1. Yehova ali athi ng’omubire?

“KO OMUKALI anganathoka eribirirwa omwana wiwe oyukonga?” Yehova mwabulya ekibulyo ekyo omwa biro by’omuminyereri Isaya. Nyamuhanga mwabwira abandu biwe athi: “Aba bangan’ibirirwa, nikwa ingye sinendisyakwibirirwa.” (Isa. 49:15) Mughulhu mungyi syali yilinganisaya n’omubire. Aliwe hano mwakikolha. Yehova mwakolesya olhwanzo olhukabyaho ahakathi-kathi ka mama n’omwana wiwe erikangania ngoku anzire kutsibu abaghombe biwe. Abamama bangyi bangana lighirana n’ekya mwali wethu ya Jasmin akabugha, “Wukabya wukalembera omwana wawu, wukamuthungira olhwanzo lhw’embaghane olhwa kera na kera.”

2. Yehova akayowa athi omughuma w’okwa baana biwe akamuyisununulhako?

² Yehova akalhangira omughuma w’okwa baana biwe akaleka eribya bughuma n’ekithunga ky’Ekikristayo n’erileka erisangira omwa mubiiri w’erithulira. Thalengekania ng’akalhumawa bungahi akalhangira abaghombe biwe banene bakasebebera * obuli mwaka.

3. Yehova anzire kyahi?

³ Abangyi b’okwa balikyethu banzwa ababirisebebera aba bakanasuba omwa kithunga, neryo thukatsema bakasubulha! Yehova anzire ibasubulha, nethu kuthya. (1 Pet. 2:25) Thwanga bawathikya thuthi erisubulha? Thuthe thwasubirya ekibulyo ekyo, kyanganabya kibuya eritsuka eriminya ekikaleka abandi  ibaleka erihindana n’erisangira omw’ithulira.

4. Omubiiri w’ekihugho angana hamba athi okwa bandi?

⁴ Abandi bakahira omubiiri w’ekihugho w’embere omwa ngebe syabu. Hung, * oyuwikere e Southeast Asia akabugha athi: “Iningakolesaya ndambi nene n’akaghalha omwa mubiiri w’ekihugho. Omwa bukiru munayibwira indi kunabya mugaga ambi ngathoka erikolera Yehova ya ndeke. Neryo endambi eyosi iningabya ingane okwa mubiiri. Munatsuka eribulha okwa mihindano, erighunzerera munaleka eribya ingahindana. Sitani akakolesaya ekihugho erilengemerya abandu nuku lyolho-lyolho baleke erikolera Nyamuhanga.”

5. Mwali wethu mwakolhaki akabana ebitsibu ekindi omwa kindi?

⁵ Abandi balikyethu bawithe ebitsibu bingyi ebikababbuna omuthima. Anne owe Britain awithe abaana bathanu. Akabugha athi: “Omughuma w’okwa baana baghe mwabuthwa ini mulema kutsibu. Endambi muyahika omughuma w’okwa bali baghe amahighithwa na mughalha waghe amasisira kw’obwongo. Ebirengekanio mubyabya binene kutsibu namahika n’okw’ileka emihindano n’erithulira. Neryo munasebebera.” Thukalirikana haghuma na Anne n’eka yiwe n’abandi bosi abali omwa bitsibu ng’ebi!

6. Erithendi ghendera okwa biri omu Abanya Kolosai 3:13 kyangaleka kithi omundu iniaseghera haali oku Yehova?

⁶ Soma Abanya Kolosai 3:13. Abandi baghombe ba Yehova babirithwikalya abandi balikyabo. Omukwenda Paulo mwakangania ngoku hakanayira mulikyethu iniabya iniawithe “omwatsi oko wundi.” Nibya thwanganabya ithwabirikanganibwa obuthe bulingirirania. Thwamathendi yitheya, ithwangana hiririkana. Erihithana kutsibu iryangana leka omundu iniaseghera haali okwa bandu ba Yehova. Thalengekania oku Pablo, mughalha wethu w’omwa Amerika y’Eyikwa. Omundu mwamubughako amabehi, neryo kyamaleka inialhusibwako olhusunzo omwa ekithunga. Mwakolhaki? Pablo akabugha athi: “Munahithana, neryo lyolho-lyolho namaseghera haali okwa kithunga.”

