1, 2. Ni kitsibuki ekyo balere bangana bana munabwire, kandi banga kolhaki erikirwanisya?

OYUKASOMA na mwali wethu okwa sukuru e Britain, mwamubwira athi, “Omundu w’amenge manene ng’iwe syang’ikirirya omu Nyamuhanga.” Na mughalha wethu we Germany mwahandika athi: “Abahalimu baghe bakalhangira omwatsi we Biblia ow’ebindu erihangikwa nga binyambwirwa. Kandi sibali kilhangira nga kitsibu abanya sukuru erikirirya bathi ebindu byayibuthukira.” Mwali wethu e France mwabugha athi: “Abasomesya okwa sukuru yethu bakasweka bakalhangira ihane abanya sukuru abakin’ikiriraya omwa Biblia.”

² Iwe ng’omughombe wa Yehova oyukine mulere, kutse oyukinamwighako, wukanayowa omuthima wawu iniabiryanza eriligha esyongangirirya sy’abandu, ng’eribugha indi ebindu byayibuthukira sibyahangikawa? Kyamabya ikwa kiri kithya, hane ebya wanga kolha ebyanga kuwathikya eribya iwune n’erikirirya erighumire. Eky’erimbere ly’erikolesya ndeke amaaka w’obulengekania agho Nyamuhanga akuha, ‘awakendi kutheya.’ Akendi kutheya oko malengekania w’abanya menge awanga tsandya erikirirya lyawu.—Soma Emisyo 2:10-12.

3. Omo mwatsi ono thukendi kania okuki?

³ Erikirirya ery’okwenene liseghemere okw’iminya ndeke omwatsi  w’ekwenene owahambire oku Nyamuhanga. (1 Tim. 2:4) Neryo busana n’ekyo, omughulhu wukasoma Ekinywa kya Nyamuhanga n’ebitabu byethu, isiwakwama kya soma buyira. Kolesya amaaka wawu w’obulengekania nuku ‘wuminye’ enzumwa eyiri omwa bya wukasoma. (Mt. 13:23) Thulebaye erikolha ekyo nga lyanga kuwathikya lithi erighumya erikirirya lyawu omu Nyamuhanga ng’Omuhangiki n’omwa Biblia. Thukendi lebya emyatsi eyangaleka omundi inialhangira okwenene.—Ebr. 11:1.

4. Busana naki ebya Nyamuhanga n’eby’engebe nga yatsuka yithi bikayithagha erikirirya lirebe, kandi ambi ithwakolha kyahi erithoka eriminya ekihikire?

⁴ Omundu ane athakubwira athi iyo ikirirye engangirirya y’ebindu eriyibuthukira kundi athi iyo yiseghemere okwa sayansi aliwe athi ebya Nyamuhanga biseghemere okw’ikirirya buyira? Abangyi bawithe amalengekania ng’ayo. Aliwe thutholere ithwabya ithunasi kino: Mbulha wikirirye omu Nyamuhanga kutse omwa bindu eriyibuthukira, ebyosi bikayithagha erikirirya lirebe. Busana naki ithwabugha thuthya? Sihali oyuwabirithalhangira Nyamuhanga kutse ekindu kikahangikwa. (Yn. 1:18) Kandi sihali mundu na mughuma—nomwangabya munyasayansi oyuwabirithalhangira ekindu kikayibuthukira kutse kikahinduka mwa kindi. Ng’eky’erileberyako, sihali oyuwabirithalhangira enzoka yikahinduka eribya kisoro ng’endale. (Yobu 38:1, 4) Busana n’ekyo, esyombandi syosi ibiri, ithwe bosi thutholere ithwalebya ndeke ebikaleka ithwakakasya ekya thwikirirye kandi ithwakolesya amaaka wethu w’obulengekania erithwamu ekihikire. Okwa mwatsi w’erihangika, omukwenda Paulo mwahandika athi: “Emyatsi ya Nyamuhanga eyithelholhawako, ey’obuthoki bwiwe bw’erikotha, n’obunyamuhanga bwiwe, byabiriminyikalha ndeke-ndeke omwa bindu ebyo ahangika. Neryo abandu sibawithe eky’eriyihambulyamu.”—Abar. 1:20.

