OMWATSI W’OKWA KIDIPA | OW’OKW’IWE AMAHOLHA
Nina Kibi Eribya Omwa Bulighe?
Wunewatha lhwalha habw’obuthuku buke? Obundi muwalhama lhuba erihika n’okw’ibirirwa ngoku wulhue wulhwere. Aliwe, obulighe bw’eriholerwa ibo kwa buthe buthya. Dokita Alan Wolfelt, omwa kitabu kiwe ekya Healing a Spouse’s Grieving Heart mwahandika athi: “Sihali ekikalire ‘ng’erighumira’ obulighe bw’eriholerwa.” Aliwe akathasya bugha athi: “Obuthuku bukabya bunemulhaba n’abandi banemukuhumulikania, obulighe bukaghenda ibunemukeha.”
Ng’eky’erileberyako, thalebya thatha-kulhu Abrahamu nga mwakolhaki mukali wiwe akaholha. E Biblia yikabugha yithi “Abrahamu mwatsuka eririra Sara n’erisusumana busana nayu.” Eribugha yithi Abrahamu “mwatsuka,” kikakanganaya ngoku mwanathwalha buthuku iniane omwa bulighe. * Owundi oyuwabya omwa bulighe ahabw’omughulhu muuli ni Yakobo. Mubamutheba ambu ekisoro kyabir’itha mughalha wiwe, Yozefu. Mwaghunza “ebiro bingyi” iniane omwa bulighe kandi n’ab’okw’iyo isibangathoka erimuhumulikania. Muhalhaba myaka mingyi olhuholho lhwa Yozefu ilhukina mulyambaya.—Enzuko 23:2; 37:34, 35; 42:36; 45:28.
Kwabine bithya namunabwire okwa bangyi abakaholerawa ab’okw’ibo. Thalebya eby’erileberyako bibiri bino.
-
Gail, ow’emyaka 60 akabugha athi: “Mwira waghe, Robert, mwaholha biro 9 Okwomusanju, 2008. Ekiro athungira mwe aksidenti eyamwitha, kyanabya ng’ebindi biro. Thwabere thwabirirya eky’engyakya, muthwalyatsirirana, thwamawanako, n’eribwirana thuthi ‘ngakwanzire’ ngoku thwanabya thukakolha buli kiro akayaghenda okwa mubiiri. Eno ni myaka mukagha obulighe ibukine omwa muthima. Singasi obulighe bw’eriholerwa mwira waghe Rob nga bune mwendisyahwa omwa muthima.”
-
Etienne ow’emyaka 84 akabugha athi: “Nomwakine indi hamabirilhaba emyaka eyilhabire omu 18 mukali waghe aliholire, ngakinamukandira kandi ngakine omwa bulighe. Ngabya ingalhangira akandu akakatsemesaya, ngamw’ibuka, kandi inalengekania nayu ng’alyendi yowa athi akakalhangira.”
Neryo kwesi, ni kya buli kiro eribya omwa bulighe ahabw’omughulhu muuli. Obuli mundu awithe ngoku akakwa obulighe, neryo sikyangabya ky’amenge eritsweba omundu busana n’emibere akayithwaliramu akawa kw’olhuholho. Kandi nawu siwutholere wukayitsweba wamayowa obulighe bwawu nga bwabirilhabirirania. Thwanga ghumira thuthi obulighe obu?
^ enu. 4 Mughalha wa Abrahamu ya Isaka nayu mwaghunza biro binene iniane omwa bulighe. Abya iniakine omwa bulighe bw’eriholerwa mama wiwe Sara ihamabirinalhaba myaka isathu aliholire.—Enzuko 24:67.