7. Omundu eribya n’obunyamuthima-thima obukamuhandikirira kyangamuhambako kithi?

⁷ Kutse omundu amabya n’obunyamuthima-thima obukamuhandikirira busana n’eribya imwathwa ekihano kya Nyamuhanga kera kyangana letha obulhumi, ikyaleka iniayowa Nyamuhanga nga syangathasyamwanza. Nomwangabya imwayisubamo n’erighanyirwa, inianganayowa athi syakitholere ndeke eribya omwa bandu ba Nyamuhanga. Mughalha wethu Francisco mwayowa athya. Akabugha athi: “Munakungwa (erihirwa omwa karipiyo) busana n’obusingiri. Nomwakine indi munanabya inganemuhindana, munabbunika omuthima n’eriyowa isingatholere eribya omwa bandu ba Yehova. Obunyamuthima-thima bwaghe mubwanyilyambya, kandi namayikakasya indi Yehova syathanyighanyira. Endambi muyahika namaleka emihindano n’erithulira.” Balikyethu abawithe ebitsibu ebiri ng’ebya thwamabirikaniako wukabalhangira wuthi? Wukanabalhumirirawa? Kandi ekikulhu kutsibu, Yehova akayowa athi busana nabu?

8. Yehova akan’ibirirawa abanamukolere? Soborera.

⁸ Yehova syalibirirawa abanabya bakamukolera aliwe ibabya ibabirisebebera; kandi syalibirirawa ebyo bakolha omwa mubiiri wiwe. (Ebr. 6:10) Omuminyereri Isaya mwahandika eky’erileberyako ekyuwene ekikakanganaya  ngoku Yehova akatsomana abandu biwe. Isaya mwahandika athi: “Asyalisya ekihangulho kiwe ng’omulisya, asyabaghalira ebyana by’esyombuli omwa byalha biwe, n’erihekabyo oko kikuba kiwe.” (Isa. 40:11) Omulisya Mukulhu akayowa athi enguma y’okwa syombuli siwe yamayisununulha omwa kihangulho? Yesu mwakangania eriyowa lya Yehova akabulya abigha biwe athi: “Mukaghanirayaki? Omundu amabya awithe esyombuli ighana, n’enguma ya kusyo yamathalha, akendisighania esyombuli makumi mwenda n’omwenda oko bithwa, n’eriyasonda-sonda embuli eyiryathalha. Neryo amabanayo, kwenene ngabugha nenyu, akatsemerayo kwilhaba amakumi mwenda n’omwenda esithethathalha.”​—Mt. 18:12, 13.

9. Omwa buthuku bwe Biblia, abalisya babuya ibakatsomana bathi esyombuli syabu? (Lebaya ekisasani ky’okwa kidipa.)

⁹ Busana naki kitholere erilinganisya Yehova n’omulisya? Kundi omwa buthuku bwe Biblia omulisya mubuya iniakatsomana kutsibu esyombuli siwe. Ng’eky’erileberyako, Dawudi mwalhwa n’endale n’edubu eritheya esyombuli siwe. (1 Sam. 17:34, 35) Omulisya mubuya iniakaminya n’embuli nguma yamabulha. (Yn. 10:3, 14) Omulisya ng’oyo iniakasigha esyombuli 99 omwa mwanya owuwene kutse iniasisighira owundi mulisya neryo iniayasondya eyathere. Yesu mwakolesya eky’erileberyako ekyo erithweghesya ekwenene nyikulhu eno: “Lithya Thatha waghe oyuli elhubulha syanzire omughuma w’oko baana balere aba akahera.”​—Mt. 18:14.

