“Omuhughu waghe abere akanyitsukako amalhwa, munamuhamba n’erimukamulha. Nanza erimwitha.”​—Paul.

“Eka, n’akandu bbule-bbule ikakanyihithanaya. Ekyosi-kyosi ekya ngawako, mbulha ni kithumbi, ebindu by’erisathisya eby’abaana baghe, iningathulanga.”​—Marco.

Thwanganabya isithutsurumire thuthya. Aliwe, hakanayira ithwe bosi ithwalemwa eriyitheya kutse eriyikakirya. Eki kiri kithya kundi thwabirisighalya obuthahikana bw’omulhume w’erimbere ya Adamu. (Abar. 5:12) Abandi nga, Paul na Marco, kikabakalira eriyikakirya. Abandi kyangana bakalira erikakirya amalengekania wabu. Bakabera erilengekania okwa bindu ebikabubahisaya kutse ebikabaghunza amani. N’abandi kyangana bakalira eriyikakirya okwa busingiri, erikolesya obwabu bwa nabi, kutse ebibatsi ebikathamiraya.

Abakalemawa erikakirya amalengekania wabu, esyongumbu syabu, n’emikolere yabu mibi bangana tsandya esyongebe syabu. Aliwe thwangana yitheya okw’ekyo. Thuthi? Omw’ikulha-kulhania omubere w’eriyitheya kutse eriyikakirya. Erithoka erikolha ekyo, thukanaye okwa bibulyo bisathu bino: (1) Eriyikakirya niki? (2) Busana naki likayithaghisibawa? (3) Thwangabya thuthi n’omubere oyu, omughuma w’okwa “mikolere eyikalhua okwa mulimu”? (Gal. 5:22, 23) Neryo thukendi kania okwa kya thwangakolha hamabya ihakanayira ikyathukalira eriyikakirya.

Oyukayikakiraya syali anguhirira okwa buli kandu. Omwakanya k’ekyo, akayikakiraya okw’ibugha n’erikolha ebikaponesaya Nyamuhanga.

Yesu mwathukangania ekyo eriyikakirya likamanyisaya. E Biblia yikabugha yithi: “Kandi omughulhu atsumawa, mwathaswatsumabo, omughulhu aghalhawa mwathubahya, nikwa mwayihira omo byalha by’oyukatswera ebithunganene, ye Nyamuhanga.” (1 Pet. 2:23) Yesu mwayikakirya abahakani bakamusiningulira iniane okwa muthi w’amaghali. (Mt. 27:39-44) Ahanyumaho, mwanayikakirya abasondoli b’edini bakanza erimuthegha omwa binywe biwe. (Mt. 22:15-22) Kandi mwathuhiriraho eky’erileberyako Abayuda abahithene bakamughusako amabwe! Omwakanya k’erithuhulya, “Yesu mwayibisa, mwalhua omo hekalu.”​—Yn. 8:57-59.

Mbwino thwangana gherererya Yesu? Thwangana mugherererya, okwa lhulengo lhulebe. Omukwenda Petero mwabugha athi: “Kristo nibya mwaghalhwa busana nenyu, neryo mwabasighira olhughobe olho mwangakwama.” (1 Pet. 2:21) Nomwakine indi sithuhikene, thwangana gherererya ndeke eky’erileberyako kya Yesu eky’eriyikakirya. Busana naki thukayithagha erikolha ekyo?

Thutholere ithwabya n’omubere w’eriyikakirya erithoka eritsemesya Yehova. Nomuthwangabya ithwabirikolera Yehova buthaleghulha habw’obuthuku buuli, thwangana tsandya obughuma bwethu nayu thwamathendi yikakirya omwa bya thukakolha n’eribugha.

Thalengekania oku Musa oyuwabya “mundu mwolho, kwilhaba abandu bosi ababya omo kihugho” okwa buthuku obo. (Emig. 12:3) Myaka mingyi inianemughumisirizya eriyineghenia ly’Abaisraeli, Musa mwalemwa eriyikakirya. Mwahithana bakathasyayineghenia busana n’eribulha amaghetse. Mwatsurumira abandu, amabugha athi: “Lino muhulikirire, inywe mukathupona, thukendi bahulhukirya amaghetse erilhua omw’ibwe eri kwehi?”​—Emig. 20:2-11.

Musa mwalemwa eriyikakirya. Mwathakangania ngoku Yehova yulyakolha ekithiko-thiko ky’eribaha amaghetse. (Esy. 106:32, 33) Busana n’ekyo, Yehova mwathamulighira eringira omwa Kihugho Ekyalhaghanisibawa. (Emig. 20:12) Erihika okw’iholha liwe, Musa angabya iniabya inianemuyikubyabwomo busana n’erilemwa eriyikakirya.​—Ebi. 3:23-27.

