1-3. Erithendi yitheghererania erya Eodia na Sintike lyangabya iryasa lithi, kandi ekindu ng’ekyo thwanga yitheya kukyo kwa thuthi? (Lebaya ekisasani ekiri okw’itsuka.)

ABAGHOMBE ba Yehova basikirye kutsibu ekitabu kya Nyamuhanga ekibuyirire, e Biblia. Kundi sithuhikene, ithwe bosi thukabya ithunemuhabulhwa omwa Masako. Aliwe thunemwendi ligha erihabulhwa eryo? Thalengekania oku Eodia na Sintike, ababya Bakristayo ab’omwa kighonye ky’erimbere. Muhabya erithendi yitheghererania erikalire ahakathi-kathi k’abakali abahakabibwa aba. Muhabyaki? E Biblia siyirikibugha. Aliwe omw’ithaha ng’eky’erileberyako, thuthalengekania okwa bino.

² Thuthabugha thuthi Eodia mwakokya balikyethu ewiwe okw’irya n’eritsemera haghuma. Aliwe amaghana erikokya Sintike, kandi Sintike amowa etseme eyabereyo. Neryo amabugha athi: ‘Nabirisweka eribya Eodia imwathenyikokaya! Indwe ngasi indi thuli banywani.’ Busana n’eriyowa iniabirikolhwa nabi, Sintike mwatsuka erisamalira Eodia omwa mibere eyithuwene. Neryo Sintike mwathwamu nayu erikokya balikyethu abo Eodia anakokaya—aliwe  amasigha Eodia! Ekitsibu ekyabya ahakathi-kathi ka Eodia na Sintike kyanga tsandirye obuholho bw’ekithunga ekyosi. E Biblia siyirithubwira ebyalhwiririramu, aliwe obundi bali bethu aba bangabya imubaligha erihabulha ly’omukwenda Paulo.—Fil. 4:2, 3.

³ Emibere eyiri ng’eyo, hakanayira iyaletha omwa bithunga by’Abema ba Yehova mw’ebitsibu munabwire. Aliriryo, ebitsibu ng’ebyo byangana rwanisibwa kutse nibya ibyabya isibyangabya thwamaghendera okwa busondoli obuli omwa Kinywe kya Nyamuhanga, e Biblia. Kandi thwamabya kwenene ithusikirye kutsibu ekitabu kya Yehova, ithukendi ghendera okwa busondoli bwakyo.—Esy. 27:11.

4, 5. Ekinywa kya Nyamuhanga kikathuhabulha kithiki okw’ihithana?

⁴ Sikyolho eriyikakirya okw’ihithana omughulhu thukayowa omundu iniabirithukolha nabi. Kyangana lhumya omuthima thwamasolholhwa busana n’ekihanda kyethu, erangyi y’omubiri wethu, kutse ekindi kindu. Kandi kyanga lhuma kutsibu oyuwamathusolholha amabya ini muramya mulikyethu! Mbwino omwa Biblia mune obusondoli obwanga thuwathikya thwamayisanga ithwabirikanganibwa omubere muthya-muthya w’obuthahikana bw’abandu oyu?

⁵ Yehova anasi ekyangabya abandu bamathendi yikakirya okw’ihithana. Thwamahithana ithwangana yisanga ithwabiribugha kutse erikolha ekyanga leka ithwayikubya bwomo enyuma w’aho. Ka kyangabya ky’amenge erighendera okw’ihabulha lye Biblia ery’eriyikakirya okwa kinigha n’erihithana lhuba-lhuba! (Soma Emisyo 16:32; Omugambuli 7:9.) Ithwe bosi thutholere ithwarwanisya omubere w’erihithana lhuba-lhuba, aliwe ithwakulha-kulhania ow’erighanyira. Omubere w’erighanyira ni mukulhu kutsibu embere sya Yehova na Yesu. (Mt. 6:14, 15) Mbwino hane aha wunatholere iwathasyuwania omwa mubere wawu w’erighanyira n’eriyikakirya okw’ihithana?