10. Ngoku kiri omu Ezekieli 34:11-16, ni kyahi ekya Yehova alhagha erikolera esyombuli siwe esithere?

¹⁰ Yehova anzire obuli mughuma w’okw’ithwe, imwamuli na “baana balere” ababirilhua omwa kihangulho kiwe. Erilhabira omwa muminyereri Ezekieli, Nyamuhanga mwalhaghanisya athi iniakendi sondya esyombuli siwe esyanga thalha n’erisiwathikya erithasyabya bughuma nayu. Kandi mwahulha ebindu birebe ebyo akendisyakolha erisilhamya, ebindu ebya omulisya Omuisraeli abya akakolha embuli yiwe yamathalha. (Soma Ezekieli 34: 11-16.) Eky’erimbere, omulisya iniakasondaya embuli, ekindu ekyabya kikayithagha endambi nene n’akaghalha. Neryo iniakabya amabiribanayo, iniakalethayo omwa kihangulho. Kandi, embuli yamabya iyihuthere kutse iyabiriwira, omo lhwanzo omulisya iniakawathikayayo, iniaboha ebironda, iniahekayo, n’erihayo eby’erirya. Abasyakulhu, abalisya ‘b’ekihangulho’ kya Nyamuhanga, batholere ibakolha ebindu ibyan’ebyo eriwathikya owosi-wosi oyukayisununulha okwa kithunga. (1 Pet. 5:2, 3) Abasyakulhu bakabasondaya, ibabawathikya erisuba omwa kithunga, n’eribakangania olhwanzo omw’ibaha obuwathikya bw’obunyakirimu obukayithaghisibawa. *

11. Omulisya mubuya iniakabya inianasiki?

¹¹ Omulisya mubuya iniakabya inianasi ngoku embuli yangana thalha. Kandi embuli iyikabya yamasighania ekihangulho, omulisya isyalikolhayo nabi. Lebaya eky’erileberyako ekyo Nyamuhanga ahiraho akawathikya abaghuma b’okwa baghombe biwe abamusighanaya habw’akathuku kake.

12. Yehova mwakolongana athi na Yona?

¹² Omuminyereri Yona mwathibitha amasighania omubiiri wiwe. Nomwabine, Yehova mwathalhuaho akaghana Yona. Ng’omulisya mubuya, Yehova mwamulhamya n’erimuwathikya erithunga amaaka ogho abya akayithagha eriberererya omubiiri wiwe. (Yona 2:7; 3:1, 2) Enyuma waho, Nyamuhanga mwakolesya olhungu eriwathikya Yona eriyitheghererya omughaso w’engebe y’obuli mundu. (Yona 4:10, 11) Thuk’ighaki? Abasyakulhu sibatholere bakalhuaho bakalekerania oyuwabirisebebera. Omwakanya k’ekyo, abasyakulhu bakalengaho eriminya ekyamaleka embuli iyalhua omwa kihangulho. Kandi embuli eyo yamasuba oku Yehova, abasyakulhu bakalholha embere erimukangania olhwanzo n’erimutsomana.

13. Ekya Yehova akolha erikwamana n’emibere eya omuhandiki w’Esyonyimbo 73 ayisangamu, kikathweghesayaki?

¹³ Omuhandiki w’Esyonyimbo 73 mwahwa  amani akalhangira ababi bakabya nga bali omwa ngebe eyuwene. Iniakabulha erikolera Nyamuhanga nga linawithe mughaso. (Esy. 73:12, 13, 16) Yehova mwakolhaki? Mwathamutsweba. Nyamuhanga mwahira ebinywe by’omuhandiki w’esyonyimbo oyu by’omwa Biblia. Erighunzerera, omuhandiki w’esyonyimbo oyu mwaminya ngoku eribya munywani wa Yehova kya kindu kikulhu omwa ngebe. (Esy. 73:23, 24, 26, 28) Thuk’ighaki? Abasyakulhu sibatholere bakatsweba lhuba-lhuba abakabulha erikolera Yehova nga linawithe mughaso. Omwakanya k’eribatsweba, abasyakulhu batholere ibaminya ekikaleka ibabugha n’erikolha bathya. Neryo abasyakulhu imubakendi minya Amasako awatholere agho bangabawathikyamo.