Thuk’ighaki? Nomuthwangabya ithwabirighunza omo kwenene mw’emyaka mingahi, sithutholere thukabugha kithya-kithya n’abakathuhithanaya kutse abakayithagha erihengulhwa. (Efe. 4:32; Kol. 3:12) Ni kwenene, thukabya thunemukulha, omubere wethu w’erighumisirizya angana ghenda akakeha. Aliwe ibuka Musa. Sithwanganza nahake eritsandya obughuma bwethu na Yehova omw’ilemwa eriyikakirya. Thwanga kolhaki eribya n’omubere w’omughaso oyu?

Saba omulimu abuyirire. Busana naki? Kundi eriyikakirya ni mubere mughuma w’okwa mikolere y’omulimu wa Nyamuhanga, kandi Yehova akaha omulimu wiwe abakamusabagho. (Lk. 11:13) Yehova angana thuha amaaka agho thukayithagha erilhabira omwa mulimu wiwe. (Fil. 4:13, NW) Kandi angana thuwathikya eribya n’eyindi mikolere y’omulimu, ng’olhwanzo, olhwanga thuwathikya erighumya omubere wethu w’eriyikakirya.​—1 Kor. 13:5.

Yitheghaye okwa kyosi-kyosi ekyanga tsekya omubere wawu w’eriyikakirya. Ng’eky’erileberyako, yihighule okwa mithahulha ye Intaneti  n’eby’eriyitsemesya ebiri mw’emibere mibi. (Efe. 5:3, 4) Erithwalira haghuma, thutholere ithwayihighulha okwa kyosi-kyosi ekyangaleka ithwakolha ekindu kibi. (Emi. 22:3; 1 Kor. 6:12) Ng’eky’erileberyako, omundu oyukohibawa lhuba erikolha eby’obutswatswa atholere iniayihighulira ighuma okwa bitabu n’emisathu eyiri mw’eby’obusingiri.

Kyangana thukalira erighendera okw’ihabulha eri. Aliwe, thwamahiraho akaghalha, Yehova iniakendi thuha amaaka agho thukayithagha eriyikakirya. (2 Pet. 1:5-8) Akendi thuwathikya eriyikakirya omwa malengekania, emibughire, n’emikolere. Eky’erileberyako ni Paul na Marco, abathulyakanayako ahighulhu, abosi mubigha eriyikakirya. Thalengekania n’oku mughalha wethu oyuwabya akahithana lhuba-lhuba iniane akaghendya ematoka, nibya iniatoka n’abandi abakaghendaya. Mwakolhaki? “Iningasaba kutsibu obuli kiro. Ining’igha emyatsi eyihambire okw’iyikakirya n’erihambira omwa muthwe mw’emilhondo ye Biblia. Nomwakine indi munakolha eki habw’emyaka mingyi, obuli kiro ngabya inganemuyibukya ngoku ngatholere ingayikakirya. Neryo ngahongoka lhuba nuku singaharabane.”

Hakanayira, ithwalemwa eriyikakirya. Ekyo kyamabya, ithwangana sagha erikania na Yehova omwa musabe. Aliwe eyo y’endambi y’erisaba Yehova ya kutsibu. Neryo saba Yehova aho naho. Musabe ekighanyiro, musabe obuwathikya, kandi ithwamu erithendi subira ekisobyo ekyo. (Esy. 51: 9-11) Isiwalengekanaya wuthi Yehova syendi hulikirira omusabe wawu owakalhua okwa muthima. (Esy. 102:17) Omukwenda Yoane akathwibukaya athi omusasi wa Mughalha wa Nyamuhanga “akathweraya kw’ebibi byosi.” (1 Yn. 1:7; 2:1; Esy. 86:5) Wibuke ngoku Yehova akabwira abaghombe biwe athi ibaghanyira mughulhu wosi. Neryo thwangana yikethera ngoku nayu akendi thukolera ekiri ng’ekyo.​—Mt. 18:21, 22; Kol. 3:13.

Yehova mwapona Musa akalemwa eriyikakirya habw’akathuku kake omo mbwarara. Aliwe, Yehova mwamughanyira. Kandi Ekinywe kya Nyamuhanga kikabugha kithi Musa abya muthaleghulha kutsibu oyo thutholere ithwagherererya. (Ebi. 34:10; Ebr. 11:24-28) Yehova mwathalighira Musa eringira omwa Kihugho Ekyalhaghanisibawa, aliwe akendisyamuthangirira omwa kihugho Paradiso n’erimuha engebe y’erikotha. Nethu thwangana syabana engebe eyo thwamalengaho eribya n’omubere w’eriyikakirya ow’akayithaghisibawa.​—1 Kor. 9:25.