1. Ni mbaghane yahi eyiri ahakathi-kathi k’ebya thukayithagha n’ebya thwanzire?

KIKABUGHAWA indi ebiyithawa by’omundu ni bike, aliwe eby’anzire ni bingyi, sibirihwayo. Kikalhangirika ngoku abangyi sibasi embaghane eyiri ahakathi-kathi k’ebya bakayithagha n’ebya banzire. Hali mbaghane yahi? “Ekiyithawa” ky’ekindu ekya wutholere iwabya nakyo erithoka eribyaho. Ebyalya, eby’eryambalha, n’ah’erikesya—ebi ni biyithawa bikulhu-bikulhu. “Ekya wanzire” ky’ekindu ekya wukayighomba, aliwe iwanganabyaho isiwuli nakyo.

2. Ni bindu nga byahi eby’abandu banzire?

² Ebya bandu banzire byangan’ahukana erisighikira n’eyo bikere. Omwa bihugho ebikina kulha-kulhana, abangyi bakanza ibabya ibanawithe esyosente esikaghunza erighulha ng’esimu, epiki-piki, kutse akabanza. Omwa bihugho ebikulha-kulhene, abandu bakanza eribya n’esyongyimba nene esye bbeyi, enyumba nene kutse ematoka y’ebbeyi nene. Mbulha thuli omwa kihugho kyahi okw’ebi, ekitsibu kya kino—eriwa omwa kithegho ky’eryanza ebindu, eryanza eribya n’ebindu bingyi, mbulha thukabiyithagha kutse eyihi, mbulha thwangana thoka ebbeyi yabyo kutse eyihi.

3. Omundu oyukanza ebindu bya kutsibu y’oyuli athi?

³ Omundu oyukanza ebindu bya kutsibu y’oyuli athi? Y’oyukahweraya amalengekania wosi w’okwa by’ekinyamubiri omwakanya k’erihweryagho okwa by’obunyakirimu. Omubere oyu akalhangirika omwa bya mundu anzire, eby’akahira embere, n’omwa bilhubirirwa biwe. Omubere oyu akaleka ithwayighomba eribya n’ebindu bingyi. Omundu oyuwanzire ebindu bya kutsibu anganabya isyawithe na sente nene kutse eribya iniakaghulha ebindu by’ebbeyi. Kandi nibya n’abera banganabya mw’omubere w’eryanza ebindu bya kutsibu ibaleka n’eritsuka erisondekania Obwami.—Ebr. 13:5.

4. Sitani akakolesya athi “esyongumbu sy’ameso”?

⁴ Sitani akakolesaya eby’ekisubure eby’ekihugho kiwe erithulombererya nuku thwikiriraye thuthi eribya n’ebindu by’ekinyamubiri nibya n’ebya thutheyithagha kikendi leka ithwatsema. Asi ndeke eryohya abandu omw’ikolesya “esyongumbu sy’ameso.” (1 Yn. 2:15-17; Enz. 3:6; Emi. 27:20) Ekihugho kikahulhukaya ebindu muthina-muthina, ebyuwene kutsibu n’ebithuwene, kandi ebindi omw’ebi byangana tsemesya ameso. Wune wathaghulha ekindu ekya wutheyithagha kundi mukikakutsemesaya? Endambi muyanahika wamalhangira ku wangana bere naho isi wukiwithe? Ebindu ebithe yithayisibawa ng’ebyo bikakalhaya engebe n’erithulethera amaghaniryo. Byangana thubera kithegho n’erithulengemerya okwa ndegheka yethu y’obunyakirimu ey’erisoma e Biblia, erithegheka emihindano n’eriya kuyo, n’erisangira mughulhu wosi omw’ithulira. Wibuke, omukwenda Yoane mwakunga athi: “Ekihugho n’esyongumbu syakyo byasyahwa.”

