1, 2. (a) Abema ba Yehova bakalhangira bathi e Biblia? (b) Ni kitsweka kyahi omwa Biblia ekya wanzire kutsibu?

ABEMA BA YEHOVA banzire e Biblia. Muli obusondoli obuwene kandi yikathuhumulikanaya n’erithuha amaha. (Abar. 15:4) Sithuli lhangira e Biblia nga ni malengekania w’abandu, aliwe thukalhangirayo ini “kinywe kya Nyamuhanga” kwenene.—1 Tes. 2:13.

² Ahathe erithika-thika, ithwe bosi, obuli mundu anawithe omwa Biblia mw’ehitsweka ehy’anzire kutsibu. Kutsibu-tsibu abandi banzire ebitabu by’Enjiri, ebikakanganaya emibere mibuya ya Yehova eyikalhangirika omu Mughalha wiwe. (Yn. 14:9) Abandi bakatsemera ebitabu ebiri mw’amaminyereri—obundi ng’ekitabu ky’Eribisulirwa, ekikakanaya okwa myatsi eyikayabya. (Erib. 1:1) Kandi ni bangyi abakahumulikanibawa bakasoma ebiri omwa kitabu ky’Esyonyimbo n’abandi ibigha bingyi omwa kitabu ky’Emisyo. Omo kwenene, e Biblia ni kitabu ky’obuli mundu.

3, 4. (a) Thukalhangira thuthi ebitabu byethu? (b) Ni bitabu byahi ebya thukabana ebikolirwe busana n’abandu balebe?

³ Kundi thwanzire e Biblia, thwanzire n’ebitabu byethu ebiseghemere okwa Biblia. Ng’eky’erileberyako, thukatsemera ebyalya by’obunyakirimu ebya thukathunga erilhabira omwa bitabu, esyobrokyuwa, esyogazeti, n’ebindi bitabu. Thunasi ndeke ngoku ebya Yehova akathuha  ebi bikathuwathikaya eribya ithunabukire bunyakirimu, ithun’ughuthire ndeke, ‘n’erikalha omw’ikirirya.’—Tito 2:2.

⁴ Omwa bitabu ebikahulhukibawa busana n’Abema ba Yehova, mukabya imune n’ebihandikirwe busana n’erighasira abandu balebe. Eyindi myatsi yikahulhukibawa busana n’erighasira abalere; n’eyindi busana n’eriwathikya ababuthi babu. Emyatsi mingyi eyikabya omwa bitabu byethu n’okwa muthahulha wethu we Intaneti yikatheghekawa erighasira n’abathe Bema ba Yehova. Ebyalya by’obunyakirimu eritsogha bithya kikathukanganaya ngoku Yehova abiriberererya ekyo ayilhagha athi “asyakokothya erirya inene ly’ebindu ebinunire.”—Isa. 25:6.

5. Ni kyahi ekya Yehova akasima thukakolha?

⁵ Abangyi omw’ithwe thukanayowa thuthi ambi ithwabana obuthuku obukaghunza erisoma e Biblia n’ebitabu byethu. Yehova akasima akaghalha akathukahiraho erikolesya ndeke obuthuku bwethu omw’isoma e Biblia n’eriyeghesya mughulhu wosi. (Efe. 5:15, 16) Ni kwenene kyangana kalha eriyeghesya ebyosi by’obunyakirimu okwa lhulengo lhughumerere. Aliwe busana n’ekyo, hane ekithegho ekyathutholere ithwayitheyako. Ni kyahi?