6. Busana naki thutholere ithwayitheya okwa butsurumi?

⁶ Abandu abakalemawa eriyikakirya okw’ihithana bakatsuruma. Ekikalhwiririramu, abandi bakabasagha n’eribayihighulhako. Omundu oyutsurumire angana tsandya ekithunga. Nomw’angayithendererya nga syatsurumire, kutse eriswikirira obuyighu bwiwe okwa bandi, amalengekania wiwe mabi akalindawa iniaminyikalha embere sy’abandu. (Emi. 26:24-26) Abasyakulhu batholere ibalengaho eriwathikya omundu ng’oyo erilhangira ngoku erihithana, obuyighu, n’eribika okwa bandi kw’ebinigha, ni mibere eyithawithe mwanya omwa kithunga kya Nyamuhanga. Ekitabu kya Yehova kikakanaya penule oko mwatsi oyu. (Law. 19:17, 18; Abar. 3:11-18) Wunemwendi ghendera okwa busondoli obo?

7, 8. (a) Yehova akasondolha athi ekithunga kiwe? (b) Ebighuma by’okwa bya Biblia yikathulhaghira ni byahi, kandi busana naki thutholere ithwabighenderako?

⁷ Yehova yukasondolha n’erilisya abali omwa kithunga kiwe erilhabira omwa “mughombe oyutheleghulha n’ow’amenge” oyukasondolhawa na Kristo oyuwithe ehamuli oko kithunga. (Mt. 24:45-47; Efe. 5:23) Ng’akathunga akakasondolha ak’omwa kighonye ky’erimbere, omughombe oyu akaligha ebiri omwa Kinywe kya Nyamuhanga, kandi akisikirye kutsibu. (Soma 1 Abanya Tesalonika 2:13.) Ni busondoli bwahi obwabirihirwa omwa Biblia busana n’erithughasira?

⁸ E Biblia yikathulhaghira yithi ithwahindana mughulhu wosi. (Ebr. 10:24, 25) Yikabugha yithi ambi ithwabya bughuma omwa bya thwikirirye. (1 Kor. 1:10) Ekinywe kya Nyamuhanga  kikathuhabulha erihira Obwami bw’embere omwa ngebe yethu. (Mt. 6:33) Kandi Amasako akakanganaya ko thuwithe olhukwamirwa lhw’erithulira nyumba okwa nyumba, ahali abandu bangyi, na kitsumbukirania. (Mt. 28:19, 20; Emib. 5:42; 17:17; 20:20) Ekitabu kya Nyamuhanga kikalhaghira abasyakulhu erilhangira bathi ekithunga kikabya ikin’erire. (1 Kor. 5:1-5, 13; 1 Tim. 5:19-21) Kandi Yehova akalhaghira athi abosi abali omwa kithunga kiwe batholere ibabya iban’erire kinyamubiri na bunyakirimu.—2 Kor. 7:1.

9. Ni nzira yahi nguma nyisa eyinemukolesibwa erithuwathikya eriyitheghererya Ekinywe kya Nyamuhanga?

⁹ Abandi bangana yowa bathi bangana soborera e Biblia okwa lyabu. Aliwe Yesu abirihiraho ‘omughombe oyutheleghulha’ eribya in’iyo musa oyuwanga thuha akalyo k’obunyakirimu. Eritsuka 1919, Yesu Kristo oyuwabirihebwa obuthoki anemukolesya omughombe oyo eriwathikya abakwamire Yesu eriyitheghererya Ekitabu kya Nyamuhanga n’erighendera okwa bya kikalhaghira. Omw’ighendera okwa busondoli obuli omwa Biblia, thukaleka ekithunga ikyabya ikin’erire, ikine buholho, n’omwa bughuma. Obuli mughuma w’okw’ithwe atholere iniayibulya, ‘Nganaghondera abo Yehova abiriha olhukwamirwa lhw’erithulisya akalyo k’obunyakirimu munabwire?’