5. Ni kyahi ekyanga hika okwa bakahweraya akaghalha kabo okw’isondya ebindu bisa-bisa?

⁵ Sitani anzire ithwabya bakobe b’ebindu omwakanya k’erikolera Yehova. (Mt. 6:24) Abakahweraya akaghalha kabu okw’ibya n’ebindu binene erighunzerera bakabya ng’abakasolhomera omwa kathobokire, kundi ebindu bikatsemesaya ameso masa, aliwe bunyakirimu ibabya isibawitheki, ibabya omwa maghaniryo n’amalighe. (1 Tim. 6:9, 10; Erib. 3:17) Kine ngoku Yesu abugha omwa musyo w’omubibi. Omwatsi w’Obwami akabya ‘amabibwa omwa mahwa, esyongumbu sy’ebindi bindu sikingira neryo isyakusya ekinywe, neryo ikithasoholha.’—Mk. 4:14, 18, 19.

6. N’isomo lyahi erya thuk’ighira oku Baruku?

⁶ Thalengekania oku Baruku, omuhandiki w’omuminyereri Yeremia. Omuyi we Yerusalemu abere iniakisiya iniathoghothibwa ngoku kyabya omwa buminyereri, Baruku mwatsuka “eriyisonderya emyatsi minene minene”—ebindu ebithabya biwithe mughaso. Aliwe, ekya Baruku aby’atholere erihira kw’amaha, ky’ekya Yehova amulhagha kino: ‘Engebe yawu nasyakuhayo ehosi wukaya.’ (Yer. 45:1-5) Omwa kwenene Nyamuhanga syanga lhamirye ebindu by’ekinyamubiri eby’omundu wosi-wosi omwa tawuni eyabya iyikayaheribawa. (Yer. 20:5) Nethu omughulhu thunemuseghera okwa nduli y’omughulhu mubi ono, buno si bw’obuthuku bw’eryanza eribya n’ebindu bingyi by’ekinyamubiri. Ambi ithwabya ithunasi ngoku okwa bulighe bunene n’ithwe thukendi syalhama butsira ebindu byethu, nomuthwangabya ithubyanzire kutsibu kutse obundi ini by’obughuli bunene.—Emi. 11:4; Mt. 24:21, 22; Lk. 12:15.

7. Thukaya kanaya okuki, kandi busana naki?

⁷ Yesu mwaha erihano eryuwene ngoku thwangabana ebya thukayithagha omwa ngebe ahathe erilengemeribwa, erianza ebindu bya kutsibu, kutse eriyilethera amaghaniryo wa bbule. Erihano eri line omwa Mukania wa Yesu ow’okwa Kithwe. (Mt. 6:19-21) Thusome n’erilebya  ndeke ebiri omu Matayo 6:25-34. Erikolha ekyo kikendi leka ithwakakasya ngoku thutholere ‘ithwatsuka erisondya Obwami,’ butsira ebindu.—Lk. 12:31.

8, 9. (a) Busana naki sithutholere thukabya n’amaghaniryo mangyi okwa biyithawa byethu? (b) Ni kyahi ekya Yesu aby’asi okwa bandu n’ebiyithawa byabo?

⁸ Soma Matayo 6:25. Omughulhu Yesu abwira ababya bamuhulikirire athi ‘isibayilhuhaya n’amaghaniryo busana n’engebe yabu,’ abya iniakabugha athi ‘isibahanga-hangaya.’ Mubahangya-hangya n’okwa bithe nayo. Yesu mwababwira athi baleke ekyo—kandi habw’enzumwa mbuya. Eribera erihangya-hangya, obundi nibya n’okwa bindu ebitholere, lyanganaleka omundu iniabya n’obulengekania obughabene kandi inialengemeribwa, neryo iniathalengekania okwa myatsi ey’obunyakirimu ey’omughaso munene omwa ngebe. Yesu abya atsomene kutsibu abigha biwe kyaleka omwa mukania wiwe iniabakunga esindi ngendo ini okwa mubere w’akabi oyu.—Mt. 6:27, 28, 31, 34.

