E Biblia ni ya mbaghane kutsibu okwa bindi bitabu by’edini. Sihali kindi kitabu ekyabirisondolha erikirirya ly’abangyi ahabw’omughulhu muuli nge Biblia. Ibbwa kandi sihali ekindi kitabu ekyabirithakuthibwa kutsibu ng’iyo.

Ng’eky’erileberyako, abandi abasomire eby’amasako bakabugha bathi ebiri omwa syo Biblia sya munabwire ni bya mbaghane okwa byabya omwa Masako w’erimbere. Omuprofesa omwa by’edini akabugha athi: “Sithwanga kikakasya thuthi eby’omwa Masako wa munabwire thunabihandikire ndeke ngoku byanabya omwa Masako wa kera. Esyo Biblia esyo thulinasyo munabwire syuswire mw’ebisobyo, kandi esyonene sisihikire nahake okwa ya kera kandi hali embaghane nene omwa mibere mingyi.”

N’abandi bakathika-thikira e Biblia eribya ini Kinywe kya Nyamuhanga busana n’esyongangirirya sy’amadini wabu. Ng’eky’erileberyako, Faizal, mwakangiriribwa n’ab’eka yabu abathe Bakristayo ngoku e Biblia ni kitabu kya Nyamuhanga aliwe bathi yabirihinduka. Akabugha athi: “Ekyo mukyaleka, inabya ingathika-thika abandu bakanza erikania naghe okwa Biblia. Kundi nibya isibalibya ne Biblia eya kera. Yabya iyabiri hinduka!”

Omwatsi we Biblia erihinduka n’erithendi hinduka nina kindu ky’eritsomana? Okw’ekyo, thalengekania okwa bibulyo bino: Iwunemwendi yikethera emilhaghe eyikahumulikanaya eyiri omwa Biblia eyihambire okwa buthuku bw’embere wamabya iwune muthika-thika nga yanabya omwa Masako w’erimbere? (Abanya Roma 15:4) Mbwino iwunemwendi kolesya emisingyi eyiri omwa Biblia wukathwamu okwa by’emibiiri, eby’amaka, kutse emiramirye wamabya iwasi wuthi esyo Biblia esya munabwire siri mw’ebisobyo bisa-bisa ebyahandikawa n’abandu?

Nomwakine indi ebitabu by’Amasako ebyahandikawa erimbere-mbere sibirikiho, hane ebindi bitabu bya kera ebyanga thuwathikya—imwamune n’emikunzo ya kera ey’Amasako. Emikunzo eyo muyasabuka yithi okw’ilhunda, erihakanisibwa, n’erilengaho erihengemya ebirimo? Erisabuka lyayo lyanga ghumya lithi eriyikethera lyawu ngoku e Biblia eya wuwitheko munabwire ni Kinywe kya Nyamuhanga? Thalebya eby’erisubirya okwa bibulyo ebyo omwa mwatsi owakakanaya ngoku yasabuka okw’iheribwa.