6. Ni byahi ebyangaleka ithutha ghasirwa ndeke omwa bindi by’obunyakirimu ebya Yehova akathuha?

⁶ Thwamathendi yitheya ithwangana lengekania thuthi ebindi byalya birebe by’obunyakirimu sibirithuhambako. Ng’eky’erileberyako, ekitsweka kirebe kye Biblia kyamabya nga sikihambire okwa mibere yethu, iwukendi kolha wuthi? Kandi ibbwa kyamabya indi omwatsi owali omwa kitabu kirebe atheghekawa kutsibu-tsibu busana n’abandu balebe, isithwe? Mbwino omwatsi ng’oyo thukasomagho eyighulhu-ghulhu kutse nibya n’erikyurukagho? Kyamabya ikwakiri kithya, ithukendibya ithukayithalhaya okwa myatsi y’omughaso munene eyangana thughasira. Thwanga yitheya thuthi okw’ibya n’amalengekania ng’aya? Ekikulhu, obuli mughuma w’okw’ithwe atholere iniaminya ngoku Nyamuhanga ya Ngununuko y’ebyalya by’obunyakirimu. Erilhabira omwa muminyereri Isaya, Nyamuhanga mwabugha athi: “Ingye indi Mwami Mukulhu Nyamuhanga wawu, oyukakukangiriraya wubane endundi.” (Isa. 48:17) Kikendi thuwathikya erilebya ebindu bisathu ebyanga thuthokesya erighasirwa omwa bitsweka byosi bye Biblia n’ebyalya muthina-muthina by’obunyakirimu ebya thukahebawa.

7. Busana naki thutholere erisoma e Biblia n’omuthima w’eryanza erigha?

⁷ Soma iwune n’omuthima w’eryanza erigha. E Biblia yikabugha ndeke-ndeke yithi ‘Amasako wosi Nyamuhanga yuwatheghekanayagho kandi ali n’endundi.’ (2 Tim. 3:16) Kwenene, omwa Biblia mune emyatsi eyahandikawa busana n’omundu mulebe kutse ekithunga kirebe. Ekyo ky’ekikaleka ithwabya ithutholere erisoma e Biblia n’omuthima w’eryanza erigha. Mughalha wethu mughuma akabugha athi, “Ngabya ingasoma e Biblia, ngalengaho eriyibukya ngoku omwa mwatsi owa ngasoma mwanganabya bingyi ebya nang’ighirako.” Akathasy’ongerako athi: “Eribya ingan’ibukire ekyo kikaleka inalhangira n’awandi masomo awabisamire.” Omughulhu thukayasoma Ekinywe kya Nyamuhanga, ni kibuya erisaba Yehova y’omuthima w’erigha n’amenge w’eribana amasomo awa Yehova anzire ithw’igha.—Ezr. 7:10; soma Yakobo 1:5.

8, 9. (a) Ni bibulyo byahi ebya thwanga yibulya thukasoma e Biblia? (b) Ebya Yehova akayithagha okwa basyakulhu bikathukanganayaki okw’iyo?

⁸ Ibya Iwunemuyibulya. Ambi wukasoma omwatsi mulebe omwa Biblia, iw’imana hake n’eriyibulya ebibulyo nga bino: ‘Omwatsi oyu akambwiraki oku Yehova? Nangakolesya indi omwatsi oyu omwa ngebe? Nangakolesyagho indi eriwathikya abandi?’ Thwamalengekania okwa bibulyo ng’ebi, ithukendi ghasirwa ndeke thukayeghesya e Biblia. Ng’eky’erileberyako, thalengekania okwa bya baghalha bethu batholere ibaberererya eritholera eribya basyakulhu  b’ekithunga. (Soma 1 Timoteo 3:2-7.) Neryo kundi ithwe bosi sithulikolha ng’abasyakulhu omwa kithunga, ithwangana tsuka erilengekania thuthi ithwe ebyo sibithuhambireko kutsibu. Aliriryo, thwamalengekania okwa bibulyo ebya thukabirikaniako ahighulhu, ithukendisanga emibere eyo iyangana thughasira nethu omwa nzira ndebe.