10. Ekitsweka ky’elhubulha eky’okwa kithunga kya Yehova kikakanibawako kithi omwa kitabu kya Ezekieli?

¹⁰ Ekinywe kya Yehova kikathubisulira ebiri omwa kitsweka ky’ekithunga kya Yehova eky’elhubulha. Ng’eky’erileberyako, omuminyereri Ezekieli mwakanganibwa ekithunga kya Nyamuhanga eky’elhubulha ekyo, ikisosekanibwe ng’ekiggali. (Ezek. 1:4-28) Yehova yukaghendaya ekiggali ekyo, kandi kikaya ahosi-hosi aha mulimu wiwe akakilholhaya. Neryo n’ekitsweka eky’ekithunga kiwe ekyo ikyasondolha eky’okwa kihugho. Ahathe erithika-thika, ekiggali ekyo kinemulholha embere! Thalengekania okwa syombinduka nyingyi esyabiribya omwa kithunga omo myaka ng’ikumi eyilhabire—kandi iwun’ibukire ngoku Yehova yukasondolha esyombinduka esyo. Kristo n’abamalaika banemuyitheghekera erithoghothya ekihugho kibi kino. Ekiggali kya Yehova kinemwanguha erilholha okw’ihamya ehamuli ya Yehova ey’erithabalha n’eriyira erina liwe mwa libuyirire!

11, 12. Ni byahi ebinemukolhwa omwa kithunga kya Yehova?

¹¹ Lengekanaya okwa binemukolhwa omwa kitsweka ky’okwa kithunga kya Yehova eky’okwa kihugho omwa biro bino by’enyuma-nyuma. Obuhimbe. Balikyethu bangyi mubakolire kutsibu okwa buhimbe bw’ekyaghanda kikulhu eky’Abema ba Yehova e Warwick, New York, U.S.A. Omw’isondolhwa n’Akathunga k’eby’Obuhimbe ak’Ekihugho Kyosi, esyongumi n’esyongumi sy’abalikyethu banemukolha kutsibu erihimba Ebisenge by’Obwami n’erithasyaghalihya ebyaghanda by’emithahulha. Ka thukasima kutsibu balikyethu abakayihayo  aba omwa mibiiri eyi! Kandi thwibuke ngoku Yehova anemutsumulha abathuliri omwa kihugho kyosi abakahayo ekyosi-kyosi erisighika emibiiri ng’eyo.—Lk. 21:1-4.

¹² Erikangiriribwa. Thalengekania okwa masukuru mangyi w’Ekiteokrasi. (Isa. 2:2, 3) Hane Esukuru y’Abatemburi, Esukuru y’Abathuliri b’Obwami, Esukuru ye Gileadi, Esukuru y’Abalebererya b’Omuthimbo na Bakali Babu, Esukuru y’Abahyaka Okwa Beteli, Esukuru y’Abasyakulhu b’Ekithunga, Esukuru y’Omubiiri w’Obwami, Esukuru y’Abali okw’Akathunga k’Omuthahulha na Bakali Babu. Yehova k’anzire erikangirirya abandu biwe! Erikangiriribwa e Biblia line n’okwa muthahulha wethu we Intaneti owa, jw.org, okuli ebitabu omwa mibughe mingyi. Okwa muthahulha oyu kune ahakabanika ebitheghekirwe busana n’abaana n’amaaka n’ahakabya amakuru. Wunemukolesya e jw.org omw’ithulira n’omw’iramya lyawu?

