ibo omo nzira nyingyi mubaleka Yehova iniabya nga ni mutsurumi, oyuthesima, oyuthatsomene, n’oyutheghanyira. Yesu mwawathikya abandu erilhangira Thatha wiwe ku ni muyitheghererya, oyukaghumisirizaya, ow’olhwanzo, kandi oyukaghanyira. Kandi mwawathikya abandu eriminya Yehova erilhabira omwa mibere eyo agherererayamu ndeke emibere ya Thatha wiwe omwa ngebe yiwe yosi.​—Yn. 14:9.

18. Thwanga kolhaki erikangania ngoku ebya Sitani akabugha oku Yehova ni mabehi?

¹⁸ Nethu nga Yesu, thwangana bwira abandi  ebyo thwasi oku Yehova, erikangirirya abandu ngoku Nyamuhanga ni w’olhwanzo n’ow’olhukeri. Thwamakolha ekyo, thukakanganaya ngoku ebya Sitani akabugha oku Yehova ni mabehi. Thukayira erina lya Yehova mwa libuyirire, erileka abandu ibalhangiralyo mwa libuyirire. Nethu, thwangana gherererya Yehova. Ekyo kithokekene n’omwa thuthanahikene. (Efe. 5:1, 2) Ebya thukabugha n’ebya thukakolha bikabya bikakangania abandu kwenene Yehova ngali athi, thukabya ithwamayira erina lya Yehova mwa libuyirire. Thukayira erina eryo mwa libuyirire omw’iwathikya abandu eriminya ekwenene eyihambire oku Nyamuhanga. Kandi thukakanganaya ngoku abandu abathahikene banganabya bathaleghulha.​—Yobu 27:5.

19. Ebiri omu Isaya 63:7 bikathuwathikaya bithi eriminya ekitholere ikyabya kilhubirirwa kikulhu ky’erikangirirya lyethu?

¹⁹ Thulebaye ekindi ekyo thwangakolha. Thukabya thukakangirirya abandi ekwenene ye Biblia, mughulhu mungyi thukahira omuwatho oko hamuli ya Nyamuhanga y’erithabalha, ngoku Yehova yutholere erithabalha obuhangwa bwosi, kandi ekyo kihikire. Aliwe, nomwakine indi ni kikulhu eribakangirirya ebihano bya Nyamuhanga, ekilhubirirwa kyethu kikulhu ly’eriwathikya abandi erianza Yehova, Thatha wethu, n’eribya bathaleghulha okw’iyo. Neryo thutholere ithwahira okwa mibere mibuya ya Yehova kw’omuwatho, eribasoberera oyukahulhawamo Yehova nga ni Mundu oyuli athi. (Soma Isaya 63:7.) Thwamakangirirya thuthya, ithukendi leka abandi ibanza Yehova n’erimwowa kundi banzire eribya bathaleghulha okw’iyo.

20. Omwatsi owakakwamako akendi kania okuki?

²⁰ Neryo kwesi thwanga kolhaki erilhangira thuthi emibere yethu n’erikangirirya lyethu bikahamba ndeke okwa lina lya Yehova n’erileka abandi ibabya banywani biwe? Omwatsi owakakwamako akendi kania okwa kibulyo ekyo.