1, 2. Ni bitsibu byahi ebya Bakristayo batholere ibarwanisya?

ERITSUKA okwa muthaleghulha w’erimbere, Abeli, erihika na munabwire, abaramya Yehova babirirwanisya bingyi. Omukwenda Paulo mwahandikira Abakristayo Abaebrania eribabwira ngoku “mubayiyinia butsira ikindwa omwa malhwa awakalire n’omo malighe,” bakanza erisimwa na Yehova n’eribana emighisa yiwe. (Ebr. 10:32-34) Akaghalha aka Bakristayo bakahira omwa malhwa agho balimu Paulo mwakalinganisya n’akaghalha akabya kakahirwaho n’abakasangira omwa misathu y’Abagiriki, ng’omwa mathibitho, erilhwa ebigwa, n’esyongumi. (Ebr. 12:1, 4) Munabwire thuli omwa malingwatha w’engebe, kandi hane abakanza erithulengemerya, erithulemesya, erithuthinira, n’erithughunza kw’etseme n’emighisa eya thulindirire.

² Eky’erimbere, thuli omwa malhwa awakalire kutsibu na Sitani n’ekihugho kiwe. (Efe. 6:12) Ni kikulhu erithendi lighira “obuhaka bw’amabehi” obw’ekihugho erithuhambako. Obuhaka obu mwamuli esyongangirirya syakyo, amenge wakyo, n’emitse yakyo mibi ng’eby’obutswatswa, n’erikolesya nabi ebikathamiraya ng’ethaba,  obwabu n’ebindi n’ebindi. Kandi mughulhu wosi thutholere ithwabya ithunemurwanisya obulemwa bwethu n’erihwa amani.—2 Kor. 10:3-6; Kol. 3:5-9.

3. Nyamuhanga akathuthendeka athi erirwanisya ebikathurwanisaya?

³ Mbwino kyangana thokekana erisingura amalhwa awakalire aya? Ee, aliwe iwabirilhwa. Omw’ikolesya eky’erileberyako ky’omulhwi w’esyongumi, Paulo mwayibughako athi: “Sindilhabaya esyongumi sy’omo kyanya mo buyira.” (1 Kor. 9:26) Ngoku oyukalhwa esyongumi akarwanisaya oyukalhwa nayu, nethu ku thunatholere ithwalhwa thuthya n’ebikathurwanisaya. Yehova akathuthendeka n’erithuwathikya omwa malhwa aya. Omwa Kinywe kiwe, akathuha obusondoli obwanga lhamya engebe. Kandi akathuwathikaya erilhabira omwa bitabu byethu, emihindano emike-mike, n’eminene-minene. Mbwino wunemughendera okwa bya wuk’igha? Wamathendi kolha ekyo, iwukendibya ng’oyukaghusa esyongumi sy’omo “kyanya mo buyira,” isiwulilhwa ndeke n’oyukakurwanisaya.

4. Thukayitheghaya thuthi okw’ithendi kindwa n’ekibi?

⁴ Ebikathurwanisaya byangana thwasira isithuyitsulirye n’erithughumirya omughulhu thuthawithe kaghalha, neryo thutholere ithwabya ithunatheghirye. E Biblia yikakunga yithi: “Siwuleke ekibi kikakukinda, nikwa wukinde ekibi omwa kibuya.” (Abar. 12:21) Eribugha indi sithuleke ‘ekibi kikathukinda’ kikakanganaya ngoku thwangana singura ekibi. Ithwangana singura thwamalholha embere eribya ithunemukirwanisya. Aliwe thwama yirekerania, thukaleka erilhwa, Sitani, ekihugho kiwe, n’obuthahikana bwethu ibyangana thukinda. Isiwalighira emikango-kango ya Sitani yikaleka wukahwa amani!—1 Pet. 5:9.

5. (a) Ni kyahi ekyanga thuwathikya erilholha embere omwa malhwa w’eryanza eribana emighisa ya Nyamuhanga? (b) Ni bahi abathukendi kaniako abali omwa Biblia?

⁵ Abali omwa malhwa erithoka erisingura, sibatholere bak’ibirirwa ekikaleka ibalhwa. Kandi bamabya b’erisimwa na Nyamuhanga n’erithunga emighisa yiwe, batholere ibabya ibanahirire amalengekania wabu okwa biri omwa Abaebrania 11:6, bithi: “Litholere oyukahika oku Nyamuhanga in’ikirirya ko Nyamuhanga aneho, kandi kw’akahemba abakamusonda-sonda.” Ekinywe ky’Ekigiriki ekyahindulhawa mwa “erisonda-sonda” ky’ekikamanyisaya erihira h’akaghalha kanene. (Emib. 15:17) Omwa Masako mune abalhume n’abakali abahira h’akaghalha kanene omw’isonda-sondya emighisa ya Yehova. Yakobo, Rakeli, Yozefu, na Paulo mubabana ebitsibu ebyanga baghunzire amani, aliwe mubakangania ngoku eriyitsingirira mukalhwiririra mighisa mingyi. Thwanga gherererya thuthi eky’erileberyako ky’abandu bbani aba?