13. Ithwe ng’Abema ba Yehova thuwithe lhukwamirwaki?

¹³ Ka ni lhusunzo lhunene eribya omwa kithunga kya Yehova! Thukabya thukaminya ebya Yehova anzire, thukabya kw’olhukwamirwa lhw’erikolha ekihikire n’erisighika ehamuli yiwe y’erithabalha. Omughulhu ekihugho kino kinemwongoberera omwa bubi, thutholere ‘ithwakwa ebibi by’obusu’ nga Yehova. (Esy. 97:10) Thukaghanira ighuma eriyiyunga okwa bandu babi “abak’ahulha ebibi mo bibuya, n’ebibuya mo bibi.” (Isa. 5:20) Kundi ithwe thwanzire eritsemesya Nyamuhanga, thukalhangira thuthi thukabya ithun’erire kinyamubiri, omwa by’esyongeso na bunyakirimu. (1 Kor. 6:9-11) Thwanzire Yehova kandi thumuyikethere; thukakanganaya ko thuli bathaleghulha okw’iyo omw’ighendera okwa misingyi eyiri omwa Kitabu kiwe. Kandi thukalengaho kutsibu erighendera okwa misingyi eyo omughulhu thuli eka, omwa kithunga, ahathukakolera, okwa sukuru n’ahosi-hosi. (Emi. 15:3) Thuthalebya ebindi ebya thwanga kanganirya mw’obuthaleghulha bwethu oku Nyamuhanga.

14. Ababuthi Abakristayo bangakangania bathi obuthaleghulha oku Nyamuhanga?

¹⁴ Omw’ikulya abaana. Ababuthi Abakristayo bakakanganaya obuthaleghulha oku Yehova omw’ikolesya Ekinywe kiwe bakakangirirya abaana babu. Ababuthi abakakenga Nyamuhanga sibalighendera okwa bihaniriro by’ewabu omw’ikulya abaana. Amalengekania w’ekihugho-hugho syawithe mwanya omw’eka y’Ekikristayo. (Efe. 2:2) Thatha Omukristayo syangabugha athi, ‘Ithwe, ewethu enu, abakali ba bakakangiriraya abaana.’ Okw’ekyo, e Biblia yikabugha ndeke-ndeke yithi: “Abathatha, . . . mukulhayebo [abaana benyu] omo nzira y’Omukama.” (Efe. 6:4) Mama na thatha abakakenga Nyamuhanga bakanza abaana babu ibabya nga Samweli kundi Yehova abya haghuma nayu iniakine na mwana.—1 Sam. 3:19.

15. Thwanga kangania thuthi obuthaleghulha oku Yehova omughulhu thukathwamu?

¹⁵ Erithwamu. Omughulhu thuwithe eby’erithwamu, ithukendi kangania obuthaleghulha oku Nyamuhanga omw’isondya obuwathikya omwa Kinywe kiwe n’ekithunga kiwe. Erilhangira ekikaleka ikyabya ini kikulhu erikolha ekyo, hano hane ekindu ekikahamba okwa babuthi banene. Mughulhu mungyi, abakayakolera omwa bindi bihugho bakathwalha abaana babu eyiri abahughu nuku banga thoka erikolha ndeke esyosente eya bamaya eyo. Ni kwenene, eri n’ithwamu ly’omundu, aliwe thutholere ithw’ibuka ngoku Nyamuhanga akendi syathutswera erikwamana n’erithwamu erya thukakolha. (Soma Abanya Roma 14:12.) Mbwino ikyanganabya ky’amenge erithwamu okwa myatsi y’eka yawu kutse eyihambire okwa  ngebe yethu isithuthatsuka eriminya ekya Biblia yikabugha? Sikitholere nahake! Thukayithagha obuwathikya bwa Thatha wethu w’elhubulha kundi sithwanga thoka eriyisondolha.—Yer. 10:23.