5. Ithwe ng’abandu ba Nyamuhanga thwabirithokesibwa thuthi erikolesya amaaka wethu w’obulengekania?

⁵ ‘Eriminya’ likanamanyisaya eriyitheghererya ekindu ekithalhangirwe kutse ekithalhwe kyolhobire erikenga. (Ebr. 11:3) Busana n’ekyo, omundu oyuwithe amaaka w’eriminya, akakolesaya obulengekania, butsira ameso n’amathwe masa. Ekithunga kya Yehova kyabirihulhukya myatsi mingyi eyikolirwe kw’erisekulya ery’amani, eyanga thuwathikya. Emyatsi eyi yangana thuwathikya ‘erilhangira’ Omuhangiki wethu erilhabira omwa  meso w’erikirirya. (Ebr. 11:27) Emyatsi eyi mwamuli e Vidiyo eya The Wonders of Creation Reveal God’s Glory, e brokyuwa eya Was Life Created? n’eya The Origin of Life—Five Questions Worth Asking, n’ekitabu, Is There a Creator Who Cares About You? Kandi thukabya ithunemuthunga omwa syogazeti syethu mw’eyindi myatsi eyikathubukaya kw’obulengekania. Ng’omwa Awake! mukanabera eryasira emyatsi eya banya sayansi n’abandi bakasoborera bakakangania ekikaleka lino ibikirirya omu Nyamuhanga. Emyatsi eyikabera eryasiramu eyiwithe omuthwe “Mbwino Eri Sikokothya ly’Amenge?” yabirikangania emikwikire eyikaswekaya ey’ebya thukalhangira omwa buhangwa. Mughulhu mungyi abanya sayansi bakagherereraya eby’obuhangwa bakakolha ebyabu.

6. Ni mighaso yahi eyiri omw’ikolesya ebya thuwithe omwa kithunga, kandi wabirighasirwa wuthi?

⁶ Mughalha wethu ow’emyaka 19 e Amerika, abere akakania okwa syobrokyuwa ibiri esiri ahighulhu, mwabugha athi: “Syabirinyighasira kutsibu. Nabirisisoma ngendu nyingyi.” Mwali wethu we France mwahandika athi: “Emyatsi eya, ‘Mbwino Eri Sikokothya ly’Amenge?’ yikanyiswekaya! Yikakanganaya ngoku kwenene abainjinia bangana gherererya eby’obuhangwa omw’ikolha ebyabu, aliwe sibanga hika okwa lhulengo lhw’emikwikire eyikathakathenie ey’oby’obuhangwa.” Ababuthi ab’omusika w’emyaka 15 e South Africa mubabugha bathi: “Omwatsi ogho mwali wethu akatsuka erisoma erimbere omwa Awake! w’owa ‘Eribulibwa.” Kandi ibbwa iwe? Wunemulhangira wuthi nawu wukaghasirawa omwa byosi ebi? Byangana leka erikirirya lyawu iryaghuma ng’omuthi ow’ahandire emirihi yo ndeke. Neryo erikirirya eryo iryakuwathikya erikakirya emiyagha y’esyongangirirya sy’amabehi.—Yer. 17:5-8.

7. Busana naki Nyamuhanga akanza iwakolesya amaaka w’obulengekania bwawu?

⁷ Nina kibi eribulya ebibulyo ebihambire okwa Biblia? Eyihi nahake! Yehova anzire iwakolesya amaaka wawu w’obulengekania eriyiminyira ekwenene. Syanzire wukikirirya kundi n’abandi ku bikirirye bathya. Neryo kolesaya amaaka wawu w’obulengekania eriminya omwatsi w’ekwenene. Neryo ebya wabiriminya ebyo iby’ebikendibya musingyi w’erikirirya lyawu. (Soma Abanya Roma 12:1, 2; 1 Timoteo 2:4.) Enzira nguma eyanga kuwathikya eribana eriminya ng’eryo, y’emyatsi eya wukasombolha erighako.

8, 9. (a) Ni myatsi nga yahi eya bandi banganza erighako? (b) Abandi babirighasirwa bathi omw’ighanirya ndeke okwa bya bak’igha?