6. Ni kyahi ekya wathikaya Yakobo eriyitsingirira kandi mwahembwa athi? (Lebaya ekisasani ekiri okw’itsuka.)

⁶ Yakobo mwalhwa kutsibu n’eriyitsingirira kundi abya anzire Yehova, inakatsemera eby’obunyakirimu, kandi abya awithe erikirirya erighumire omwa mulhaghe wa Yehova ow’eritsumulha olhubutho lhwiwe. (Enz. 28:3, 4) Eki ky’ekyaleka Yakobo iniane w’emyaka hakuhi 100 iniakolha ekyosi-kyosi erithunga omughisa wa Nyamuhanga; nibya mwanyukana n’omulaika oyuwabya iniabiryambalha omubiri. (Soma Enzuko 32:24-28.) Mbwino Yakobo ahabwiwe anabya n’akaghalha n’eriyiyinia eryabya likayithaghisibwa erinyukana n’omulaika w’akaghalha? Eyihi! Aliwe mwathwamu erilhwa n’erikangania ngoku syendi sagha! Kandi kwenene mwahembwa busana n’eriyitsingirira liwe. Mwahebwa erina erimutholere erya Israeli, (erikamanyisaya “Oyukanyukana [Oyukayitsingiririra] na Nyamuhanga” kutse “Nyamuhanga akalhwa”). Yakobo mwathunga ekihembo nethu ekya thunemusondya—eky’erisimwa n’eritsumulhwa na Yehova.

7. (a) Ni mibere yahi eyikalire eya Rakeli abana? (b) Mwalholha athi embere erilhwa erihika okw’itsumulhwa?

 ⁷ Mukali wa Yakobo, Rakeli, nayu abya alindirire kutsibu erilhangira ngoku Yehova anga berererye eky’alhagha mwira wiwe. Aliwe habya ihane ekikabya nga kikendi lemesya. Syabya awithe omwana. Kandi omwa buthuku obo omukali eribya isyabuthire ikiri nga kitsumi. Rakeli mwathoka athi eribana akaghalha k’erilholha embere erirwanisya emibere eyikaghunza amani eyi kandi isyawithe n’ekyanga kolha? Mwathahwa amaha. Aliwe mwalholha embere n’amalhwa omw’isaba kutsibu. Yehova mwowa ekiriro kya Rakeli, erighunzerera amamuha abaana. Kwesi ky’ekyaleka buthuku bughuma Rakeli inialhaka omwa butseme athi: “Omw’irengana [erinyukana] erikalire, nabirirengana . . . namakinda!”— Enz. 30:8, 20-24.

8. Yozefu mwabana bitsibuki ebikalire, kandi emibere ey’abithwaliramu yikathweghesayaki?

⁸ Ahathe erithika-thika, eky’erileberyako kya Yakobo na Rakeli mukyahamba kutsibu oko mwana wabu, ya Yozefu, n’erimuwathikya eriminya ngoku angarwanisya ebyanga lenga okw’irirya liwe. Yozefu iniane w’emyaka 17, mwathunga ekitsibu ekikalire. Busana n’obuha, baghalha babu mubamughulya omwa bukobe. Enyuma w’aho, mwahirwa n’omwa ngomo habw’emyaka mingyi e Misiri isyawithe na lhubanza. (Enz. 37:23-28; 39:7-9, 20-21) Eki mukithaghunza Yozefu y’amani; kutse n’erikwa ekinigha eky’eryanza erithuhulya. Omwakanya k’ekyo, mwahira amalengekania n’omuthima wiwe wosi okwa bughuma bwiwe na Yehova. (Law. 19:18; Abar. 12:17-21) Nethu eky’erileberyako kya Yozefu kitholere ikyathuwathikya. Ng’eky’erileberyako, nomuthwangabya imuthwabana ebitsibu omwa bwana kutse n’emibere eya thulimu munabwire iyabya nga yithukalireko, ambi ithwalholha embere erilhwa n’eriyitsingirira. Thuyikethere ngoku thwamakolha ekyo, Yehova akendi thutsumulha.—Soma Enzuko 39:21-23.