⁹ Ni kyahi ekyaleka Yesu iniathubwira athi isithwabya n’amaghaniryo busana n’eky’erirya, kutse eky’erinywa, kutse eky’eryambalha? Mbwino ebi si bindu by’okwa bikulhu-bikulhu ebya thukayithagha omwa ngebe? Ka ni bighuma bya kubyo! Mbwino thwamalemwa eribibana, isithwendi yisanga ithwabirihangya-hangya? Ithukendi hangya-hangya, kandi Yesu abya inianasi ekyo. Abya inianasi ndeke ebya bandu bakayithagha buli kiro. Kandi nibya abya inianasi emibere eyikalire ey’abigha biwe bangaberemo omwa “biro by’enyuma-nyuma” eby’emighulhu eyikalire. (2 Tim. 3:1) Emibere eyi mwamuli eribulha emibiiri, ebindu erikalha, enzalha, n’obunakwa. Aliwe ibbwa kandi, Yesu abya inianasi ngoku ‘engebe yilengire ebyalya, n’omubiri kw’alengire esyongimba.’

10. Yesu abere akangirirya abigha biwe ngoku banga saba, mwabugha athi ekya batholere ibahira embere omwa ngebe ky’ekyahi?

¹⁰ Omwa mukania wiwe mw’enyuma, mwakangirirya ababya bamuhulikirire athi ibasaba Thatha wabu w’elhubulha y’ebiyithawa byabu by’ekinyamubiri. Mwabugha athi ibasaba bathi: “Wuthuhe munabwire akalyo kethu akathutholere.” (Mt. 6:11) Kandi okwa wundi mughulhu, Yesu mwababwira athi ibasaba ebiyithawa byabu. (Lk. 11:3) Aliwe erihano eryo siriri manyisaya indi ebiyithawa by’ekinyamubiri bisa bya thutholere eribera erilengekaniako. Omwa musabe w’eky’erileberyako oyo, ekya Yesu aby’ahirire embere ly’erisaba athi Obwami bwa Nyamuhanga bwase. (Mt. 6:10; Lk. 11:2) Erithoka erihumulikania abahulikiriri, Yesu mwathasyakania okwa bingyi ebikakanganaya ngoku Yehova akathuha ebya thukayithagha.

11, 12. Thuk’ighaki okwa mibere eya Yehova akatsomaniramu esyonyonyi? (Lebaya ekisasani ekiri okw’itsuka.)

¹¹ Soma Matayo 6:26. Thutholere ‘ithwasamalira esyonyonyi sy’omwa kyanya.’ Nomwakine indi esyonyonyi ni nyike-nyike, sikalya kutsibu—ebighuma, esyonguma, obuhuka, kutse eminyole. Nomwakine indi siwithe mani make kwilhaba abandu, sikalya kubalenga. Kandi nibya isi siri lima kutse erihera ebyalya. Yehova akasiha ebyosi ebya sikayithagha. (Esy. 147:9) Aliwe sikirimanyisaya indi akasihira ebyalya by’omwa buno! Sitholere isyayasondya, kandi sik’egheyayo eby’erirya bingyi.

¹² Neryo Yesu abya inianasi ngoku Thatha wiwe w’elhubulha syanga lekerania abandu kandi iniane mulisya esyonyonyi. (1 Pet. 5:6, 7) Siendi thuhira ebyalya by’omwa bunu, aliwe angana tsumulha akaghalha kethu thukahera ebyalya kutse erithuwathikya thubane esyosente sy’erighulha ebyalya. Hamabya obuyithawa, angana thulha okwa mithima y’abandi neryo ibahithya okwa bya bawithe. Nomwakine  indi Yesu mwathakania oku Nyamuhanga eriha esyonyonyi ah’erikesya, Yehova abirisihererya amenge w’obuhangiranwa aw’eriyihimbira esyonyithwe n’eby’erihimbisya. Nethu Yehova angana thuwathikya eribana ah’erikesya ahatholere.