⁹ Omwatsi oyu akambwiraki oku Yehova? Yehova erihira h’ebikayithaghisibawa okwa basyakulhu, akakanganaya ngoku eribya musyakulhu ni lhusunzo olhukayithagha baghalha bethu abimene ndeke bunyakirimu. Akanza ibabya ky’erileberyako kibuya embere sy’abandi, kandi ekyosi-kyosi ekyangabya omwa kithunga busana n’emibere y’obusondoli bwabu akakihira okwa muthwe wabu, kundi ekithunga ‘akighulha omwa musasi wa Mughalha wiwe.’ (Emib. 20:28) Yehova akanza ithwayowa buholho omwa butheya bw’abalisya abo abirihiraho. (Isa. 32:1, 2) Neryo busana n’ekyo, emibere eya Yehova akayithagha okwa basyakulhu yikakanganaya kw’athutsomene kutsibu.

10, 11. (a) Thukasoma okwa bikayithaghisibawa okwa basyakulhu b’ekithunga, thwanga kolesya omwatsi oyo wa thuthi omwa ngebe yethu? (b) Thwanga kolesyagho thuthi eriwathikya abandi?

¹⁰ Nanga kolesya indi omwatsi oyu omwa ngebe? Buli kaghulhu, omusyakulhu atholere iniabya inianemuyilebya ng’imene athi erikwamana n’emisingyi eyo, inianemulebya ah’erithasyuwania. Mughalha wethu “amasimbirira olhusunzo lhw’obulebererya,” atholere iniaghanirya ndeke okwa by’atholere iniaberererya, kundi atholere inialengaho eribiberererya ndeke. (1 Tim. 3:1, NW) Nibya ithwe bosi thwangana ghasirwa omwa myatsi eyiri omwa milhondo eyo, kundi yinemo bingyi ebya Yehova akathuyithaghako ithwe bosi. Ng’eky’erileberyako, Abakrisitayo abosi batholere ibathunga amalengekania awatholere okwa syosente n’eby’ekinyamubiri n’eribya abakakokaya abagheni. (1 Tim. 6:9, 10; Abar. 12:13) Abasyakulhu bakendibya banemubya “bisosekanio” kutse ky’erileberyako okwa “kihangulho,” ithukendi bighirako ‘n’erigherererya erikirirya lyabu.’—1 Pet. 5:3; Ebr. 13:7.

¹¹ Nanga kolesya omwatsi oyu w’indi eriwathikya abandi? Ithwangana kolesya ebikayithaghisibawa okwa basyakulhu ebi eriwathikya abakanzisibawa kutse abathuk’eghesaya e Biblia erilhangira ngoku abasyakulhu b’ebithunga by’Abema ba Yehova ni ba mbaghane okwa basondoli b’omwa wandi madini. Kandi thukabya thukasoma ebya basyakulhu batholere eriberererya, ikyangana leka ithwalhangira ngoku n’abasyakulhu  b’omwa kithunga ekya thulimu bakayikasa kutsibu busana nethu. Thukabya thwamalengekania ngoku bakayihayo, kikaleka ithwongera ‘erisima abakakolha kutsibu’ omo kathi-kathi kethu. (1 Tes. 5:12) Thukabya thuk’ongera erisima n’erisikya abasyakulhu abakakolha kutsibu aba, n’etseme yabu yikongera.—Ebr. 13:17.

12, 13. (a) Omw’ikolesya ebya thuwithe omwa kithunga, ithwangana sekulya okwa bindu ngaki? (b) Thaha eky’erileberyako ekikakanganaya ngoku eriminya ebindi ebihambire okwa mwatsi byangana leka iwaminya awandi masomo awakabya ng’abisamire.

¹² Sekulhaya. Omw’isekulya omwa bya thuwitheko omwa kithunga, ithwangana sondya emyatsi ng’eno:

• Nindi oyuwahandika omwatsi owali omwa Masako aya?

• Ahandikirawa hayi kandi mughulhu wahi?

• Ni byahi ebyasibwe ebyabya ekitabu kirebe kye Biblia kikahandikwa?

Eriminya eyindi myatsi ng’eyi ikyangana leka ithwabana awandi masomo awakabya ng’abisamire.