9. Omw’igherererya Yakobo, Rakeli, na Yozefu, ni kaghalha kahi akathutholere erihiraho nuku thubane omughisa wa Yehova?

⁹ Thalengekania okwa kitsibu ekya wulimu lino. Obundi ikyanganabya ini kolhwa kw’obuthe bulingirirania, erisolholhwa, kutse erisekereribwa. Kutse obundi ihali oyuwabirikuthulha kw’amabehi, obundi busana n’erikukwa obuha. Omwakanya k’erihanika wukabikyako, ibuka ekya wathikaya Yakobo, Rakeli, na Yozefu erilholha embere erikolera Yehova ibanatsemire. Nyamuhanga mwabaghumya n’eribatsumulha kundi mubalholha embere erikangania ngoku banzire kutsibu eby’obunyakirimu. Mubalholha embere erilhwa n’erikolha erikwamana n’emisabe yabu. Thuli omwa buthuku bw’erihwererera ly’omughulhu mubi ono; busana n’ekyo, thutholere ithwamakirira kutsibu amaha w’ebya thulindirire! Wunayitheghekire erihira h’akaghalha kutse erilhwa nuku wusimawe na Yehova?

10, 11. (a) Thwangalhwa thuthi busana n’eryanza eribana omughisa wa Nyamuhanga? (b) Ni kyahi ekikendi thuwathikya erithwamu ndeke n’erisingura amalhwa w’erithendihwa mani n’erilengemeribwa?

¹⁰ Ni mibere nga yahi eyanga thuyithaghisya erilhwa nuku thubane omughisa wa Nyamuhanga? Ekya bangyi babiribana ly’erirwanisya obulemwa bulebe bw’omubiri. Kyabiriyithaghisya abandi erihiraho akaghalha kutsibu erithoka eritsemera omubiiri w’erithulira. Kutse obundi okw’iwe ekitsibu w’amaghalha wawu eribya isyali ndeke kutse embwera y’eribya iwuwene. Abandi banemurwanisya ekitsibu ky’eribya ibangana thoka erighanyira oyubaponesirye kutse eribasoberya. Nomuthwangabya ithwamaghunza buthuku bungahi omw’ikolera Yehova, ithwe bosi thunemurwanisya ebyanga thulemesya  erikolera Nyamuhanga, oyukahemba abathaleghulha.

¹¹ Omwa kwenene, ikyanganayithagha erirwanisya kutsibu nuku wuthwemu ndeke okwa myatsi n’erikwamirira emibere y’Ekikristayo. Ekyo ni kwenene, kutsibu-tsibu omughulhu omuthima wethu omuthebya akathubwira awandi malengekania. (Yer. 17:9) Wamayowa obundi omwa mibere mirebe iwabirithalhuka, lhangira wuthi kisi wukasaba Yehova y’omulimu abuyirire. Erisaba haghuma n’omulimu abuyirire ibikendi kuha akaghalha k’erikwamirira enzira eya wunasi kwa yihikire eya Yehova angatsumulha. Kolha erikwamana n’erisaba lyawu. Lengaho erisoma hakiri katsweka kake omwa Biblia buli kiro n’erihira h’obuthuku bw’eriyeghesya n’erikwama-kwamania endegheka y’Eriramya ly’Eka.—Soma Esyonyimbo 119:32.

12, 13. Balikyethu babiri mubawathikibwa bathi erirwanisya esyongumbu nyibi?

¹² Hali by’erileberyako bingyi ebikakangnaya ngoku Ekinywe kya Nyamuhanga, omulimu wiwe abuyirire, n’ebitabu byethu byabiriwathikya balikyethu erirwanisya esyongumbu nyibi. Omulhwana mughuma mwasoma omwatsi “Wangana Rwanisya Wuthi Esyongumbu Nyibi?” omwa gazeti ye Awake! ey’Okwomwenda biro 8, 2003. Wunasi nga mwahambwako athi? Akabugha athi, “Nganemulengesya erirwanisya amalengekania mabi. Nabere nasoma omwa mwatsi oyo ngoku ‘yine n’abandi ibbwa abakalyambibawa kutsibu n’eky’erirwanisya esyongumbu nyibi,’ mukyaleka inayowa isindi ingyuwene.” Kandi omulhwana oyu mwaghasirwa n’omwa wundi mwatsi owasira omwa Awake!  ey’Okwerikumi biro 8, 2003 ow’abya n’omuthwe, “Eribya n’Eyindi Mibere y’Engebe—Nyamuhanga Akanakitsemera?” Mwalhangira ngoku abandi, ekitsibu eki ekiri “ng’endwalha y’omubiri.” (2 Kor. 12:7) Bakabya bane mulholha embere erirwanisya busana n’eribya n’emibere eyuwene, ibakendi lindirira obuthuku bw’embere ibanatsemire. Mwabugha athi, “Busana n’ekyo, ngalengekanaya, obuli kiro ekikalhaba, nanga nabya muthaleghulha. Ngasima kutsibu Yehova erikolesya ekithunga kiwe omw’ithuwathikya eribya ithune bathaleghulha okwa buli kiro ekikalhaba omwa kihugho kibi kino.”