⁸ Abandi bakanathwamu erigha okwa maminyereri we Biblia kutse okwa bya kera, ebikathakulhawa omwa kithaka, n’eby’esayansi ebikakanganaya ngoku e Biblia yihikire. Obuminyereri obukaswekaya obw’erighako bw’obuli omwa Enzuko 3:15. Omulhondo oyu akanganaya omwatsi mukulhu owa Biblia yiseghemereko, ow’erisighika ehamuli ya Nyamuhanga ey’erithabalha n’eryerya erina liwe erilhabira omwa Bwami. Omwa mibere y’omusyo, omulhondo oyu akakanganaya Yehova ng’akendi syaghunza h’athi eriaghalhwa lyosi erya bandu babiribana eritsuka omwa Edeni. Wanga yeghesya wuthi okwa biri omwa Enzuko 3:15? Iwangana tsuka erithegheka endondekania y’erisubungukana ly’emyaka n’ebyabya. Endondekania eyo iyanganabya mw’amasako makulhu-makulhu aw’akakanganaya ngoku aghenda akabisulha lyolho-lyolho emyatsi eyihambire okwa bandu n’emitheghekere eyiri omwa mulhondo oyu eyikakanganaya ngoku obuminyereri obu bukendi syabererera. Iwukendibya wukalhangira ngoku amasako akahambangana ndeke, iwukendi ghunzerera ngoku abaminyereri n’abahandiki be Biblia ‘basondolibawa n’omulimu abuyirire.’—2 Pet. 1:21.

⁹ Mughalha wethu e Germany mwalhangira ngoku obuli kitabu omwa Biblia kikakanaya okwa Bwami. Mwabugha athi: “Ko kiri kithya, nomwakine indi abalhume nga 40 babahandika e Biblia. Abosi sibabyaho omwa buthuku bughumerera kandi sibabya basene.” Mwali wethu e Australia mwatsemera omwatsi w’erigha ow’abya omwa  Watchtower ey’Okwerikuminibiri 15, 2013, owakakanaya Ekiro ky’Erikyuruka nga kikamanyisayaki. Omukonga w’embaghane oyo ahambangene ndeke n’ebiri omwa Nzuko n’eryasa lya Masiya. Mwahandika athi, “Omwatsi oyu mwaleka inalhangira ngoku Yehova ni mubuya. Eribya imwahira h’endegheka eyi okwa Baisraeli kandi iyasyabererera oku Yesu mukyanyiswekya. Munatsuka erimana n’erilengekania kwesi ngoku ekihulho ky’Erikyuruka ekyo kyabya kikulhu kutsibu!” Ni kyahi ekyaleka mwali wethu oyu iniayowa athya? Mwalengekania buuli okwa by’asoma n’eriminya enzumwa y’omwatsi oyo. Eki mukyaghumya erikirirya liwe n’erimusegherya hakuhi na Yehova.—Mt. 13:23.

10. Okwenene okwabya omwa bahandiki be Biblia ku kaleka kuthi ithwikirirya ebya bahandika?

¹⁰ N’ekindi ekikahimba erikirirya ekya thutholere ithwalengekaniako bw’obuthubaha n’okwenene okwabya omwa balhume abahandika e Biblia. Abandi bahandiki abakera ibakapipa abasondoli babu omwa kisehya n’erihamya amami wabu. Aliwe abaminyereri ba Yehova ibo ibakabugha okwenene mughulhu wosi. Nibya ibakaligha n’eribugha obulemwa bw’abandu babu n’abami babu. (2 Emy. 16:9, 10; 24:18-22) Mubakangania ndeke obulemwa bwabu ibibene-bene n’obw’abandi baghombe ba Nyamuhanga. (2 Sam. 12:1-14; Mk. 14:50) Mughalha wethu e Britain mwabugha athi, “Eribugha okwenene ng’eri siriri banika-banika. Eki kikaleka ithwayongera erikakasya ngoku e Biblia kwenene yikalhua oku Yehova.”