¹³ Ng’eky’erileberyako, thalengekania okwa biri omu Ezekieli 14:13, 14, ahakabugha hathi: “Ekihugho kyamanyihalyako, kikaleghulha, naghe ngasumba ebyalha byaghe bya kukyo n’erilhusya ebyalya byakyo n’erithumirakyo enzalha n’eritha mukyo abandu n’esyonyama. Omukama iyo Omwami Mukulhu athi, ‘Nomo abandu basathu aba—Noa, Danieli, na Yobu—babya mukyo, mubayilhamya ibobene-bene omwa lithunganene lyabu.’” Thwamasekulya, thukabana omwatsi wa Ezekieli oyu iniahandikawa omwa mwaka ng’owa 612 E.K.K. Okwa buthuku obo, habya ihamabiri lhaba myaka mingyi Noa na Yobu baliholire, kandi Nyamuhanga abya inian’ibukire ebyosi bakolha omwa buthaleghulha. Aliwe Danieli yuwabya iniakineho. Omughulhu Yehova amubwira athi obuthunganene bwiwe buli ng’obwa Noa na Yobu, angabya iniabya awithe myaka hakuhi nga 20. Eki kikathweghesayaki? Yehova asikirye kandi akabya inian’ibukire obuthaleghulha bw’abaramya biwe, kandi imwamune n’abalere.—Esy. 148:12-14.

14. Emyatsi eyikahulhukibawa busana n’abalere yikabawathikaya yithi, kandi yanga ghasira yithi n’abandi? (Lebaya ekisasani ekiri okw’itsuka.)

¹⁴ Ngoku thukana ghasirawa omw’igha Ekinywa kya Nyamuhanga ekyosi, ku thwangana ghasirwa thuthya omwa byalya byosi eby’obunyakirimu. Thuthakania okwa by’erileberyako bike. Ebikahandikawa busana n’abalere. Omwa myaka eya lino-lino, ebitabu byethu bingyi byabirihulhukibwa busana n’erighasira abalere. ^[1] Ebindi by’okwa bitabu ebi bikolirwe eribawathikya erirwanisya akahathikano k’okwa sukuru kutse n’ebindi bitsibu by’obunyethu. Ithwe bosi thwanga ghasirwa thuthi omw’isoma emyatsi ng’eyo? Thukabya thwamabisoma, thukaminya ebya balikyethu abalere abathaleghulha bakalhabamu. Kandi kikaleka ithwabya ithwangana bawathikya n’eribaghumya.

15. Busana naki Abakristayo abakulire batholere ibanza erisoma ebitheghekirwe busana n’abalere?

¹⁵ Ebitsibu bingyi ebikanibweko omwa bitabu ebitheghekirwe busana n’abalere sibiribya okwa balere basa. Ithwe bosi thutholere ithwalhwira erikirirya lyethu, erisondolha ndeke eriyowa lyethu, erighana akahathikano kabi k’ab’olhulengo lhwethu, eriyihighulha okwa manywani mabi n’eby’eriyitsemesya ebithuwene. Emyatsi ng’eyi n’eyindi mingyi yikanabera erikanibwako omwa myatsi eyitheghekirwe busana n’abalere. Mbwino Abakrisitayo abakulire banatholere ibalengekania bathi ibakendibya ibamayisubya ahisi bamasoma emyatsi eyitheghekirwe busana n’abalere? Eyihi nahake! Nomwakine indi emyatsi eyi yikatheghekawa omwa mibere eyanganzisya eminyethu, omwatsi owalimu aseghemere okwa misingyi y’Amasako eyithehwa okwa buthuku, neryo ithwe bosi thwangana ghasirwa omwa myatsi eyo.