16. Omukali mughuma aby’awithe mwatsiki w’erithwamu okwa mwana wiwe, kandi ni kyahi ekyamuwathikaya erithwamu ndeke?

¹⁶ Omukali mughuma mwabuthira omwa kindi kihugho neryo amathwamu athi asubaye omwana omwa kihugho ky’ewabu, mukaka wiwe aya mulembere. Okwa buthuku obo, Omwema wa Yehova mwatsuka erigha e Biblia n’omukali oyo. Mwakulha-kulhana ndeke amaminya ngoku ni lhukwamirwa lhwiwe erilhua oku Nyamuhanga erikangirirya omwana wiwe eriramya Yehova. (Esy. 127:2; Emi. 22:6) Omukali oyo mwabwira Yehova ebyosi ebimuli okwa muthima, ngoku Amasako akabugha athi ithwakolha. (Esy. 62:7, 8) Kandi mwabwira n’oyuk’igha nayu ebimuli okwa muthima, amabwira n’abandi omwa kithunga. Nomwakine indi abahughu n’abanywani babya ibanemumuhathikana bathi athwalire omwana ya mukaka wiwe, iyo abya iniabirithwamu ngoku ekyo si kihikire. Mwira wiwe mwatsema erilhangira ngoku ekithunga kyamawathikya mukali wiwe n’omwana, nayu amaligha erigha e Biblia n’eritsuka erihindana. Mbwino omukali mwanayowa Yehova iniamasubirya emisabe yiwe? Ahathe erithika-thika kw’anabya ayowire athya.

17. Ni busondoli bwahi obwa thwabirihebwa erikwamana n’abigha be Biblia?

¹⁷ Erikwama obusondoli. Enzira ngulhu eya thukakanganiraya mw’obuthaleghulha bwethu oku Yehova ly’erikwama obusondoli obukabanika omwa kithunga kiwe. Ng’eky’erileberyako, thalengekania okwa busondoli obwa thwabirihebwa obuhambire okwa bigha bethu be Biblia. Kyabiribuwa indi thwamabiritsuka erigha n’omundu omwa kitabu E Biblia Kwenene Yikakangirirayaki?, ambi omwa budakika buke ithwamabirighunza erigha, thutholere ithwawathikya omwigha eriminya ekithunga kya Yehova. Ithwangana kolha ekyo omw’ibakangya evidiyo eya Okwa Kingdom Hall Kukakolhawaki? n’akatabu aka Ni Bahi Abakakolha Erisonda lya Yehova Munabwire? Omwigha oyunemukulha-kulhana amabirighunza ekitabu E Biblia Yikakangiriraya, obusondoli bukabugha buthi ithw’igha nayu ekitabu “Muyibike Omo Lhwanzo Lhwa Nyamuhanga,” nomw’angabya iniabiribatizibwa. Ekithunga kikahira h’obusondoli obu nuku abigha bahyaka aba basike omw’ikirirya. (Kol. 2:7) Wunemukwama obusondoli obo omwa kithunga kya Yehova?

18, 19. Ni nzumwa syahi esyanga leka ithwasima Yehova?

¹⁸ Ni bingyi ebyangaleka ithwasima Yehova! Engebe yethu nyisa-nyisa yuthuhereyo, ahathe buwathikya bwiwe ambi sithuli naho. (Emib. 17:27, 28) Abirithuha ekihembo ky’obughuli—ekitabu kiwe e Biblia. Omw’isima linene, ithwe ng’Abakristayo thukaligha ekitabu ekyo ng’ebaruha eyikalhua oku Nyamuhanga.—1 Tes. 2:13.

¹⁹ Busana n’eribya n’Ekinywe kya Nyamuhanga, thwabiriyithunda hakuhi na Yehova, nayu abiriyithunda hakuhi nethu. (Yak. 4:8) Thatha wethu w’elhubulha abirithuha olhusunzo lhw’eribya omwa kithunga kiwe. Ka thukasima omughisa oyu! Omuhandiki w’esyonyimbo mwasighika enzumwa eyo ndeke athi: ‘Muhe Yehova y’ewasingya, kusangwa ni mubuya; olhwanzo lhwiwe olhuthyusa lhukakotha.’ (Esy. 136:1) Omwa Esyonyimbo sura 136 ebinywe “olhwanzo lhwiwe olhuthyusa lhukakotha,” bikabanika mwa mirundi makumi abiri na mukagha. Thwamabya bathaleghulha oku Yehova n’ekithunga kiwe, ithukendi syayilhangirira okwenene kw’ebinywe ebyo, kundi nethu thukendi syakotha, eribyaho kera na kera!