Bebe bana thatha wiwe ini banywani kutsibu. Oyuwamubughira omwa kuthwe abya ini w’omukagho omw’eka eyo, aliwe mubyamuponesya kutsibu omwakanya k’erimuhumulikania. Bebe iniakabera eriyibwira omwa muthima athi, “thatha syanga holire bathami.” Enyuma w’emyaka mingyi, Bebe abere akahandika ekitabu ekihambire okwa lhuholho olhu, mukyalhangirika ngoku akine omwa bulighe.

Bebe mwalhangira ngoku kikathwalha buthuku bunene erihwa mw’obulighe, kutsibu-tsibu wamabya iwulhue munywani w’oyulyaholha. E Biblia yikabugha ndeke-ndeke yithi “olhuholho ni nzighu.” (1 Abanya Korinto 15:26) Sithuwithe ngoku thwanga kakirya olhuholho lhukathuwamu, kandi lhukasa isithulhuyitsulirye, ilhwathwalha abo thwanzire kutsibu. Sihali oyuwanga lhubalhako. Neryo sikiriswekaya thwamayibulha-bulha n’erilemwa erighumira olhuholho n’ebirengekanio ebikasa enyuma waho.

Obundi wukana yibulhaya: ‘Kikathwalha buthuku bungahi erihwa kw’obulighe? Omundu angathoka athi erighumira obulighe obu? Nanga humulikania indi abaholerwe? Thunemwendi syasalholha okwa banze bethu ababiriholha?’