16. Ni kindi kyahi ekya bitabu byethu bikawathikaya eminyethu erikolha?

¹⁶ Eryongera okw’iwathikya abalere erirwanisya ebitsibu byabu, ebitabu byethu bikabawathikaya  erikulha bunyakirimu n’eriyithunda hakuhi na Yehova. (Soma Omugambuli 12:1, 13.) N’Abakrisitayo abakulire bangana ghasirwa omw’eki. Ng’eky’erileberyako, e Awake! ey’Okwakani 2009 mwabya imune omwatsi “Eminyethu Yikayibulhaya . . . Nanga Kolhaki Erithoka Eritsemera Erisoma e Biblia?” Omwatsi oyo mwakangania bindu birebe eby’erikolha kandi mwabya imune n’akasanduko aka wangan’ihamu iwabika omwa Biblia yawu nuku wubye wukakalebyako. Mbwino omwatsi oyu anabirighasira n’abakulhu? Omukali muthahibwa oyuwabya awithe abaana mwahandika athi, “Eriyeghesya e Biblia irikanyithalhukanaya. Aliwe munaghendera ndeke okwa menge awahebawa omwa mwatsi oyu, kandi nganemukolesya ndeke akapapura akathwabya thukasaramu ako. Hathya ngatsemera erisoma e Biblia. Lino ngalhangira ngoku ebitabu bye Biblia bihambene kandi ngoku bikalighirana ndeke. Nabya isindi nathatsemera indya erisoma e Biblia.”

17, 18. Thwanga ghasirwa thuthi omw’isoma emyatsi eyitheghekirwe busana n’abandu abosi? Iha eky’erileberyako.

¹⁷ Ebikahulhukibawa busana n’abandu abosi. Eritsuka omwaka wa 2008 thwabirithunga egazeti y’Akaleberyo eyik’ighawa n’Abema ba Yehova basa. Kandi ibbwa esyogazeti syethu esy’abandu abosi? Mbwino nethu thwangana ghasirwa omw’isisoma? Thalengekania okwa ky’erileberyako kino. Thalengekania obundi kiro kighuma, iwune okwa mihindano, omukania isyali atsuka, iwalhangira omundu oyo wakokaya iniabiryasa. Ahathe erithika-thika eki kikakutsemesaya. Omukania akabya anemulholha embere, obundi iwukendibya iwunemulengekania okwa mugheni oyo. Ekyo ikyaleka iwabya iwunemulengekania okwa mibere omukania amamuhambako. Erighunzerera, nawu iwaghasirwa omwa mukania oyo.

¹⁸ Ekyo ky’ekyanganabya thukasoma emyatsi eyikatheghekawa busana n’abandu abosi. Ng’eky’erileberyako, omwa gazeti y’Akaleberyo ey’erighaba, emyatsi eyiseghemere okwa Masako yikasoborerawa omwa mibere eyangana yitheghereribwa ndeke n’oyuthe Mwema wa Yehova. Kwa bine bithya n’okwa myatsi eyikabya n’okwa muthahulha wethu we Intaneti owa jw.org, ng’eyikabyako omwa katsweka akawithe omuthwe “Bible Questions Answered” na “Frequently Asked Questions.” Nethu thukabya thukasoma emyatsi eyi, thuk’ongera erisima ekwenene eya thwasi. N’ekindi, ithwangan’igha eyindi mibere ey’erisoborera ebya thw’ikirirye omughulhu thuli omw’ithulira. Kuthya ne Awake! yikathuwathikaya erighumya ndeke ekya thwikirirye ngoku Nyamuhanga aneho, kandi yikathuwathikaya eriminya ngoku thwanga lhwira okw’ikirirya lyethu.—Soma 1 Petero 3:15.

19. Thwanga kangania thuthi ku thukasima Yehova busana n’ebya akathuha?

¹⁹ Ahathe erithika-thika, Yehova abirithuha bingyi busana n’eriberererya “obwagha bwa Nyamuhanga” obwa thuwithe. (Mt. 5:3) Kwesi thulhole embere erikolesya ndeke ebyalya by’obunyakirimu ebya thuwithe. Ithukendibya ithwamakangania ku thukasima Oyukathukangiriraya thubane endundi.—Isa. 48:17.