11. Abalere bang’ongera bathi eritsemera omughaso w’emisingyi ye Biblia?

¹¹ Abangyi babiriligha ngoku e Biblia yasondolibawa Nyamuhanga busana n’emisingyi yayu eyikathusondolha. (Soma Esyonyimbo 19:7-11.) Mwali wethu mulere owe Japan mwahandika athi: “Thwabere thwaghendera okwa misingyi ye Biblia omw’eka yethu, muthwabana etseme y’okwenene. Ithukabya omwa buholho, obughuma, n’olhwanzo.” Emisingyi ye Biblia yikathutheghaya okw’isangira omw’iramya ly’amabehi n’erithendibya omwa bukobe obwa bangyi balimu obw’ebihaniriro by’olhukumu-kumu. (Esy. 115:3-8) Esyongangirirya sy’eribugha indi sihali Nyamuhanga sikanakuhambako? Esyongangirirya ng’eribugha indi ebindu byayibuthukira sikaleka obuhangwa ibobwene-bwene ibwabya ng’enyamuhanga, erileka ibwabya nga bwa buwithe obuthoki obutholere eribya bwa Yehova. Abakabugha bathi sihali Nyamuhanga, wukowa bathi engebe yethu y’embere yiri omwa byalha byethu. Aliwe sihali ekya bakabugha ekyangaha abandu b’amaha w’okwenene.—Esy. 146:3, 4.

12, 13. Ni nzira yahi eyanga kolha ndeke ey’erikania n’abawukasoma nabu, abasomesya, n’abandi okw’ihangika kutse okwa Biblia?

¹² Ni kyahi ekyanga kuthokesya erighanirya ndeke n’abandi oko mwatsi w’erihangika ne Biblia? Eky’erimbere, ambi isiwalengekanaya lhuba-lhuba wuthi wunasi ebya wundi ikirirye. Hane abakabugha bathi bikirirye omwa bindu eriyibuthukira aliwe ibanalighire ngoku Nyamuhanga aneho. Bakalengekanaya bathi Nyamuhanga angabya imwakolesya amaaka w’ebindu eriyibuthukira omw’ihangika ebindu muthina-muthina. Abandi bakaligha eky’ebindu eriyibuthukira kundi bathi sikyangabere kikakangiriribwa omwa sukuru ku kithabya kya kwenene. N’abandi bakanaleka erikirirya omu Nyamuhanga busana n’ebikakoleka omwa madini ebikabaponesaya. Neryo kwesi, omughulhu wukakanaya n’omundu okwa mwatsi w’eritsuka ly’engebe, kyuwene eritsuka erimubulya. Tsuka eriminya kwenene ng’ikiriryeki. Wamamukangania obuyitheghererya n’erimuhulikirira, ikyangana leka nayu iniakuhulikirira.—Tito 3:2.

¹³ Wamalhangira omundu iniakahakanisaya enyikirirya yawu y’ebindu eribya ibyahangikawa, omwa menge iwangana musighira olhulira. Iwangana bugha wuthi athasoborera ebindu nga byangabya imubyatsuka bithi ahathe Muhangiki. Akandu akatsuka eribya n’engebe erithoka erilholha embere, kabya katholere eribya ikangana butha kutse eriyilhusya mw’ebindi ebiri ng’iko. Omuprofesa mughuma mwabugha athi  ekyo erithokekana, akandu ako kangayithaghire bino, (1) akaghobi akangatheya eby’omwa kathi kako, (2) eribya ikangana thoka erithunga akaghalha n’erikolesyako, (3) ikane mw’emyatsi eyikakanganaya ngoku katholere ikasyasosa n’erikulha, na (4) ikabya ikangana thoka eriyithahulha mw’ehindi ehiri mw’emyatsi iyan’eyo. Mwathasy’ongerako athi: “Nibya n’akandu kake buyira akawithe engebe kakaswekaya omwa mikwikire yaku.”