13. Ni kyahi ekikakanganaya ngoku thulengire esyonyonyi?

¹³ Yesu mwabulya ababya bamuhulikirire athi: “Nenyu simuli b’obughuli bunene kwilhabasyo [esyonyonyi] kwehi?” Ahathe erithika-thika, Yesu abya inianasi ngoku akisiya iniahayo engebe yiwe busana n’abandu. (Lebaya na Luka 12:6, 7.) Embanulho y’ekihongwa kya Kristo yahebawa busana n’abandu butsira ebindi bihangikwa. Yesu syaholera esyonyonyi, n’ithwe aholera nuku thusyabyaho kera na kera.—Mt. 20:28.

14. Ni kyahi ekya ow’amaghaniryo athe angakolha?

¹⁴ Soma Matayo 6:27. Neryo ibbwa kwesi, ni kyahi ekyaleka Yesu iniabugha athi omundu nomwanga yilhuhya omwa maghaniryo syangathoka eryongera okwa myaka yiwe? Kundi eribera erihangya-hangya okwa biyithawa byethu sikyang’ongera emyaka yethu. Aliwe ibbwa, amaghaniryo manene angana leka ithwaholha na lhuba.

15, 16. (a) Emibere eya Yehova akatsomaniramo ebiranga-ranga by’omoli yikathweghesayaki? (Lebaya ekisasani ekiri okw’itsuka.) (b) Ni bibulyo byahi ebya thwanga yibulya, kandi busana naki?

¹⁵ Soma Matayo 6:28-30. Nindi oyuthanzire eryambalha esyongimba esyuwene, kwilhabirirya akasangira omwa mibiiri y’obunyakirimu—akathulira kutse akahindana okwa mihindano emike-mike n’eminene-minene? Aliwe ibbwa ekyo kinatholere ikyathuhira omwa “maghaniryo  busana n’esyongimba”? Kandi Yesu akathasya subaya amalengekania wethu okwa mibiiri ya Yehova. Hano thwanganigha bingyi okwa misosere ‘y’ebiranga-ranga by’omoli.’ Hano, Yesu angabya iniabya akakania okwa bimole bingyi ebyuwene ng’ebiranga-ranga. Ebihangikwa ebi sibiri yikokotheraya esyohuzi kutse erilhuka esyongimba. Aliwe omusanga wabyo akatsemesaya kutsibu! Nibya na “Solomona omwa lhukengerwa lhwiwe lhwosi mwathambalha ndeke ng’omusanga mughuma oyu”!

¹⁶ Enzumwa eya Yesu abugha y’eno: “Nyamuhanga oyukambalhaya ebithi by’omoli . . . , syendisya bambalya kwilhaba aho inywe bandu b’erikirirya like kwehi?” Ahathe erithika-thika iniakendi kikolha! Aliwe, abigha ba Yesu banabya babulirweko omw’ikirirya. (Mt. 8:26; 14:31; 16:8; 17:20) Babya bakayithagha erikirirya erighumire n’eriyikethera Yehova. Kandi ibbwa ithwe? Thuyikethere bungahi eriyisunza lya Yehova n’amaaka wiwe aw’erithuha ebya thukayithagha?

17. Ni kyahi ekyanga tsandya obughuma bwethu na Yehova?

¹⁷ Soma Matayo 6:31, 32. Sithutholere thukagherererya abandu ‘b’ebihanda,’ kundi sibawithe erikirirya ngoku Thatha wethu w’elhubulha ow’olhwanzo akatsomana abakahira emyatsi y’Obwami y’embere omwa syongebe syabo. Eryanza eribya n’ebindu byosi ebya “bihanda bikasonda-sondaya” ikikendi tsandya obughuma bwethu na Yehova. Aliriryo thwangana yikethera ngoku thwamakolha ekya thutholere erikolha—erihira eby’obunyakirimu by’embere omwa ngebe yethu—Yehova syanga ghana erithuha ebya thukayithagha. Ithwe “erikenga Nyamuhanga” litholere iryaleka ithwatsemera “akalyo n’eky’eriyiswika.”—1 Tim. 6:6-8