14. Ni kyahi ekyaleka Eliya iniabya iniakayithagha obuwathikya, kandi Yehova mwamuhabo athi?

¹⁴ Omuminyereri Eliya mwathibitha akasagha Omwami-kali Yezebeli. (1 Bam. 19:1-3) Mwalengekania athi sihakiri muminyereri wa Yehova na mughuma, kandi mwayowa ng’akanubira busa. Eliya mwahwa amani amayisunza n’olhuholho. (1 Bam. 19:4, 10) Omwakanya k’eritsweba Eliya, Yehova mwamukakasya ngoku syali iyuwene, athi ayikethere amaaka wa Nyamuhanga, kandi athi akinawithe mubiiri munene w’erimukolera. Omwa lhukeri, Yehova mwahulikirira Eliya kandi amamuha eyindi mibiiri y’erikolha. (1 Bam. 19:11-16, 18) Thuk’ighaki? Ithwe bosi, kutsibu-tsibu abasyakulhu, thutholere ithwathwalha esyombuli sya Yehova omwa lhukeri.  Mbulha omundu amabugha athi ahithene kutse athi Yehova syangamughanyira, abasyakulhu bakamuhulikirira akababwira ebiri okwa muthima. Neryo bakalengaho erikakasya embuli eyithere eyo ngoku Yehova anzireyo.

15. Ngoku kiri omu Yoane 6:39, Yesu mwalhangira athi esyombuli sya Thatha wiwe?

¹⁵ Yehova anzire ithwayowa thuthi busana n’esyombuli siwe esithere? Thwangan’ighira okwa ky’erileberyako kya Yesu. Mwaminya ngoku esyombuli sya Yehova esyosi ni sy’obughuli embere sya Nyamuhanga, neryo Yesu mwakolha ekyosi-kyosi ekyo angathoka eriwathikya “esyombuli esiherire sy’enyumba ya Israeli” erisuba oku Yehova. (Mt. 15:24; Lk. 19:9, 10) Kandi, Yesu omulisya mubuyanga, mwakolha ekyosi-kyosi ekyo angathoka nuku syaheraye embuli ya Yehova eyosi-yosi.​—Soma Yoane 6:39.

16-17. Abasyakulhu banga wathikya bathi ababirisighania ekithunga? (Lebaya akasanduko “ Ngoku Embuli Eyithere Yanga Yowa.”)

¹⁶ Omukwenda Paulo mwahira omwa basyakulhu b’ekithunga ky’Efeso mw’omuhwa w’erigherererya eky’erileberyako kya Yesu. “Litholere imwawathikya abandu bolho, kandi mwibuke ebinywe ebyo Mukama Yesu abugha iyuwene-wene athi, Erihithya likaletha obutseme kwilhaba erihebwa.” (Emib. 20:17, 35) Omo kwenene, munabwire abasyakulhu bawithe olhukwamirwa olhulithohire lhw’eritheya abandu ba Yehova. Salvador omusyakulhu w’ekithunga e Spain akabugha athi: “Ngabya ingalengekania oko kaghalha aka Yehova akahiraho akatsomana esyombuli siwe esithere, ngayowa ingatholere erikolha ekyosi-kyosi ekyo nangathoka eriwathikyasyo. Ingye ng’omulisya w’obunyakirimu, nganasi ngoku Yehova anzire ingasitsomana.”

¹⁷ Abosi abali omo mwatsi ono ababya ibabiriyisununulha mubawathikibwa erisuba oku Yehova. Okwa ndambi eno, n’abandi bangyi ababiriyisununulha bananzire erisuba oku Yehova. Omwatsi owakakwamako akendi syakania buuli okwa bya thwanga kolha eribawathikya erisuba oku Yehova.