14. Wanga kolhaki wamayowa isiwuyitheghekire ndeke erikania okwa mwatsi w’ebindu eriyibuthukira n’erihangika?

¹⁴ Wamayowa isiwuyitheghekire ndeke erikania okwa mwatsi w’eriyibuthukira ly’ebindu n’erihangika, iwangana kolesya ekyolhobire ekya mukwenda Paulo akakolesaya. Mwahandika athi: “Obuli nyumba yikahimbawa n’omundu, nikwa Nyamuhanga ni muhimbi w’emyatsi yosi.” (Ebr. 3:4) Erighanirya n’omundu okw’ekyo likawathikaya kutsibu! Kandi ni kwenene, ekindu kikabyaho ikinawithe oyuwakikolha. Kutse iwangana kolesya ekitabu ekyanga wathikya. Mwali wethu mughuma mwana kolesya esyobrokyuwa esiryakanganibawa eyighulhu erikania n’omulhwana oyuwabugha athi iyo syali righa athi hali Nyamuhanga, athi iyo akikiriraya omwa bindu eriyibuthukira. Habere halhaba wiki nguma n’ebiro nga by’ebyo, omulhwana mwabugha athi: “Ngaligha kwesi Nyamuhanga aneho.” Mwaligha erigha e Biblia, hathya ni mughalha wethu omwa kithunga.

15, 16. Ni menge wahi awawutholere iwakolesya wukakania okwa Biblia, kandi ambi iwabya na kilhubirirwaki?

¹⁵ Ebyo bya wangana kolesya wukakania n’oyukathika-thikira e Biblia. Tsuka eriminya ndeke eby’ikirirye kandi nga wanga muha myatsi yahi eyanga muwathikya. (Emi. 18:13) Amabya iniakatsemera eby’esayansi, inianganza wamamukangya ebya sayansi ebihikire ebya Biblia yikakanayako. N’abandi ibangananzisibwa wamabakangya ebikakanganaya ngoku e Biblia muli amaminyereri aw’akabererera n’eribugha okwenene okwa bya kera. Kutse iwangana bakangania emisingyi eyuwene ye Biblia, ng’eyiri omw’Ikangirirya lya Yesu ery’okwa Kithwe.

¹⁶ Wibuke ngoku ekighendererwa kyawu ly’erihika okwa muthima butsira erianza erisinga. Neryo busana n’ekyo, ambi iwahulikirira ndeke. Bulhaya ebibulyo ebikakanganaya kwenene ku wukanza eriminya, kandi wukakania, kanganaya obwolho-bwolho n’erisikya, kutsibu-tsibu wukakania n’abakulhu. Ekyo ikyangana leka ibanza erihulikirira ekya wukabugha. Kandi ibakendi lhangira kwenene iwukalengekanaya buuli okwa bya wikirirye. Abalere bangyi ekyo kyabiribalema. Aliwe ambi iwabya iwunasi ngoku sikirikuyithaghisaya erisubirya ab’olhughalha-ghalha kutse abakanza erikusatha-sathamu.—Emi. 26:4.

17, 18. (a) Niki ekyanga kuwathikya eriyira ekwenene mwa yawu? (b) Ni kibulyo kyahi ekikendi syakanibwako omwa mwatsi owakakwamako?

¹⁷ Erikirirya erighumire siriri seghemera okw’ithaminya ebikulhu-bikulhu ebiri omwa Biblia kisa. Neryo kwesi, sekulhaya omwa Biblia ng’oyukasondaya eby’obughuli ebibisire. (Emi. 2:3-6) Kolesaya n’ebindi ebya thuwithe ebyangabya omwa mubughe wawu nge Watchtower Library okwa DVD, ERIBIKIRO LY’EBITABU OKWA MUTHAHULHA, ne Watch Tower Publications Index kutse Obusondoli bw’Erisekulya Omwa Bitabu by’Abema ba Yehova. Kandi hira h’ekilhubirirwa ky’erisoma e Biblia eyosi. Iwangana lengesya erikolha ekyo omwa mezi 12. Ni bike ebyanga himba erikirirya lyethu ng’erisoma Ekinywe kya Nyamuhanga. Omulebererya w’omuthimbo abere akakania okwa mughulhu abya mulhwana, mwabugha athi: “Ekyangwathikaya eriligha kwenene ngoku e Biblia ni Kinywe kya Nyamuhanga lyabya iry’erisomayo eyosi. Emyatsi y’omwa Biblia eyanabya ing’igha omwa bwana ibbwa munalhangirayo ndeke. Erikulha-kulhana bunyakirimu lyaghe mulyatsukiraho.”

¹⁸ Ababuthi, muwithe mubiiri munene w’erikolha okw’ikulha-kulhana bunyakirimu ery’abaana benyu. Mwangabawathikya muthi eribya n’erikirirya erighumire? Omwatsi owakakwamako akendi kania okw’ekyo.