18. Ni byahi ebya Yehova athwasiko obuli mundu ahabwiwe, kandi ni kyahi ekya angathukolera?

¹⁸ Soma Matayo 6:33. Abigha ba Yesu batholere ibahira Obwami bwa Nyamuhanga bw’embere omwa ngebe yabu. Thwamakolha ekyo, ithukendi hebwa “ebindu byosi ebi” ngoku Yesu abugha. Ekyaleka iniabugha athya niki? Mwasoborera omwa mulhondo ow’ahanyuma athi: ‘Thatha wenyu anasi ebyosi ebibali bwagha,’ ni bugha ambu ebya thukayithagha omwa ngebe. Yehova angana sangwa aminya ebiyithawa by’obuli mundu imwamuli ebyalya, eby’eryambalha, n’ah’erikesya nibya ithwe isithuli thwaminya. (Fil. 4:19) Yehova anasi omughulhu thwangabya ithukayithagha olhundi lhukimba. Anasi n’ebyalya ebya thukayithagha omwa mibiri yethu n’ah’erikalha ahathutholere erikwamana n’abandu abali omw’eka yethu. Yehova akendi lhangira athi thukabana ebya thukayithagha.

19. Busana naki sithutholere thukayihira omwa maghaniryo aw’ebyangabya omwa buthuku bw’embere?

¹⁹ Soma Matayo 6:34. Wukiminye ngoku eno ni ngendo yakabiri Yesu akabugha athi: “Simuyilhuhaye n’amaghaniryo.” Akanza ithwarwanisya amaghaniryo aw’ekiro ahabwakyo—ithunayikethere ngoku Yehova akendi thuwathikya. Omundu amayihira omwa maghaniryo okwa bikendi syabya omwa buthuku bw’embere, iniangananza eriyilhwako omwakanya k’eriyikethera Nyamuhanga, kandi ekyo ikyangana tsandya obughuma bwiwe na Yehova.—Emi. 3:5, 6; Fil. 4:6, 7.

20. (a) Ni kilhubirirwa kyahi ekya wanga yihiriraho omwa mubiiri wa Yehova? (b) Wanga kolhaki erithoka eryolhobya engebe yawu?

²⁰ Ni ky’obukiru erilekerania emyatsi y’Obwami busana n’erisondekania ebindu by’ekinyamubiri. Eky’amenge ly’erikwamirira ebilhubirirwa by’obunyakirimu. Ng’eky’erileberyako, mbwino siwanga thwamu erihumira omwa kithunga ekirimo obuyithawa bw’abathuliri? Kandi ibbwa erisangira omwa mubiiri w’obutemburi? Wamabya iwune mutemburi, mbwino siwanga saba erighenda okwa Sukuru y’Abathuliri b’Obwami? Wangana saba eribya iwune muyawathikya okwa Beteli kutse okwa sy’ofisi sy’erihinduliramu? Wangana yihayo eriwathikya okwa buhimbe bw’ebisenge by’Obwami? Thalengekania nga wang’olhobya wuthi engebe yawu nuku wuthoke erisangira omwa mibiiri y’Obwami. Wangana tsuka erikihira omwa misabe wukaghanirya okwa biri omwa kasanduku “ Ngoku Wangolhobya Engebe Yawu,” n’eritsuka erikolha ebikayithayisibawa eriberererya ekilhubirirwa kyawu.

21. Ni kyahi ekikendi kuwathikya eriyithunda hakuhi na Yehova?

²¹ Yesu aby’awithe nzumwa mbuya akathukangirirya athi thutsuke erisondya Obwami, butsira ebindu. Omughulhu thukakolha ekyo, sithutholere thukahangya-hangya busana n’ebiyithawa byethu by’ekinyamubiri. Thukayithunda hakuhi na Yehova omw’imuyikethera n’erithendi ghendera okwa bul’isonda ly’omuthima kutse erighulha ekyanamabya okwa kathali nomuwangabya iwangana kithoka. Eryolhobya engebe yethu hathya kikendi thuwathikya erisyabana “engebe eyiri ngebe kundu” eyikasa.—1 Tim. 6:19.