¹³ Thalengekania n’okwa ky’erileberyako kya mwali wethu we Amerika. Mwahandika athi: “Nganza eribasima busana n’eribya mukathulisya ebya thukayithagha byenyine-nyine kandi okwa buthuku obutholere. Mughulhu mungyi nganayowa emyatsi nga ningye yiryatheghekerawa. Emyaka yamabirilhaba inganemurwanisya engumbu y’ekindu kirebe ekya Yehova aponire. Hakanayira inganza erikya okwa by’erirwanisya engumbu eyo. Nganasi kwenene Yehova ni w’olhukeri kandi kw’akaghanyira, aliwe kundi ngane mw’engumbu nyibi eyi kandi nganasi ngoku omwa muthima waghe singaponireyo, ngayowa nga singatholere eribana obuwathikya bwa Yehova. Ekindu ekyo kyabirihamba okwa mibere y’engebe yaghe yosi. . . . Aliwe nabere nabirisoma omwatsi ow’asira omwa Kaleberyo ak’Okwakasathu 15, 2013, ow’abya n’omuthwe, ‘Wunawithe “Omuthima w’Eriminya” Yehova?,’ munayowa kwesi Yehova iniananzire eringwathikya.”

14. (a) Paulo abya na malengekaniaki okwa byabya akarwanisya? (b) Thwanga kolhaki erithoka erirwanisya obulemwa bw’omubiri wethu?

¹⁴ Soma Abanya Roma 7:21-25. Paulo abya inianasi ndeke-ndeke ku sikyolho erirwanisya esyongumbu sy’omubiri owathahikene ono. Aliwe abya inianayikethere ngoku iniakendi singura obulemwa bw’omubiri omw’isaba Yehova n’erikirirya omwa mbanulho ya Yesu. Kandi ibbwa ithwe? Thwamalengaho erirwanisya omuthima w’eryanza erikwama esyongumbu sy’omubiri wethu, ithukendi thoka. Thuthi? Omw’igherererya Paulo, n’omw’iyikethera ndeke Yehova butsira akaghalha kethu, n’eribya n’erikirirya omwa mbanulho ya Yesu.

15. Busana naki erisaba lyangana thuwathikya eribya ithune bathaleghulha n’erighumira ebitsibu?

¹⁵ Hanganayira obundi Yehova inialekereraho ekindu akathuha akaghisa k’erikangania eriyowa lyethu oko mwatsi. Ng’eky’erileberyako, kyamabya indi ithwe kutse ow’okw’ithwe amawa kw’obulhwere obukalire kutse ekindi kitsibu? Ithukendi kangania ku thuyikethere Yehova omw’imulirira thuthi athuhe akaghalha k’eribya ithune bathaleghulha isithuthahwa kw’etseme n’eritseka bunyakirimu. (Fil. 4:13) Eby’erileberyako by’abangyi, ab’omwa buthuku bwa Paulo n’obwethu, bikakanganaya ngoku erisaba lyangana thuwathikya erisuba-subana bunyakirimu n’eribya n’amaaka w’erilholha embere eriyiyinia.

16, 17. Erithwamu lyawu ni ryahi iwe ng’oyunemulhwa?

¹⁶ Sitani iniakendi tsema kutsibu akalhangira wukahanika n’eriligha wuthi wamalemwa. Wuthwemu erihambirira ekibuya. (1 Tes. 5:21) Yikethere ngoku wangana singura omw’irwanisya Sitani, ekihugho kiwe kibi, n’esyongumbu syosi-syosi nyibi. Ekyo iwukendi kithoka wamayikethera ngoku Yehova awithe amaaka w’erikughumya.—2 Kor. 4:7-9; Gal. 6:9.

¹⁷ Kisi lholha embere n’erirwanisya. Kisi siwulhwike. Siwulhuhirire. Wulhole embere eriyitsingirira. Yikethere ndeke ngoku Yehova ‘akendi kuthulira emighisa, isihangabanika obwagha.’—Mal. 3:10.